Markus 13

₁Ko Jeesus lâi vyelgimin temppâlist, te mottoom suu máttááttâspárnáin eeđâi: »Máttáátteijee, keejâ! Magareh keeđgih, maggaar rakânâs!» ₂Jeesus västidij: »Keejâ tääl täid váldálijd rakânâsâid. Puoh kiškoduvvoo enâmân, teehin ij pääsi keđgi keeđgi oolâ.»

₃Ko Jeesus talle čokkái Oljovääri alne temppâl puotâ, te koijâdellii Piättár, Jáákkup, Juhánâs já Andârâs, kiäh lijjii suin: ₄»Kuás tot puoh tábáhtuvá? Muštâl mijjân, mii lii merkkân tast, et ton olášum lii alda?

₅Jeesus sárnuškuođij sijjân:

»Váruttiđ, et kihheen ij čájádit tii. ₆Maaŋgah puátih muu noomâst. Sij eteh: ’Mun tot lam’, já sij čájáditeh maaŋgâid. ₇Ko tij kulâvetteđ taištâlemjienâid já saavâid soođijn, te elleđ paalaask. Nuuvt kalga keevvâđ, mut tot ij vala meerhâš loopâ. ₈Aalmug čyežžil aalmug vuástá já väldikodde väldikode vuástá. Jyehi saajeest láá eennâmtuárgástusah, já ulmuuh niälguh. Taat lii šoddâdemtuuskij algâ.

₉Anneeđ vaarâin! Sij tuálvuh tii riähtán já huškoh tii synagogain. Eennnâmhiärái já kunâgâsâi oovdân tij karttâvetteđ muu tiet, tuođâštâssân sijjân. ₁₀Mut ovdil tom kalga evangelium kulluuttuđ puoh almugáid. ₁₁Ko sij tuálvuh tii virgeomáháid, te elleđ muuneeld muurâšt maid tij kolgâččijd sárnuđ. Sárnuđ taid saanijd, moh tijjân ton puudâst adeluvvojeh. Talle tij eppeđ sáárnu, pic Pase Jieggâ.

₁₂Viljâ addel viiljâs jämimân, eeči päärnis, já párnááh pajaneh vanhimijdis vuástá já koddeh sii. ₁₃Puohah vajedeh tii muu noomâ tiet, mut tot, kote killáá loopâ räi, piäluštuvvoo.

₁₄»Ko tij uáinivetteđ hiävu kovlottetteevuođâ čuážžumin togo, kost tot ij koolgâ čuážžuđ – huámášus lohhee taam! – talle kalgeh puoh Juudeast ässeeh patâriđ vaarij oolâ. ₁₅Tot, kote lii káátu alne, ij koolgâ njeeijâđ viežžâđ maiden tálustis, ₁₆ige tot, kote lii piäldust, koolgâ maccâđ viežžâđ kiessâmmáccuhis. ₁₇Vuoi toh, kiäh toi peeivij láá párnáá vuástá teikâ njomâtteh! ₁₈Ruhâdâllâđ, amas tot tábáhtuđ tälviääigi, ₁₉tastko toi peeivij šaddeh tagareh atâštâsâh, moh iä lah lamaš luomâkode aalgâst, Immeel sivnedempargo rääjist onnáá peeivi räi, iäge koolgâ kuássin šoddâđ. ₂₀Jis Hiärrá ij liččii uánidâm tom ääigi, ohtâgin olmooš ij šeštuuččii. Mut sii tiet, kiäid sun lii valjim, sun lii uánidâm tom ääigi.

₂₁»Jis kiinii iätá tijjân: ’Tääbbin lii Messias’, teikâ: ’Keejâ, Messias lii tyebbin’, elleđ osko. ₂₂Tastko puástumessiasah já puástuprofeteh iteh, já sij pargeh stuorrâ merkkâtavoid já imâšijd, nuuvt et sij čájáditeh, jis máhđulâš, väljejum ulmuid. ₂₃Anneeđ vaarâin. Mun lam oovdeld almottâm tijjân puoh.

₂₄»Mut toi peeivij, ton atâštâs maŋa, peivi siävŋán ige máánu adde čuovâs, ₂₅tääsnih kaččeh almeest já oolmij vyeimih lihâttuvvojeh. ₂₆Talle sij uáinih Ulmuu Alge puátimin poolvâi kooskâst stuorrâ vyeimistis já kirkkâdvuođâstis, ₂₇já talle sun vuolgât eŋgâlijdis já čuákkee väljejum ulmuid neelji čievâst, eennâm roobdâst alme roobdâ räi.

₂₈»Oppâđ viärdádâsâst, mon viigunmuorâ fáálá: ko ton uáksi iälláá já rähtiskuát loostâid, te tij tietivetteđ, et keesi lii alda. ₂₉Siämmáánáál, ko tij uáinivetteđ taam tábáhtuumin, tij tietivetteđ, et tot äigi lii alda, aaibâs uksânjäälmist. ₃₀Tuođâi: taat suhâpuolvâ ij lappuu ovdilgo puoh taat tábáhtuvá. ₃₁Alme já eennâm láppojeh, mut muu säänih iä lappuu. ₃₂Mut tom peeivi já puudâ ij tieđe ohtâgin, iä eŋgâleh almeest ige ubâ Algegin, ij ohtâgin eereeb Eeči.

₃₃»Váruttiđ, kocceeđ, tastko tij eppeđ tieđe, kuás tot äigi puátá. ₃₄Ko almai maađhâš vieres enâmáid já táálust vyelgidijnis addel jieškote-uv palvâleijei jieijâs pargo já ovdâsvástádâs, te uksâvaavtâ sun koččo kocceeđ. ₃₅Kocceeđ tondiet, tastko tij eppeđ tieđe, kuás táálu hiärrá puátá: ehidist vâi koskiijâ, käniorráás piškomääigi vâi iđedist. ₃₆Sun puátá fakkist ervidhánnáá – váruttiđ tondiet, amas sun kavnâđ tii uáđimin. ₃₇Maid mun eeđâm tijjân, tom mun eeđâm puohháid: kocceeđ!»