Matteus 3

₁Toi aaigij Juhánâs Kästee poođij já särnidškuođij Juudea ävđinkuávlust: ₂»Jorgettiđ Immeel piälán, tastko oolmij väldikodde lii puáttám alda!» ₃Eidu suu táárgut proofeet Jesaja sääni:

₄Juhánâsâst lâi pajalist kaameelsoovsâpiivtâs já aaleem pirrâ nähkipoovij, já suu purrâmâššân lijjii syeiniaččinjeh já meccimietâ. ₅Suu kuuvl pottii ennuv ulmuuh Jerusalemist, Juudea jyehi kuávlust já puoh Jordan pirrâsist. ₆Sij tubdâstii sudoidis, já Juhánâs kaastij sii Jordanist.

₇Mut ko Juhánâs ooinij ennuv fariseusijd já saddukeusijd puátimin suu kuuvl kästimnáál, sun eeđâi sijjân:

»Tij kyevdišohânâsah! Kii tijjân lii ettâm, et pyehtivetteđ velttiđ puáttee vaje? ₈Rähtiđ heeđâlm, mast tii Immeel piälán jorgettem uáinoo! ₉Elleđ jurde, et pyehtivetteđ jurdâččiđ: ’Lephân mij Áábráhâm párnááh’. Mun eeđâm tijjân: Immeel puáhtá cuvnâđ Áábráhâmân párnáid veik täin keeđgijn. ₁₀Ákšu lii jo pieijum muorâmaddui. Jyehi muorâ, mii ij räähti šiev heeđâlm, njiäidoo já leggistuvvoo tuulân.

₁₁»Mun káástám tii čassijn Immeel piälán jorgeetmân, mut muu maajeeld puátá nubbe, kote lii must vievsâb. Mun jiem tuhhii ubâ suu kamuvvuodduidgin pestiđ. Sun kástá tii Pase Jieggáin já tuuláin. ₁₂Sust lii kieđâst ávskár, já toin sun putteest riihâšiljoos valje. Niisuid sun norá ááitán, mut rumânijd sun puáldá tuulâst, mii ij kuássin čaaskâ.»

₁₃Talle Jeesus poođij Galileast Jordanân vâi Juhánâs kástáččij suu. ₁₄Juhánâs estâlij já eeđâi: »Tun-uvgs puáđáh muu kuuvl? Munhân kolgâččim uážžuđ tust kaastâ!» ₁₅Mut Jeesus västidij sunjin: »Ele tääl estâl. Näävt muoi kalgeen porgâđ, vâi muoi tiävdáččáim Immeel vanhurskes táátu.» Talle Juhánâs mieđâi suu ánumân.

₁₆Ko Jeesus lâi kastum, te sun čyežžilij tállân čääsist. Siämmást almeh lekkâsii, já Jeesus ooinij Immeel Jiegâ luáštádâtmin vuálus tego tuvvááš já asâttâtmin suu oolâ. ₁₇Já oolmijn kullui jienâ: »Taat lii muu rähis Alge, kiäs mun lam mielâstum.»