Markus 7

₁Motomeh laavâmáttáátteijeeh pottii Jerusalemist, já oovtâst fariseusijguin sij monnii Jeesus kuuvl. ₂Sij huámmášii, et motomeh suu máttááttâspárnááh purâdii epiputes, posâhánnáá kieđâiguin. ₃Fariseuseh já puoh eres juudaliih nuávditteh tárkká ejijdis ärbinjuolgâdusâid. Sij iä kuássin puurâdškyeđe ovdilgo sij láá tárkká poossâm kieđâidis veikâba tuše čäcikuáškánjâššáin. ₄Sij iä meiddei puurâ maiden kävppišiljoost puohtum purrâmâšâid ovdilgo láá riškáttâllâm tom. Maaŋgâid eres-uv uuđhijd sij láá váldám nuávdittemnáál, tego juuhâmkaalhâi, njajâliitij já pronssiliitij posâmijd.

₅Nuuvtpa fariseuseh já laavâmáttáátteijeeh koijâdii Jeesusist: »Mondiet tuu máttááttâspárnááh iä ele eejij ärbinjuolgâdusâi mield, pic purâdeh epiputes kieđâiguin?»

₆Sun västidij sijjân: »Tij passaah! Olmânáál lii Jesaja tist ennustâm. Liihân čallum:

₉Já sun joođhij: »Čeeppiht tij tohâvetteđ tuššen Immeel pákkum, vâi puávtáččijd nuávdittiđ jieijâd njuolgâdusâid. ₁₀Mooses lii ettâm: ’Kunnijât iäččád já iännád’ já ’Kote karrood eejis teikâ eenis, sun ráŋgáštus jämimáin’. ₁₁Mut tij máttátvetteđ nubenáál. Jis kiinii iätá iäččásis teikâ iännásis: ’Tot, maid tun kolgih must uážžuđ, lii tääl korban: ađai lam lopedâm tom uhrelähjin temppâlân’, ₁₂tij eppeđ suovâ suu porgâđ innig maiden eejis teikâ eenis pyerrin. ₁₃Näävt tij ärbinjuolgâdusâid čuávudijnâd já máttátdijnâd tohâvetteđ tuššen Immeel sääni. Já ennuv eres siämmáásullâsii tij porgâvetteđ.»

₁₄Jeesus kočoi vuod olmoošjuávhu jieijâs kuuvl já eeđâi: »Kuullâđ puohah muu já iberdiđ. ₁₅Ij ulmuu pyevti nyeskidiđ mihheen, mii puátá ulmuu siisâ ulguubeln. Pic tot ulmuu nyeskid, mii puátá olgos suu siste. ₁₆[Kiäst láá peeljih, tot kulos!»]

₁₇Ko Jeesus tastoo vuolgij olmoošjuávhu kulen já poođij pááikán, te máttááttâspárnááh tattuu suu čielgiđ, maid sun uáivildij. ₁₈Sun eeđâi sijjân: »Leppeđ-uv tij-uv nyevt ibbeerdmettumeh? Eppeđ-uv tij addii, et mihheen ulmuu ulguubeln puátteid ij pyevti nyeskidiđ suu? ₁₉Ijhân tot moonâ suu vááimun – čuávján tot mana, já tobbeen tot talle puátá luándulávt olgos. Näävt Jeesus eeđâi, et puoh purrâmâš lii putes. ₂₀Já sun joođhij: »Mii ulmust vuálgá olgos, tot nyeskid ulmuu. ₂₁Tastko siste, ulmuu vááimust, vyelgih paas jurduuh, huáráástmeh, suáláádmeh, morheedmeh, ₂₂näimirikoseh, snielahvuotâ, ilgâdvuotâ, piätulâšvuotâ, nyeskivuotâ, paavuotâ, immeelpilkkedem, čiävluttâllâm já jiermittesvuotâ. ₂₃Puoh taat paa vuálgá siskiibeln olgos já nyeskid ulmuu.»

₂₄Jeesus vuolgij tobbeen Tyros já Sidon kuávlun. Sun moonâi mottoom táálun ige halijdâm, et ohtâgin tieđij suu puátimist. Tom ij kuittâg puáhtám čiehâđ. ₂₅Sust kuulâi mottoom nissoon, kiän nieidii väividij nyeskis jieggâ. Nissoon poođij tállân suu kuuvl já luáštádâđâi suu juolgij oovdân. ₂₆Sun ij lam juudalâš pic Syyria foinikialâš. Sun táátui Jeesus vuájálittiđ paas jiegâ nieidâstis ₂₇mut Jeesus eeđâi: »Tipte párnáid vistig kalaniđ. Ij lah sovâlâš väldiđ párnáin leeibi já leggistiđ tom pennuid.» ₂₈Nissoon västidij taas: »Hiärrá, uážžuhhân pennuuh-uv peevdi vyelni puurrâđ párnái kočâttem muáluid.» ₂₉Talle Jeesus eeđâi sunjin: »Ko tun kerd nyevt eeđah, te moonâ. Paas jieggâ lii vuálgám tuu nieidâst.» ₃₀Nissoon moonâi pááikán já ooinij párnáá viälláámin seeŋgâst. Paas jieggâ lâi vuálgám sust.

₃₁Jeesus tastoo vuolgij Tyros kuávlust já poođij Sidon já Dekapolis kuávlu peht Galileajäävri riidon. ₃₂Tobbeen Jeesus kuuvl puohtui peljittes almai, kote illá puovtij sárnuđ, já ulmuuh tattuu, et sun piejâččij kieđâs almaa oolâ. ₃₃Jeesus vaaldij suu olmoošjuávhust sierâ, piejâi suormâidis suu peljijd, čulgâdij já kuoskâttij suu njuohčâmân. ₃₄Talle sun kejâstij alme kuávlun, šyehkittij já eeđâi peljittiämán: »Effata.» Tot meerhâš: lekkâs. ₃₅Talle almaa peeljih lekkâsii já suu njuovčâ čovdui, nuuvt et sun sáárnui čielgâsávt.

₃₆Jeesus kieldij ulmuid maainâstmist tast oohtângin, mut mađe eenâb sun kieldij, tađe eenâb sij kulluuttii tast. ₃₇Puohah čuuvtij imâštellii já ettii: »Šievnáál sun lii puoh porgâm. Peljittemijd sun taha kullen já kielâttemijd sárnon.»