Markus 4

₁Motomin Jeesus vuod máttááttij jäävri riddoost. Suu pirrâ čokkânii nuuvt ennuv ulmuuh, et sun sirdâšui kárbás. Sun čokkái jäävri alne kárbást, já olmoošjuávkku lâi riddoost. ₂Sun máttááttij sijjân maŋgâ ääši viärdádâsâiguin.

Näävt sun sii máttááttij: ₃Kuullâđ! Almai vuolgij kalveđ. ₄Já ko sun koolvij, te keevâi nuuvt, et uási siemânijn koočâi luoddâpiällás, já lodeh pottii já purrii jiivijd. ₅Uási koočâi källeesajan, mast jivvijd ij lamaš ennustkin eennâm. Toh ittii kale jotelávt, tastko eennâm ij lam kieŋŋâl, ₆mut ko piäiváš pajanij, te iđoh kuškii pakkâ šooŋâst, tastko tain iä lamaš ruottâseh. ₇Uási vuod koočâi čuággooraasij kooskân, já čuággoorääsih šoddii já lovdii jiivijd, ige tast finnim valje. ₈Mut eres jiveh koččii šiev enâmân. Toh ittii, šoddii já adelii valje, mii kulmâlov, mii kutlov, mii čyeti jivveed.» ₉Já sun eeđâi: »Kiäst láá peeljih, tot kulos!»

₁₀Ko Jeesus lâi pááccám ohtuu kyevtnubálov máttááttâspárnáin já eres ulmuiguin kiäh lijjii suin, te taah koijâdellii sust, maid viärdádâsah merhâšii. ₁₁Sun eeđâi sijjân: »Tijjân lii uskum Immeel väldikode syeligâsvuotâ, mut tuoh ulguupiälásiih kuleh puoh tuše viärdádâsâiguin,

₁₃Tastoo Jeesus eeđâi: »Jis tij eppeđ ibbeerd taam viärdádâs, te maht tij talle ibbeerdvetteđ eres viärdádâsâidgin? ₁₄Kalvee kalva sääni. ₁₅Luoddâpiällás kolvum siemâ uáivild ulmuid, kiäh kuleh sääni mut kiäin Sáttán, tállân ko tot lii sijjân kolvum, puátá väldiđ tom meddâl. ₁₆Kalvem källeesajan vuod kovvee taid, kiäh sääni kulâdijnis väldih tom iloin vuástá ₁₇mut kiäh killájeh tuše uánihâš áigáá, tastko sist váiluh ruottâseh. Ko puátá atâštâs teikâ tuárrum sääni keežild, te sij lyepih forgâ. ₁₈Tastoo lii siemâ, mii kolvui čuággooraasij kooskân. Tot uáivild taid, kiäh kuleh sääni ₁₉mut kiäin sääni ij pyevtit šado, tastko taan maailm huolah já rigesvuođâ piätulâš hokâttâsah já eres mielâtavoh uážžuh sist saje já avkkâdeh sääni. ₂₀Mut kalvem šiev enâmân kovvee ulmuid, kiäh kuleh sääni já väldih tom vuástá. Sij pyevtitteh šado, kulmâlov, kutlov teikâ čyeti jivveed.»

₂₁Jeesus eeđâi: »Ij suigin lamppu tađe várás puohtuu viistán, et tot pieijuuččij kääri vuálá teikâ seeŋgâ vuálá? Laampujuálgánhân tot piäijoo! ₂₂Puoh čiehhum ääših láá tuše tondiet, et toh puohtuuččii uáinusân, syelimâs ääših tuše tondiet, et tot šodâččij almolâžžân. ₂₃Jis kiästnii tist láá peeljih, tot kulos.» ₂₄Já sun lasettij: »Huámmášiđ, maid tij kulâvetteđ. Toin naalijn ko tij mittedvetteđ, nuuvt kalga tijjân mitteduđ, vala ton paijeel-uv. ₂₅Kiäst lii, toos adeluvvoo, mut kiäst ij lah, tast váldoo meddâl tot-uv, mii sust lii.»

₂₆Jeesus eeđâi: »Tággáár lii Immeel väldikodde. Almai kalva siemmân enâmân. ₂₇Sun uáđá iijâs já koccáá ain uđđâ piäiván, já siemâ itá já šadda, ige sun tieđe, maht. ₂₈Eennâm šoddâd šado aaibâs jiešmeidlist, vistig veerdi, tastmaŋa jiveuáivi, talle tievâ jiivijd jiveuáiván. ₂₉Já tállân ko valje lii laddâm, te sun vuolgât siirpis, tastko laijimäigi lii puáttám.»

₃₀Vala Jeesus eeđâi: »Moos mij verdidiččijm Immeel väldikode? Moin viärdádâssáin mij kuvviiččijm tom? ₃₁Tot lii tego siinapsiemâ. Ko siinapsiemâ kalvoo enâmân, te tot lii ucemus puoh maailm siemânijn, ₃₂mut ton ito paijaan enâmist já šadda puoh muorâkäärdi šaddoin stuárráámussân. Tot šoddâd nuuvt stuorrâ oovsijd, et alme lodeh pyehtih rähtiđ piervâlis ton suoivui.»

₃₃Maaŋgâi tágárij viärdádâsâiguin sun kulluuttij ulmuid sääni, tađe mield ko sij tom puohtii iberdiđ. ₃₄Viärdádâsâittáá sun ij sijjân sárnum, mut máttááttâspárnáidis sun čielgij puoh, ko sij lijjii koskânis.

₃₅Siämmáá peeivi ko lâi viäigum, Jeesus eeđâi máttááttâspárnáidis: »Tääl mij vyelgip tovnbel jäävri.» ₃₆Máttááttâspárnááh vuolgâttii vievâ meddâl já lävkkejii kárbás, mast Jeesus jo čokkái. Eres-uv kárbáh vuolgii suu fáárun. ₃₇Fakkist pajanij korrâ šuármu já pááruh čoskii kárbás, nuuvt et tot masa tievâi. ₃₈Mut Jeesus tuše oođij kárbá moonjiikeččin uáivvuáláá vuástá. Máttááttâspárnááh cuvnii suu já ettii: »Máttáátteijee, jieh-uv tun uáini, mij hevvânep!» ₃₉Talle sun pajanij, nuttâlij piegâ já kočoi meerâ: »Josijduu, oro joskâ! Pieggâ josijdui, jeđe kolkkij aaibâs. ₄₀Jeesus eeđâi sijjân: »Mondiet tij nyevt polâvetteđ? Ij-uv tist valagin lah osko?» ₄₁Talle stuorrâ palo väldidij sii já sij koijâdellii kyeimistis: »Mii almaid taat ubâ liigin? Suuhân tottâleh pieggâ já pááruh-uv.»