1»Mun lam sárnum tijjân taan, amas tij jurâliđ keččâlusâin. 2Sij iärutteh tii synagogast, já puátá tot-uv äigi, kuás juáháš, kote koddá kiännii tist, jurdá, et sun tooimât uhrepalvâlus Imelân. 3Nuuvt sij pargeh ko iä tuubdâ Eeji iäge muu. 4Mun lam sárnum taam tijjân vâi tij muštáččijd, talle ko tot äigi puátá, et mun lam taam ettâm tijjân.
Tuotâvuođâ jieggâ
Mun jiem lah ovdil sárnum tijjân täst, tastko mun lam jieš lamaš tiiguin. 5Mut tääl mun moonâm suu kuuvl, kote lii muu vuolgâttâm. Kihheen tist ij koijâd must, kuus mun moonâm, 6pic tii váimu lii tievâ murrâšist tondiet, maid mun tijjân ettim. 7Mut mun eeđâm tijjân tuotâvuođâ: tijjân lii ävkkin, et mun moonâm meddâl. Jis mun jiem moonâ, ij Piälušteijee pyevti puáttiđ tii kuuvl. Mut ko moonâm meddâl, mun vuolgâttâm suu tii kuuvl, 8já sun puátá já čáittá, et maailm lii puástu-uáivilist, sun čáittá, maid meerhâš suddo, maid vanhurskesvuotâ já maid tuámu. 9Suddo lii tast, et ulmuuh iä osko munjin, 10vanhurskesvuotâ puátá uáinusân tast, et mun moonâm Eeji kuuvl eppeđge tij uáini innig muu, 11já tuámu lii tast, et taan maailm haldâšeijee lii tyemmejum.
12»Čuuvtij eenâb-uv must ličij tijjân sárnumâš, mut tij eppeđ vala pyevti väldiđ tom vuástá. 13Ko Tuotâvuođâ Jieggâ puátá, sun joođeet tii tubdâđ ubâ tuotâvuođâ. Sun ij uáináh sáárnu jieijâs noomâst, pic sárnu tom, maid kulá, já almoot tijjân, mii kalga puáttiđ. 14Sun kirkesmit muu, tastko tom, maid sun tijjân almoot, sun finnee must. 15Puoh, mii lii Eeji, lii meiddei muu. Tondiet mun ettim, et sun finnee must tom, mon sun tijjân almoot. 16Vala uánihâš puudâš, eppeđge tij uáini muu, já vuod uánihâš puudâš, te tij uáinivetteđ muu oppeet.»
Murrâšist ilon
17Motomeh máttááttâspárnáin koijâdellii kyeimistis: »Maid sun uáivild, ko sun iätá: ’Vala uánihâš puudâš, eppeđge tij uáini muu, vuod uánihâš puudâs, já tij uáinivettee muu oppeet’? Já maid sun uáivild, ko sun iätá, et sun mana Eeji kuuvl?»
18»Mondiet sun sárnu uánihâš puudâst?» sij imâštellii. »Mij ep ibbeerd, maid sun sárnu.»
19Jeesus huámášij, et sii halijdii koijâdiđ sust. Sun eeđâi sijjân:
Tom-uv tij smiettâvetteđ, ko mun ettim: ’Vala uánihâš puudâš, eppeđge tij uáini muu, oppeet uánihâš puudâš, já tij uáinivetteđ muu oppeet’? 20Tuođâi, tuođâi: tij uážžuvetteđ čiärruđ já luoimâđ, mut maailm illood. Tij kolgâvetteđ murâštiđ, mut tii toske muttoo illoon. 21Nissoon, kote šoddâd, tobdá toske, ko suu puddâ puátá. Mut ko páárnáš lii šoddâm, ij enni innig mušte pohčâsijdis pic illood tast, et olmooš lii šoddâm taan maailmân. 22Tij-uv tubdâvetteđ toske, mut mun uáinám tii vala uđđâsist, já talle tii vááimu tiävdá ilo, mon ij kihheen pyevti tist rievediđ. 23Ton peeivi tij eppeđ koijâd must maiden.
Jeesus lii vuáittám maailm
»Tuođâi, tuođâi: maid ihenis tij pivdevetteđ Eejist muu noomâst, tom sun addel tijjân. 24Taan räi tij eppeđ lah áánnum maiden muu noomâst. Áánnuđ, te tij uážžuvetteđ, já tii ilo lii tievâslâš.
25»Mun lam sárnum täst tijjân viärdádâsâiguin. Puátá äigi, kuás mun jiem innig keevti viärdádâsâid pic muštâlâm tijjân njuolgist puoh aašijn Eejist. 26Ton peeivi tij ánuvetteđ muu noomân, jiemge mun innig eeđâ, et mun jorgettâm Eeji piälán tii išedem tiet. 27Tastko Eeči jieš räähist tii, tondiet ko tij leppeđ rähistâm muu já leppeđ oskom, et mun lam puáttám Immeel kulen. 28Eeji kulen mun lam vuálgám já puáttám taan maailmân, já tääl mun kuáđám maailm já moonâm maassâd Iäččán kuuvl.»
29Máttááttâspárnááh ettii: »Tääl tun sáárnuh čielgâ sanijguin, jieh innig viärdádâsâiguin. 30Mij iberdep tääl, et tun tiäđáh puoh, jiehke tun taarbâš vyerdiđ, et kiinii koijâd. Tondiet mij oskop, et tun lah puáttám Immeel kulen.»
31»Tääl tij kale oskovetteđ», Jeesus eeđâi. 32»Puátá äigi – já tot lii jo tääl – kuás tij karttâvetteđ piäđgui, kii kuus-uv, já kyeđivetteđ muu ohtuu. Ohtuu mun jiem liijká pääsi, tastko Immeel lii muin. 33Mun lam sárnum tijjân taam, vâi tist ličij muu ráávhu. Maailmist tist lii atâštâs, mut pissoođ ruokkâdin: mun lam vuáittám maailm.»
