Adalduvah, rukkoos já váástu anneem
1»Váruttiđ, amas tij pyehtiđ hurskes pargoidâd ulmui uáinusân, mudoi tij eppeđ uážu päälhi tii almalii Eejist.
2»Ko tun išedah kievhijd, te ele kullut tast almolávt tego passaas ulmuuh taheh synagogain já kááđui alne, vâi ulmuuh kijttâliččii sii. Tuođâi: sij laa jo päälhis finnim. 3Ko tun adelah adalduv, te iälus tuu čižetkietâ tieđe, maid tuu uálgiskietâ parga, 4vâi tuu pyeri taho ličij syelimâs. Iäččád, kote meid uáiná tom, mii syeligâsâst lii, paalhâš tuu.
5»Ko tij ruhâdâlvetteđ, te elleđ poorgâ tego passaas ulmuuh. Sij mielâstis čuážžuh já ruhâdeleh synagogain já kááđui ratkuuttuvâin, vâi ulmuuh sii uáináččii. Tuođâi: sij láá jo päälhis finnim. 6Ko tun ruhâdâlah, te moonâ siisâ vistásâd, toopâ uuvsâ já ruhâdâl talle Iäččád, kote lii syeligâsâst. Iäččád, kote uáiná meid tom, mii syeligâsâst lii, paalhâš tuu.
7»Ko tij ruhâdâlvetteđ, te elleđ paaimâ tuušijd tego pähineh, kiäh jurdeh, et Immeel kulá sii, ko sij tuš päimih saanijd. 8Elleđ riemâ sii nálásâžžân. Tii Eeči kale tiätá, maid tij taarbâšvetteđ jo ovdilgo sust leppeđ áánnumgin. 9Ruhâdâllâđ tääl tánávt:
– Mii Eeči, kote lah oolmijn!
Pasottum liävus tuu nommâ.
10Puáđus tuu väldikodde.
Tábáhtus tuu táttu
meid eennâm alne
nuuvtko almeest;
11Adde mijjân onnáá peeivi
mii jyehipiäiválii leeibi.
12Já adde mijjân mii veelgijd addâgâs,
nuuvtko mij-uv adelep addâgâs
toid, kiäh laa mijjân velgus.
13Já ele joođeet mii keččâlusân;
mut peesti mii paast.
14»Jis tij addelvetteđ addâgâs eres ulmuid sii rikkomušâid, te tii almalâš Eeči meid addel tijjân addâgâs. 15Mut jis tij eppeđ adde addâgâs iärásáid, te ij tii Eečigin adde addâgâs tii rikkomušâid.
16»Ko tij vástudvetteđ, te elleđ tovâdât murâšlâžžân tego passaah taheh. Sij taheh jieijâs häämi surgâdin, vâi puohah vissásávt huámášiččii sii váástu anneem. Tuođâi: sij láá jo päälhis finnim. 17Ko tun anah váástu, te vuoidâ vuoptâidâd já poosâ muáđuidâd. 18Talle ulmuuh iä uáini tuu vástudem, pic Iäččád, kote lii syeligâsâst. Iäččád, kote uáiná meid tom, mii lii syeligâsâst, paalhâš tuu.
Immeel já mammona
19»Elleđ nuurâ olssâd tävirijd eennâm oolâ. Tääbbin muocâ já ruostâ pilledeh já suolluuh kiškoh já suáládeh. 20Nuurrâđ olssâd tävirijd aalman. Tobbeen ij muocâ ige ruostâ pilled iäge suolluuh kiško já suáláád. 21Kost tuu aarni lii, tobbeen lii tuu váimu-uv.
22»Čalme lii rummâš lamppu. Jis čaalmad lii tiervâs, te ubâ rumâšâd lii čyevvejum. 23Jis tuu čalmeh láá hyeneh, te ubâ rumâšâd lii sevŋâd. Jis tääl tot čuovâ, mii tust lii, lii sevŋâdâs, maggaar liigin talle sevŋâdâs!
24»Kihheen ij pyevti palvâliđ kyevti hiärá. Jis sun oovtâ räähist, te sun vaijeed nube; jis sun oovtâ ana áárvust, te sun háálbáš nube. Tij eppeđ pyevti palvâliđ sehe Immeel já mammona.
Immeel huolâ anneem
25»Tondiet mun eeđâm tijjân: elleđ muurâšt jieijâd jiegâ tiet, maid tij purâččijd teikâ juvâččijd, elleđ rummâš tiet, tast moin tij tom pivtâstiččijd. Ij-uv jieggâ lah eenâb ko purrâmâš já ruumâš eenâb ko pihtâseh? 26Keččâđ alme luudijd: iä toh kalve iäge niijte iäge čokkii aittijd, já liijká tii almalâš Eeči piämmá taid. Já leppeđhân tij čuuvtij tivrâsuboh ko lodeh! 27Kotemuš tist puáhtá muurâštmáin juátkiđ elimis kukkoduv oovtâgin äälni verd?
28»Maid tij pihtâsijn muurâštvetteđ! Keččâđ niijto raasijd, maht toh šaddeh: iä toh poorgâ iäge pane. 29Mun eeđâm tijjân: ij ubâ Salomo puoh hervâidiskuin lamaš nuuvt pivtâstum ko ohtâ tain. 30Ko Immeel näävt káárvut niijto rääsi, mii onne šadda já itten kárttá uuvnân, te vissâ sun tist ana huolâ, tij uccáá oskovááh?
31»Elleđ tondiet muurâšt: ’Maid mij tääl puurrâp?’ teikâ: ’Maid mij juuhâp?’ teikâ ’Kost mij uážžup pihtâsijd?’ 32Puoh taam pähineh viggeh juksâđ. Tii almalâš Eeči kale tiätá, et tij taarbâšvetteđ puoh taam. 33Uuccâđ vuosmustáá Immeel väldikode já suu vanhurskes táátu, te tijjân adeluvvoo puoh taat-uv. 34Elleđ tondiet muurâšt ittáá peeivist, tastko tot kale ana alnestis huolâ. Jyehi piäiván laa tuárvi murrâšeh.
