Viärdádâsah čájádâm saavzâst já lappum silbâruuđâst
1Publikaaneh já eres suddogâsah pottii Jeesus kuuvl vâi sij kulâččii suu. 2Fariseuseh já laavâmáttáátteijeeh huánášii tom já ettii: »Tuot almai tuhhit suddogâsâid já puurâd siiguin.»
3Talle Jeesus muštâlij sijjân viärdádâs:
4»Jis tist kiästnii láá čyeti savzâd já ohtâ tain čááijád ävđin enâmân, te tiäđust-uv sun kuáđá taid ohcelovoovce savzâd, vuálgá čájádâm saavzâ maŋŋaal já ocá, tassaažân ko kávná tom. 5Ko sun kávná saavzâs, sun áávvud já loptee tom ärdeidis oolâ, 6já pááikán puáđidijn sun puávdee ustevijdis já ránjáidis já iätá sijjân: ’Ávudiđ muin! Mun kavnim savzân, mii lâi lappum.’ 7Mun eeđâm tijjân: näävt lii almeest-uv. Oovtâ suddogâsâst, kote taha puárádâs, ávuduvvoo tobbeen eenâb ko ohcelovoovce vanhurskást, kiäin ij lah puárádâs tárbu.
8»Tâi jis nisonist láá love silbâruttâd já sun láppá tain oovtâ, te tiäđust-uv sun cokkit laampu, suopâlist viste lättee já ocá tárkká, tassaažân ko sun kávná tom. 9Já ruuđâ kavnâdijn sun puávdee ustevis já ráánjá nisonijd já iätá: ’Ávudiđ muin! Mun kavnim ruuđâ, mon mun lijjim láppám.’ 10Siämmáánáál, tom mun eeđâm tijjân, Immeel eŋgâleh ávudeh oovtâ-uv suddogâsâst, kote taha puárádâs.»
Tuhledeijeealge já suu viljâ
11Jeesus joođhij:
»Mottoom almast láin kyehti alge. 12Nuorâb sunnust eeđâi iäččásis: ’Eeči, adde munjin muu uási omâduvvâstâd.’ Eeči juovij omâduvvâs oolgij kooskâst. 13Jo muádi peeivi keččin nuorâb čokkij puoh maid omâstij já vuolgij kuhás vieres enâmáid. Tobbeen sun tuhledij ubâ omâduvvâs nyeskis eellim viettimáin. 14Ko sun lâi skiđârdâm puoh, poođij ton enâmân korrâ nelgiäigi, já sun killááškuođij vänivuođâst. 15Talle sun moonâi mottoom ton eennâm almaa palvâlusân, já taat vuolgâttij suu kuáđuttiđ táálus šoovijd. 16Niälgásis sun ličij halijdâm puurrâđ palgošaddoid, šoovij purrâmâš, mut tohkin iä sunjin adelum.
17Talle alge ibbeerdškuođij já jurdâččij: ’Iäččán pargein lii puohâin valjeest purrâmâš, mut mun lam tääbbin niälgumin jaamâs. 18Ij, tääl mun vuálgám iäččán kuuvl já eeđâm sunjin: Eeči, mun lam toohâm sudo almed vuástá já tuu vuástá. 19Mun jiem lah innig ton árvusâš, et mun kočoduum tuu algen. Vääldi muu jieijâd pálhálijd juávkun.’ 20Nuuvt sun vuolgij eejis kuuvl. Ko alge lâi vala kukken, eeči oinij suu ja eeji váimu láđásmij. Sun kaačâi alge oovdeld, solâstij já cummâlij suu. 21Alge eeđâi sunjin: ’Eeči, mun lam toohâm sudo almed vuástá já tuu vuástá. Mun jiem lah innig ton árvusâš, et mun kočoduum tuu algen.’ 22Mut eeči eeđâi palvâleijeidis: ’Viežžâđ huápust pyeremuid pihtâsijd já kárvuttiđ sunjin taid, pieijâđ sunjin suormâs suormân já kammuid juálgán. 23Pyehtiđ pyeidis käälbi já njuovvâđ tom. Tääl mij puurrâp já viettip ávujuhle! 24Muu alge lâi jáámmám mut iällái, sun lâi lappum, mut tääl sun lii kavnum!’ Nuuvt aalgij ilolâš juhle.
25Puárrásub alge lâi olgon piäldust. Ko sun tobbeen macâdijnis lâi aldanmin pääihi, sun kuulâi lávlum, čuojâttem já tánssám. 26Sun čuorvij jieijâs kuuvl oovtâ palvâleijee já koijâdij, mii lâi tábáhtuumin. 27Palvâleijee västidij: ’Viljâd poođij pááikán, já iäččád kočoi njuovvâđ pyeidis käälbi ko finnij suu tiervân maassâd.’ 28Talle puárrásub viljâ suutâi ige halijdâm moonnâđ siisâ. Eeči poođij olgos já hástuttij, 29mut sun västidij: ’Puoh täid iivijd mun lam rooččâm tuu pyerrin jiemge lah ohtiigin kuáđđám tuu pákkum tevdihánnáá. Kuittâg tun jieh lah kuássin adelâm munjin oovtâgin kaaicâ vâi mun puávtáččim juhlođ ustevijdânguin. 30Mut ko taat algaad puátá, taat, kote lii hevâttâm tuu omâduv portoiguin, tun njuovah sunjin pyeidis käälbi!’ 31Eeči västidij sunjin: ’Algaam, tun lah ovttuu muu kulen, já puoh, mii lii muu, lii tuu. 32Mut lâihân tääl šiev suijâ ilodiđ já ávudiđ. Viljâd lâi jáámmám mut iällái, sun lâi lappum mut lii tääl kavnum.’»
