Markus 6

₁Jeesus vuolgij tobbeen já poođij kuátukaavpugsis, já máttááttâspárnááh lijjii suin. ₂Ko poođij sabbaat, te sun máttátškuođij synagogast, já suu kuldâldijnis maaŋgah hiämáskii já koijâdellii: »Kost sun lii finnim taam puoh? Mii lii taat vijsesvuođâid, mii sunjin lii adelum? Moh vyeimitavoid láá tuoh, moh tábáhtuveh suu kieđâi peht? ₃Ij-uv taat lah tot huksimalmai, Máárjá alge, Jáákkup, Joses, Juudas já Simmoon viljâ? Tääbbin suu uábih-uv ääsih, mii koskâvuođâst.» Näävt sij edduu sunjin.

₄Jeesus eeđâi sijjân: »Kosten ij lah proofeet nuuvt ucášum ko kuátukaavpugstis, jieijâs huolhij koskâvuođâst já jieijâs pääihist.» ₅Nuuvtpa sun ij puáhtám toohâđ tobbeen oovtâgin vyeimitavo; tuše motomijd pyecceid sun pyeredij nuuvt, et piejâi kieđâs sii oolâ. ₆Ulmui epiosko hiämáskitij suu. Te sun juuđij siijdâst siijdân já máttááttij.

₇Jeesus kočoi kyehtnubáloh máttááttâspärnid jieijâs kuuvl já vuolgâtškuođij sii máátkán. Sij kolgii vyelgiđ parâluvâi, já sun adelij sijjân vääldi vuájálittiđ nyeskis jiegâid. ₈Sun kieldij sii väldimist fáárun muide ko suábi: ij leeibi, ij laavhâ ige ruuđâ puáhánjân. ₉Sandaalijd sij ožžuu väldiđ mut iä kárvuttiđ paijaalsis kyehti pääiđi. ₁₀Já sun eeđâi sijjân: »Mon táálun tij puátivetteđgin, pääcciđ aassâđ toos vyelgimâd räi. ₁₁Jis ulmuuh iä mottoom saajeest vääldi tii vuástá já kuldâl, te vyelgiđ tobbeen já savŋeliđ koovjâid juolgijnâd. Taat kalga leđe tuođâštus sii vuástá.»

₁₂Nuuvt máttááttâspárnááh vuolgii máátkán já kulluuttii, et puohah kolgii jorgettiđ Immeel piälán. ₁₃Sij vuájálittii maŋgâ paas jiegâ sehe vuoidii oljoin pyecceid já pyeredii sii.

₁₄Kunâgâs Herodes-uv kuulâi Jeesusist, tastko suu nommâ lâi tobdos jo viijđáht. Ulmuuh ettii: »Juhánâs Kästee lii pajanâm jämimist, tondiet sust vaikutteh tuoh vyeimih.» ₁₅Nubeh ettii, et sun lâi Elia, nubeh, et sun lâi proofeet, taggaar ko profeteh lijjii lamaš. ₁₆Ko Herodes kuulâi Jeesusist, sun eeđâi: »Juhánâs, tot almai, mon mun miästááttim, lii koccám jämimist.»

₁₇Herodes lâi uáináh väldittâm Juhánâs kiddâ, pieijâm suu avlijd já lukkâdâm faŋgâlân. Taam sun lâi porgâm viiljâs Filippos káálgu Herodias tiet. Herodes lâi naaijâm Herodiasáin, ₁₈mut Juhánâs lâi ettâm sunjin: »Tust ij lah lope eelliđ viiljâd kálgoin.» ₁₉Herodias lâi vaijeedškuáttám Juhánâs já ličij halijdâm koddeđ suu mut ij puáhtám, ₂₀tastko Herodes poolâi Juhánâsâst. Herodes tieđij suu hurskesin já pase almajin já suojâlij suu. Sun kuldâlij mielâstis Juhánâs, veik taan saavah maŋgii paccii-uv väividiđ suu.

₂₁Mudágis tilálâšvuotâ Herodiasân šoodâi, ko Herodes šoddâmpeeivis ääigi ornij tuáluid hovihiäráidis já suátivievâ njunošáid sehe Galilea uáivialmaid. ₂₂Herodias nieidâ poođij siisâ já tánssái, já Herodes já suu pevdikyesih lijjii mielâstum. Kunâgâs eeđâi nieidâsis: »Táátu must maid peri halijdah, te mun adelâm tom tunjin.» ₂₃Já sun lopedij já vuárnui: »Maid peri tun must táátuh, tom mun tunjin adelâm, veik pele väldikodestân.» ₂₄Nieidâ moonâi olgos já koijâdij enistis: »Maid mun tátuččim?» Enni västidij: »Táátu Juhánâs Kästee uáivi.» ₂₅Nieidâ tuámittij tállân maassâd kunâgâs kuuvl já eeđâi: »Mun táátum, et adelah munjin eidu tállân taldrik alne Juhánâs Kästee uáivi.»

₂₆Kunâgâs šoodâi murâšlâžžân, mut ko sun lâi kuosijdis mieldiorodijn vuárnum, te sun ij puáhtám piettâliđ. ₂₇Sun adelij tállân vaahtân pákkum, et taat koolgâi pyehtiđ Juhánâs uáivi. Miästájeijee moonâi faŋgâlân já miästái tobbeen Juhánâs. ₂₈Tastoo sun puovtij uáivi taldrik alne já adelij tom nieidân, já nieidâ adelij uáivi iännásis.

₂₉Ko Juhánâs máttááttâspárnááh kullii täst, te sij pottii viežžâđ rummâš já tolvuu tom háávdán.

₃₀Apostoleh čokkânii vuod Jeesus kuuvl já muštâlii sunjin, maid puohâid sij lijjii porgâm já maid máttááttâm. ₃₁Sun eeđâi sijjân: »Vyelgiđ muu fáárun mottoom ävđin sajan, te uážžuvetteđ váhá vuoiŋâstiđ.» Ulmuuh uáináh potâlii já monâlii ohtânmaanoost, iäge máttááttâspárnááh kiergânâm purâdiđgin. ₃₂Nuuvt sij vuolgii kárbáin ävđin kuávlun, ohtuuvuotân. ₃₃Mut ulmuuh huámášii sii vuolguu, já maaŋgah tubdii sii. Ulmuuh tommii toho puoh kaavpugijn, já olmoošjuávkku kiergânij vääzin toho ovdil sii.

₃₄Ko Jeesus kárbást lavkkiidijnis ooinij puoh täid ulmuid, te sun šallišij sii, tastko sij lijjii tego savzâiälu keččeettáá. Sun máttátškuođij já sáárnui sijjân kuhháá. ₃₅Ko peivi lâi jo juovdâm ehidân, te máttááttâspárnááh pottii suu kuuvl já ettii: »Taat lii asâhánnáá kuávlu, já lii jo mannjeed. ₃₆Vuolgât sii meddâl, vâi sij monâččii aldakuávlu tááloid já sijdáid uástiđ olssis purrâmâš. ₃₇»Adeliđ tij sijjân purrâmâš», västidij Jeesus. Sij ettii sunjin: »Kolgâččijm-uv mij moonnâđ uástiđ kuovttijn čuođijn denaráin leeibijd já adeliđ taid sijjân purrâmâššân?» ₃₈Jeesus koijâdij: »Kalle leeibi tist láá? Eelliđ keččâmin.» Sij tohhii nuuvt já almottii: »Vittâ, já kyehti kyele.»

₃₉Jeesus kočoi sii pieijâđ puohâid puurrâmkudij mield purâdiđ ruánáá kiedi oolâ. ₄₀Ulmuuh čokánii čyeđe já viđâlov jiegâ juávhoid. ₄₁Talle sun vaaldij taid vittâ leeibi já kyehti kyele, keejâi pajas olmijd já ceelhij kijttos. Sun tojâlij leeibijd já adelijd pittáid máttááttâspárnáidis, já taah juohhii taid ulmuid. Siämmáánáál sun juovij puohâiguin taid kyehti kyele. ₄₂Puohah purrii kalas. ₄₃Leibipasâttâsah norrojii kyehtnubáloh tievâ koorid, já kyeleh-uv paccii. ₄₄Puurâdmin lijjii lamaš vittâtuhháát almajid.

₄₅Tállân tastmaŋa Jeesus kočoi máttááttâspárnáidis lavkkiđ kárbás já moonnâđ oovdâst nubebel rido Betsaidan ton puudâ ko sun vuolgâttičij vievâ meddâl. ₄₆Ko sun lâi iäránâm sist, te sun moonâi vääri oolâ ruhâdâllâđ.

₄₇Eehid puáđidijn käärbis lâi kuávdoo jäävri já Jeesus ohtuu enâmist. ₄₈Sun ooinij, et máttááttâspárnáin lâi korrâ pargo suuhâđ vyestipiegân. Niäljád ijjâkocceemvuárust sun poođij čääsi mield vääzin sii kuuvl já ááigui moonnâđ sist lappâd. ₄₉Ko sij oinii suu väzzimin čääsi mield, te sij nobdii suu kommen já huiheškuottii. ₅₀Puohah sij oinii suu já suorgânii. Mut siämmást Jeesus jo sáárnui sijjân: »Pissoođ rávhálâžžân, mun taa lam. Elleđ poolâ.»

₅₁Sun lavkkij kárbás sii kuuvl, jeđe kolkkij. Máttááttâspárnááh lijjii čuuvtij hiämáskâm. ₅₂Totkin, mii leibijd tábáhtui, ij lam lekkâm sii čoolmijd. Nuuvt koorrâm sii vááimuh lijjii.

₅₃Ko sij lijjii peessâm jäävri nubebel, te sij pottii riidon Gennesaretist. ₅₄Ko sij lävkkejii kárbást, te ulmuuh huámmášii, kii lâi puáttám, ₅₅já sij vuolgii huápust tuálvuđ sääni jyehi kuávlun. Ulmuuh kyediškuottii pyecceid seŋgâiguin toho, kost Jeesus kullui lemin. ₅₆Já kuus sun peri moonâi, siijdân, kaavpugân teikâ šiiveettááloid, te ain ulmuuh puohtii pyecceid jolgâdâsân já tattuu, et sij uážuččii kuoskâđ suu kiessâmmááccuh tiäpán. Já puohah, kiäh kuoskii sunjin, puáránii.