Markus 14

₁Pessijááh já suvrodhánnáá leeibi juhle lijjii kyevti peeivi keččin. Ollâpaapah já laavâmáttáátteijeeh smiettii, magaráin juonáin sij uážuččii Jeesus kiddâ, nuuvt et sij puávtáččii koddeđ suu. ₂»Ij kuittâg koskân juhle», sij ettii, »amas aalmug stuimáskiđ.»

₃Ko Jeesus lâi Betaniast, puurâdmin spiitaal puoccâm Simmoon táálust, te poođij toho nissoon, kiäst lâi alabasterputtâlist puigâ, uáli tivrâs nardusoljo. Sun cuovkkij puttâl já kulgâttij oljo Jeesus uáiván. ₄Motomeh huánášii suu já ettii kuoimijdis: »Maggaar vuoidâs häskidem! ₅Tom lâi pyehtiđ vyebdiđ já adeliđ ruuđâid kievhijd. Ličij tast uážžum aainâs-uv kulmâčyet denarid.» Sij laittii nissoon äŋgiris sanijguin.

₆Mut Jeesus eeđâi: »Tipteđ suu leđe. Mondiet tij nievridvetteđ suu mielâ? Sun poorgâi munjin šiev tavo. ₇Kievhih tist láá ovttuu jieijâd kulen, já tij pyehtivetteđ toohâđ sijjân pyere kuás haalijdvetteđ, mut mun jiem lah tist ovttuu. ₈Sun poorgâi mon puovtij. Sun vuoidâi muuneeld muu rummâš hävdidem várás. ₉Tuođâi: jyehi kuávlust maailmist, kost ihenis evangelium saahâ kulluuttuvvoo, šaddeh mušteđ meid taan nissoon já muštâliđ, maid sun poorgâi.»

₁₀Juudas Iskariot, kyehtnubálov máttááttâspárnáást ohtâ, moonâi ollâpaapâi kuuvl Jeesus kävildem várás sijjân. ₁₁Sij ilosmii tast já lopedii adeliđ sunjin ruuđâ. Juudas uusâi tääl vuovâs tilálâšvuođâ vâi pesâččij toimâttiđ Jeesus sii kieđáid.

₁₂Suvrodhánnáá leeibi juhle vuosmuu peeivi, kuás läävejii njuovvâđ pessijâšsaavzâ, máttááttâspárnááh koijâdii Jeesusist: »Kost tun halijdah puurrâđ pessijâšpurrâmâš? Kuus mij moonnâp valmâštiđ tom?» ₁₃Jeesus vuolgâttij máátkán kyehti máttááttâspárnáá já eeđâi: »Mannee kaavpugân. Tobbeen tunnuu oovdeld puátá almai, kote kuáddá čäciruho. Čuávvoo suu, ₁₄já kuus sun mana, ettee tobbeen táálu išedân näävt: ’Máttáátteijee koijâd, kost lii suu várás viste, mast sun puáhtá puurrâđ pessijâšpurrâmâš máttááttâspárnáidiskuin.’ ₁₅Iššeed čáittá tunnui pajekeerdist stuorrâ loonjâ, mast láá puoh uárnejum valmâšin. Valmâštee toho mijjân purrâmâš.» ₁₆Máttááttâspárnáákyevtis vuolgijn máátkán já poođijn kaavpugân. Puoh tábáhtui nuuvt ko Jeesus lâi sunnui ettâm, já suoi valmâštáin pessijâšpurrâmâš.

₁₇Ehidist Jeesus poođij toho kuovttijnnubáluvvijn máttááttâspárnáin. ₁₈Ko sij lijjii čokánâm purâdiđ, te Jeesus eeđâi: »Tuođâi: ohtâ tist käävild muu – almai, kote puurâd muin.» ₁₉Máttááttâspárnááh hirmástuvvii já koijâdâlškuottii: »Ama jiem mun?» ₂₀Jeesus västidij sijjân: »Ohtâ tist kyehtnubálohásist, almai, kote porá muin siämmáá litteest. ₂₁Ulmuu Alge vuálgá meddâl eidu nuuvt ko lii čallum, mut vuoi tom, kiäst šadda Ulmuu Alge kävildeijee! Tom ulmui ličij pyereeb, et sun ij liččii šoddâmgin.»

₂₂Purâdem ääigi Jeesus vaaldij leeibi, sivnedij, tojâlij já adelij tom máttááttâspárnáidis já eeđâi: »Väldiđ, taat lii muu ruumâš.» ₂₃Talle sun vaaldij kaalhâ, kiijtij Immeel já adelij sijjân, já sij puohah juhhii tast. ₂₄Sun eeđâi: »Taat lii muu vorrâ, lito vorrâ, mii kulgâttuvvoo puohâi peeleest. ₂₅Tuođâi: mun jiem innig smakkii viiniponnjoos adalduv ovdil ko ton peeivi, kuás mun juuvâm uđđâ viini Immeel väldikoddeest.»

₂₆Kijttosaalmâ veisidem maŋa sij vuolgii Oljováárán. ₂₇Jeesus eeđâi sijjân: »Tij puohah luopâvetteđ must, tastko čallum lii: ’Mun časkam paimân enâmân, já saavzah šaddeh piäđgui.’ ₂₈Mut ko mun lam jämimist pajanâm, te mun moonâm tii ovdiibeln Galilean.» ₂₉Talle Piättár eeđâi sunjin: »Veikkâ puoh iäráseh luovâččii tust, mun jiem.» ₃₀Jeesus västidij: »Tuođâi: onne, taan iijâ, ovdilgo käniores kuohtii piško, tun kulmii kiäldáh muu.» ₃₁Mut Piättár tähidij ain-uv nanosubbooht: »Veikkâ mun kolgâččim jäämmiđ tuin, mun jiem kuássin tuu kieldi.» Siämmáá tähidii puohah iäráseh-uv.

₃₂Sij pottii Getsemane-nommâsâš sajan, já Jeesus eeđâi máttááttâspárnáid: »Pääcciđ tij taas ton puudân ko mun ruhâdâlâm.» ₃₃Piättár, Jáákkup já Juhánâs sun vaaldij fáárun. Tääl sun tubdâškuođij palo já atâštâs. ₃₄Sun eeđâi sijjân: »Lam toske vääldist, jäämmim toske. Vyerdiđ täst já kocceeđ.» ₃₅Sun moonâi váhá olgoláá, leggistâđâi enâmân já ruhâdâlâi, vâi tot puddâ, jis máhđulâš, monâččij sust lappâd. ₃₆Sun eeđâi: »Abba, Eeči, puoh lii tunjin máhđulâš. Vääldi taam kaalhâ must meddâl. Ij kuittâg muu táátu mield, mut tuu.»

₃₇Talle sun poođij maassâd já kuáhtái máttááttâspárnáid uáđimin. Sun eeđâi Piätárân: »Simmoon, uáđáh-uv tun? Jieh-uv ubâ uánihis ääigi vaijaam kocceeđ? ₃₈Kocceeđ já ruhâdâllâđ, amas šoddâđ kivsádâsân. Táttu ulmust lii, mut luándu lii hiäju.»

₃₉Sun moonâi oppeet olgoláá já ruhâdâlâi siämmái sanijguin. ₄₀Macâdijn sun oppeet kuáhtái máttááttâspárnáid uáđimin, tastko naver lâi tediškuáttám lussâdávt sii čoolmijd. Sij iä tiättám, maid västidiđ sunjin. ₄₁Kuálmád kerd puáđidijn Jeesus eeđâi sijjân: »Ain-uv tij uáđivetteđ já vuoiŋâstvetteđ? Puoh lii čielgâs. Puddâ lii puáttám. Ulmuu Alge adeluvvoo suddogâsâi kieđáid. ₄₂Čyežžiliđ, tääl mij vyelgip! Muu kävildeijee lii jo alda.»

₄₃Jeesus vala sárnudijn toho poođij Juudas, kyevtnubálov máttááttâspárnáást ohtâ, já suin poođij miehijguin já karbâiguin viärjuttum olmoošjuávkku, mon ollâpaapah, laavâmáttáátteijeeh já puárásumoseh lijjii vuolgâttâm. ₄₄Jeesus kävildeijee lâi sooppâm almaiguin meerhâst: »Tot lii tot almai, kiäm mun cummiim. Väldiđ suu kiddâ já vahtiđ suu tárkká meddâl tuálvudijn.» ₄₅Ko sun poođij, te sun moonâi njuolgist Jeesus kuuvl, já eeđâi: »Rabbi!», já cummâlij suu. ₄₆Almaah valdii tállân Jeesus kiddâ já fäŋgejii suu. ₄₇Talle ohtâ almai, kote lâi tast, ruttij miehis tuupâst já čooskij ollâpaapâ palvâleijee nuuvt et sust luovânij pelji.

₄₈Jeesus jorgettij almaijuávhu kulij já eeđâi: »Tijhân leppeđ vuálgám tegu riävvár vuástá! Miehih já kaarbah kieđâin tij puátivetteđ muu faŋgiđ. ₄₉Mun lam jyehi peeivi tii uáinidijn máttááttâm temppâlist, eppeđge tij lah váldám muu kiddâ. Mut čalluuh kolgii olášuđ.» ₅₀Talle toh, kiäh lijjii Jeesusáin, kuođđii suu já patârii.

₅₁Jeesus fáárun lâi vuálgám nuorâ almai, kiäst ij lamaš pajalist eres ko piellivâspiivtâs. Sun valdui kiddâ, ₅₂mut almai peesâi luovâs pihtâsistis já patârij piättáá.

₅₃Jeesus tolvui ollâpaapâ kuuvl, ja puoh alemuuh paapah sehe puárásumoseh já laavâmáttáátteijeeh čokkânii toho. ₅₄Piättár čuávui Jeesus mottoom määđhi keččin ollâpaapâ lane šiljo räi. Sun čokánij palvâleijei juávkun já liegâdâlâi tuulâ paštust.

₅₅Ollâpaapah já ubâ rääđi uccii tuođâštus Jeesus vuástá vâi pesâččii surmiđ suu. Taggaar ij kuittâg kavnum. ₅₆Maaŋgah kale tuođâštii kieleestmáin suu vuástá, mut tuođâštmeh lijjii ruossâlâsah. ₅₇Talle lävkkejii oovdân motomeh, kiäh oovdânpuohtii suu vuástá puástutuođâštus: ₅₈»Mij lep kuullâm suu etâmin: ’Mun pieđgiim taam ulmui rähtim temppâl já huksiim kuulmâ peeivist uđđâ temppâl, mon ulmuuh iä lah ráhtám.’» ₅₉Mut taamgin ääšist tuođâštusah iä lamaš olmânáál.

₆₀Talle ollâpappâ čyežžilij, lavkkij oovdân já koijâdij Jeesusist: »Jieh-uv tun ollágin västid sii sujâttâssáid?» ₆₁Mut Jeesus oroi joskâ, sun ij västidâm maiden. Talle ollâpappâ koijâdij sust uđđâ koččâmâš: »Lah-uv tun Messias, alestum Immeel alge?» ₆₂»Lam», västidij Jeesus, »já tij uážžuvetteđ uáiniđ Ulmuu Alge čokkáámin Vyeimi uálgispeln já puátimin alme poolvâi kooskâst.» ₆₃Talle ollâpappâ kiškettij pihtâsis já eeđâi: »Maid tuođâšteijeid mij innig tarbâšep! ₆₄Kuulâidhân, maht sun pilkkedij Immeel. Maid tij iävtutvetteđ?» Puohah lijjii siämmáá mielâst tast, et sun lâi sujâlâš já ánsášij jäämmim. ₆₅Motomeh čulgâškuottii suu oolâ. Sij lovdii suu muáđuid, čurmii suu já ettii: »Profetist tääl!» Vaavtah-uv huškuu suu.

₆₆Piättár lâi vyellin šiljoost. Mottoom ollâpaapâ pijgá poođij toho, ₆₇já ko sun ooinij Piättár liegâdâlmin, te sun keejâi taam já eeđâi: »Tun-uv lijjih tuoin nasaretlijn, tuoin Jeesusáin.» ₆₈Mut Piättár kieldij tom. »Mun jiem ollágin ibbeerd mast tun sáárnuh», sun eeđâi já moonâi olgos ovdâšiiljon. ₆₉Nieidâ ooinij suu uđđâsist já eeđâi tobbeen orroo ulmuid: »Taat almai kulá siämmáá juávkun.» ₇₀Oppeet Piättár kieldij. Mut forgâ eres-uv ulmuuh tobbeen ettii sunjin: »Tun kuulah vissásávt siämmáá juávkun, lahhân tun-uv galilealâš.» ₇₁Piättár saddiittâlškuođij já vuárnui: »Mun jiem tuubdâ tom almaa, mast tij sárnuvetteđ.» ₇₂Siämmást käniores piškoi, nube keerdi. Piättár muuštij, maid Jeesus lâi sunjin ettâm: »Ovdilgo käniores kuohtii piško, tun kulmii muu kiäldáh.» Sun čiäruškuođij.