Matteus 7

₁»Elleđ tuommii, amas tij tuommiittâttâđ. ₂Maht tij tuommiivetteđ, nuuvt tij-uv kolgâvetteđ tuommiittâttâđ; já maht tij mittedvetteđ, nuuvt tijjân mitteduvvoo. ₃Maht tun uáináh lyene viiljâd čalmeest, mut jieh huámmáš hiirsâ jieijâd čalmeest? ₄Maht tun puávtáh ettâđ viljâsâd: ’Tipte muu väldiđ lyene tuu čalmeest’, ko hirsâ lii jieijâd čalmeest? ₅Tun passaas olmooš! Vääldi vistig hiirsâ jieijâd čalmeest, te esken talle uáináh väldiđ lyene viiljâd čalmeest.

₆»Elleđ adde pennuid tom, mii lii pase, elleđge leggist kässeekeđgijdâd šoovij oovdân, amas toh tuolmâđ taid kozâidis vuálá já volliittiđ já kiškodiđ tii.

₇»Áánnuđ, te tijjân adeluvvoo. Uuccâđ, te tij kavnâvetteđ. Spuáhuttiđ, te tijjân lehâstuvvoo. ₈Tastko jyehi ánnoo uážžu já jyehi occee kávná já juáhážân, kote spuáhut, lehâstuvvoo. ₉Ij vissâ kihheen tist addel algasis keeđgi, ko sun táttu leeibi? ₁₀Teikâ kyevdi, ko sun táttu kyele? ₁₁Jis kerd tij paas ulmuuh mättivetteđ adeliđ párnáidâd puoh puorijd, te čuuvtij eenâb tii almalâš Eeči addel puorijd toid, kiäh tom sust áánuh.

₁₂»Puoh, maid tij haalijdvetteđ ulmuid porgâđ tijjân, porgâđ tij sijjân. Täst lii laahâ já profeteh.

₁₃»Moonnâđ poskis poortâst siisâ. Maaŋgah maneh kubdâ poortâst já kubdâ luodâ mield, mut tot tuálvu káđuttâsân. ₁₄Mon poskâd liigin tot porttâ já kezzi tot luoddâ, mii tuálvu elimân, já tuše häärvih tom kävnih!

₁₅»Váruttiđ puástuprofetijn. Sij puátih tii kuuvl saavzâi tuurhâst, mut siskiibeln sij láá kiškodeijee kuumpih. ₁₆Heđâlmijn tij tubdâvetteđ sii. Ijhân säggišaddoin pyevti uuccâđ viinimuorjijd ige kuobžâraasijn viigunijd. ₁₇Šiev muorâ ráhtá šiev heđâlmijd, hyenes muorâ kiälbuttes heđâlmijd. ₁₈Ij šiev muorâ pyevti rähtiđ kiälbuttes heđâlmijd ige hyenes muorâ šiev heđâlmijd. ₁₉Jyehi muorâ, mii ij räähti šiev heeđâlm, čuáppoo já leggistuvvoo tuulân. ₂₀Heđâlmijn tij tääl tubdâvetteđ sii.

₂₁»Ij juáháš, kote iätá munjin: ’Hiärrá, Hiärrá’, peesâ oolmij väldikoodán. Tohon piäsá tot, kote tiävdá muu almalii Eeji táátu. ₂₂Maaŋgah eteh munjin ton peeivi: ’Hiärrá, Hiärrá! Tuu noomâsthân mij ennustijm, tuu noomâst mij vyejettijm paas jiegâid já tuu noomâst poorgâim maŋgâ vuáimálii tavo.’ ₂₃Mut talle sij uážžuh must vástádâs: ’Mun jiem tuubdâ tii. Moonnâđ meddâl muu kulen, verivuođâ tahheeh!’

₂₄»Juáháš, kote kulá täid muu saanijd já parga toi mield, lii tego jiärmálâš almai, kote huksij vistees källee oolâ. ₂₅Rášuarve poođij, virdeh tulvii já korrâ pieggâ posoi táálu njeigâ, mut tot ij viirrâm, tastko tot viste lâi rahtum källee oolâ.

₂₆»Juáháš, kote kulá täid muu saanijd mut ij poorgâ toi mield, lii tego tuávhis almai, kote huksij vistees čunnui oolâ. ₂₇Rášuarve poođij, virdeh tulvii já korrâ pieggâ posoi táálu njeigâ, já tot viirâi puohrâkkân.»

₂₈Ko Jeesus lâi joskâm sárnumist, te aalmugjuávhuh lijjii hiämáskâm suu máttááttâsâst. ₂₉Sun máttááttij tego tot, kiäs lii adelum väldi, ij tego laavâmáttáátteijeeh.