Markus 15

₁Tállân iđedist ollâpaapah tollii ráđádâllâm puárásumosijguin já laavâmáttáátteijeiguin, já talle rääđi toovâi miärádâs: Jeesus čonnui ooráid, tolvui meddâl já luovâttui Pilatusân.

₂Pilatus koijâdij Jeesusist: »Lah-uv tun juudalij kunâgâs?» »Tun tom ettih», Jeesus västidij. ₃Ollâpaapah oovdânpuohtii tääl maaŋgâid sujâttâsâid suu vuástá, ₄ja Pilatus koijâdij: »Jieh-uv tun ollágin västid? Tun kuulah, moin puoh aašijn sij tuu sujâtteh.» ₅Mut Jeesus ij innig västidâm maiden. Taat imâštutij Pilatus.

₆Eennâmhiärrá ain luoštij luovâs oovtâ faaŋgâ juhle ääigi, tom kiäm aalmug piivdij. ₇Ton tove lijjii fäŋgejum stuimedeijeeh, kiäh stuime ääigi lijjii morhedâm. Sii juávhust lâi Barabbas-nommâsâš almai. ₈Pilatus kuuvl čokkânij tääl olmoošjuávkku, mii piivdij suu toohâđ nuuvt ko suu vyehi lâi. ₉Pilatus koijâdij: »Haalijdvetteđ-uv tij, et mun luáštám tijjân juudalij kunâgâs?» ₁₀Sun uáináh iberdij, et ollâpaapah lijjii tuše kađâšvuođâ keežild kuáđđám Jeesus suu kieđáid. ₁₁Ollâpaapah kuittâg kihtâlii aalmug pivdeđ, et sun luáštáččii pyerebeht-uv Barabbas. ₁₂Vala Pilatus koijâdij almugist: »Maid mun talle toovâm taas, kiäm tij koččovetteđ juudalij kunâgâssân?» ₁₃Sij čuorvuu: »Riistânnavlii!» ₁₄»Maid paaid sun lii toohâm?» koijâdij Pilatus. Mut sij čuorvuu ain korrâsubbooht: »Riistânnavlii tom almaa!»

₁₅Vâi aalmug ličij tutâvâš, Pilatus luoštij Barabbas luovâs, mut Jeesus sun cäimittij já luovâttij riistânnavlimnáál.

₁₆Suáldátteh tolvuu Jeesus eennâmhiärá haldâttâhlane sisšiiljon já kuččuu čuákán ubâ suátiviehâuásáduv. ₁₇Sij pieijii suu ärdei oolâ purppurruopsis kiessâmmááccuh já punnjii säggišaddoin ruuvnâ, mon sij stellejii suu uáiván. ₁₈Talle sij tiervâttâlškuottii suu: »Tiervâ, juudalij kunâgâs!» ₁₉Sij huškuu suu ruáhusobbijn uáiván, čulgii suu oolâ já luáštádâttii idduidis oolâ já komerdii suu. ₂₀Ko sij lijjii ääigis pilkkedâm, te sij nuollii sust purppurmááccuh, kárvuttii suu jieijâs kárvoid já vuolgii jođettiđ suu meddâl riistânnavlimnáál.

₂₁Jeesus riistâ kyeddiđ sij páguttii mottoom lappâdjottee, kyrenelâš Simmoon, Aleksandros já Rufus eeji, kote lâi puátimin kaavpugân. ₂₂Sij tolvuu Jeesus sajan, mon nommâ lii Golgata, ađai Uáiviskáálžusaje. ₂₃Sij fallii sunjin viini, moos lâi sehhejum mirha, mut sun ij váldám tom vuástá. ₂₄Talle sij riistânnävlejii suu já juohhii koskânis suu káárvuid vuárbádmáin, ađai pirco leggistmáin, et kii maid uážui.

₂₅Lâi kuálmád tijme, ko sij riistânnävlejii suu. ₂₆Puohâi uáinimnáál lâi čallum suu tuámu suijâ: »Juudalij kunâgâs». ₂₇Siämmáá tove sij riistânnävlejii riävvárkuáhtá, nube suu uálgispel já nube suu čižetpel. [ ₂₈Näävt olášuvvii čallui säänih: »Sun luhhui rikolij juávkun.»]

₂₉Lappâdjotteeh pilkkedii suu. Uáivis nuáigutmáin sij ettii: »Na nuuvt, tunhân pastah pieđgiđ temppâl já huksiđ tom uđđâsist kuulmâ peeivist. ₃₀Piälušt tääl jieččâd, puáđi vuálus riistâst!» ₃₁Ollâpaapah servii sij-uv pilkkediđ oovtâst laavâmáttáátteijeiguin. Sij sarnuu koskânis: »Iärásijd sun kale lii išedâm, mut jieijâs sun ij paste išediđ. ₃₂Puáđus sun tääl riistâst vuálus – Messias, Israel kunâgâs! Ko mij tom uáinip, te mij oskop sunjin.» Meid tot kyevtis, kiäh láin riistânnävlejum suin oovtâst, pilkkedáin suu.

₃₃Koskâpeeivi, kuuđâd tiijme ääigi, poođij sevŋâd ubâ eennâm oolâ, já tot piištij oovcád tiijme räi. ₃₄Oovcád tiijme ääigi Jeesus čuárvui korrâ jienáin: »Elohi, Elohi, lema sabaktani?» Tot lii: Imelâm, Imelâm, mondiet tun hilguh muu? ₃₅Motomeh, kiäh lijjii tast, kullii taam já ettii: »Kuullâđ, sun čuárvu Elia.» ₃₆Mottoom eelij huápust njuoskâdmin sape suvreviinin, piejâi tom suábbikiäčán já faalâi tast juhâmuš já eeđâi: »Keččâp te tääl, puátá-uv Elia väldiđ suu vuálus.» ₃₇Mut Jeesus čuárvui korrâ jienáin já adelij jiegâs.

₃₈Talle temppâl ovdâloovdâ rottâsij kyehtin pittán, paijeen aaibâs vuálus. ₃₉Ko čyeđeuáivalmai, kote čuážui ton puotâ, ooinij Jeesus jämimin tánávt, sun eeđâi: »Taat almai tuođâi lâi Immeel Alge!»

₄₀Ton saajeest lijjii meiddei nisoneh mottoom määđhi keččin taam keejâdmin. Sii juávhust lijjii Magdala Máárjá, nubbe Máárjá, kote lâi nuorâb Jáákkup já Joses enni, sehe Salome. ₄₁Jo Galileast sij lijjii jottáám Jeesus fáárust já palvâlâm suu. Tobbeen lijjii maaŋgah eres-uv nisoneh, kiäh lijjii puáttám Jerusalemân Jeesus fáárust.

₄₂Aalgij leđe jo veigi; lâi sabbaat áptu, valmâštâspeivi. ₄₃Talle poođij toos arimatialâš Joovsep, áárvust oonnum rääđi jeessân, kote sun-uv vuordij Immeel väldikode. Sun ruokâsmitij mielâs, moonâi Pilatus savváid já piivdij Jeesus rummâš. ₄₄Pilatus hiämáskij, ko kuulâi, et Jeesus lii jo jáámmám. Sun kočottij čyeđeuáivalmaa jieijâs kuuvl já koijâdij, lâi-uv Jeesus tuođâi jo jáámmám. ₄₅Ko čyeđeuáivalmai nonnij ääši, sun mieđâi luovâttiđ rummâš Joovsepân. ₄₆Joovsep oostij piellivâspihtâs, vaaldij Jeesus riistâst, kiesâi suu pihtâsân já piejâi suu valmâš källeeháávdán. Hävdivuovdâ uuvsâ oovdân sun vierâttij keeđgi. ₄₇Magdala Máárjá já Joses enni Máárjá keijáin, kuus Jeesus hävdidui.