Johannes 4

₁Jeesus uážui tiettiđ, et fariseuseh lijjii kuullâm, maht sun čokkij pirrâsis eenâb máttááttâspárnáid já kaastij eenâb ko Johannes – ₂rievti mield sun ij jieš kástám, pic suu máttááttâspárnááh. ₃Talle sun vuolgij Juudeast já sirdâšui maassâd Galilean. ₄Sun koolgâi jotteeđ Samaria peht.

₅Mäđhistis Jeesus poođij Sykar-nommâsii Samaria kaavpugân, mii lii alda ton eennâmkuávlu, mon Jáákkup lâi adelâm algasis Joovsepân, ₆já tobbeen lâi Jáákkup káivu. Jeesus lâi määđhist vaibâm já čokánij kááivu piällás. Lâi koskâpeivi, suullân kuuđâd tijme.

₇Mottoom samarialâš nissoon poođij viežžâđ čääsi, já Jeesus eeđâi sunjin: »Adde muu juuhâđ tuu litteest.» ₈Máttááttâspárnááh lijjii moonnâm kaavpugân uástiđ purrâmâš. ₉Samarialâš nissoon eeđâi: »Tunhân lah juudalâš, maht tun táátuh juhâmuš samarialâš nisonist?» Juudaliih iä uáináh toolâ ohtâvuođâ samarialijguin.

₁₀Jeesus eeđâi nisonân: »Jis tun tiäđáččih, mon adalduv Immeel lii adelâm, já iberdiččih, kii tust táttu juhâmuš, tátuččih jieš sust, já sun adeličij tunjin ellee čääsi.» ₁₁Nissoon eeđâi: »Hiärrá, ijhân tust lah littegin, já káivu lii kieŋŋâl. Kost tun käldeečääsi váldáččih? ₁₂Jieh vissâ lah stuárráb ko iäččám Jáákkup, kiäst lep finnim taam kááivu? Sun juuvâi jieš taan kááivu čääsi, já tom juhhii suu algeh já suu kärji-uv.» ₁₃Jeesus västidij sunjin: »Kote juhá taam čääsi, sun kuškâluvá uđđâsist, ₁₄mut kote juhá muu adelem čääsi, sun ij innig kuássin lah kuškâlum. Tom čääsist, maid mun adelâm, šadda suu siste käldee, mast kolgá nuvâhánnáá eellim čääci.» ₁₅Nissoon eeđâi: »Hiärrá, adde munjin tom čääsi. Talle mun jiem innig kuškâluu jiemge taarbâš eelliđ tääbbin čääsi viežžâmin.

₁₆Jeesus eeđâi sunjin: »Moonâ viežžâđ kállád-uv teehin.» ₁₇»Ij must lah käälis», nissoon västidij. Jeesus eeđâi: »Tuođâ sarnuh: ij tust lah käälis. ₁₈Vittâ kállá tust láá lamaš, já tot, kiäin tun tääl iäláh, ij lah tuu käälis. Tast tun sarnuh tuođâ.» ₁₉Nissoon eeđâi: »Hiärrá, mun uáinám, et tun lah proofeet. ₂₀Mii eejih láá komerdâm já ruhâdâllâm Immeel taan vääri alne, ko vuod tij naggiivetteđ, et rievtis saje ruhâdâllâđ lii Jerusalemist.» ₂₁Jeesus västidij: »Osko muu, nissoon: puátá äigi, kuás tij eppeđ ruhâdâl Eeji taan vääri alne eppeđge Jerusalemist. ₂₂Tij koomeerdvetteđ taggaar, maid eppeđ tuubdâ, mut mij komerdep suu, kiäm mij tubdâp, tastko pestee puátá juudalij koskâvuođâst. ₂₃Puátá äigi – já tot lii jo tääl – kuás puoh tuođâlâš ruhâdâlleeh ruhâdeleh jiegâst já tuotâvuođâst Eeji. Tagarijd ruhâdâlleid Eeči táttu. ₂₄Immeel lii jieggâ, já tondiet toh, kiäh suu ruhâdeleh, kalgeh ruhâdâllâđ jiegâst já tuotâvuođâst.»

₂₅Nissoon eeđâi: »Mun tiäđám kale, et Messias puátá.» – Messias meerhâš Kristus. – »Ko sun puátá, sun almoot mijjân puoh.» ₂₆Jeesus eeđâi: »Mun tot lam, mun, kote täst sáárnum tuin.»

₂₇Eidu talle pottii máttááttâspárnááh ton sajan. Sij hiämáskii, et Jeesus sáárnui nisonáin, mut kihheen ij kuittâg koijâdâm, maid sun táátui já mondiet sun sáárnui nisonân. ₂₈Nissoon kuođij čäcilittees toos, moonâi kaavpugân já eeđâi ulmuid: ₂₉»Puáttiđ keččâđ, tyebbin lii almai, kote muštâlij munjin puoh, maid mun lam porgâm! Ličij-uv sun Messias?» ₃₀Ulmuuh vuolgii kaavpugist já pottii Jeesus kuuvl.

₃₁Ton puudâ máttááttâspárnááh ettii Jeesusân: »Rabbi, puáđi puurrâđ.» ₃₂Mut sun eeđâi sijjân: »Must lii purrâmâš, mast tij eppeđ tieđe.» ₃₃Máttááttâspárnááh omâttâllii koskânis: »Lii-uv kiinii puáhtám sunjin purrâmâš?» ₃₄Mut Jeesus joođhij: »Muu purrâmâš lii tot, et mun tiävdám jieččân vuolgâtteijee táátu já tiävdám suu pargo loopâ räi. ₃₅Tij etâvetteđ: ’Nelji máánu kalvemist rajâmân.’ Mun eeđâm: Keččâđ tuohu! Valjepiälduh láá jo viälgudâm, valje lii laddâm laijim várás. ₃₆Läijejeijee finnee päälhis jo tääl, sun läijee valje nuvâhánnáá elimân, já kalvee uážžu ilodiđ oovtâst läijejeijein. ₃₇Täst tuálá tiäivás sänivaaijâs: ’Nubbe kalva, nubbe ráájá.’ ₃₈Mun lam vuolgâttâm tii laijiđ, mast tij eppeđ lah uáinám vääivi. Nubeh láá porgâm pargo, mut tij pesâvetteđ raaijâđ sii vääivi heđâlmijd.»

₃₉Maaŋgah tuon Samaria kaavpug ässein uskuu Jeesusân, ko sij kullii nissoon tuođâštmin: »Sun muštâlij munjin puoh, maid mun lam porgâm.» ₄₀Ko samarialiih pottii Jeesus kuuvl, te sij tattuu suu pääcciđ kaavpugân, já sun paasij-uv toho kyevti piäiván. ₄₁Ain eenâb ulmuuh uskuu Jeesusân ko sij kullii suu jieijâs sárnumin, ₄₂já sij ettii nisonân: »Tääl mij ep innig osko tuše tuu sárnum tiet. Mij lep tääl jiejah kuullâm suu já tiettip, et sun tuođâi lii maailm piälušteijee.»

₄₃Kyevti peeivi keččin Jeesus tastoo vuolgij Galilean. ₄₄Sun lâi jieš ettâm, et proofeet iä ane áárvust päikkikuávlustis, ₄₅mut ko sun tääl poođij Galilean, te galilealiih valdii suu ustevlávt vuástá. Sij-uv lijjii iällám áávvudmin Jerusalemist já uáinám, maid Jeesus tobbeen juuhlij ääigi poorgâi.

₄₆Jeesus poođij vuod Galilea Kaanaan, kost sun lâi muttám čääsi viinin. Kapernaumist lâi kunâgâs virgealmai, kiän alge lâi puocâmin. ₄₇Ko sun kuulâi, et Jeesus lâi puáttám Juudeast Galilean, sun vuolgij Jeesus kuuvl já táátui, et taat puáđáččij pyerediđ alge, kote lâi jämimin. ₄₈Jeesus eeđâi sunjin: »Tij eppeđ osko, jis eppeđ uáini tobdostavoid já immâšijd.» ₄₉Mut virgealmai táátui: »Hiärrá, puáđi, ovdilgo muu alge jáámá.» ₅₀Talle Jeesus eeđâi: »Moonâ páikkásâd. Algad iälá.»

Almai oskoi, maid Jeesus sunjin eeđâi, já vuolgij. ₅₁Jo koskân määđhi pottii suu palvâleijeeh oovdeld já muštâlii, et alge lâi puáránâm. ₅₂Almai koijâdij sist, kale ääigi alge lâi puárránškuáttám, já sij ettii: »Jiehti čiččâd tiijme ääigi kumestâs luoštij.» ₅₃Talle eeči iberdij, et tot lâi tábáhtum eidu talle ko Jeesus eeđâi sunjin: »Algad iälá», já sun já ubâ suu táluviehâ uskuu Jeesusân.

₅₄Taat lâi Jeesus nubbe tobdostaho, já sun poorgâi tom ko lâi puáttám Juudeast Galilean.