1. Muitalusaid girji 10

₁Filistalaččat soahttájedje israellaččaiguin. Israellaččat báhtaredje sis, ja ollugat gahčče Gilboavárrái. ₂Filistalaččat jukse Saula ja su bártniid ja godde Jonatana, Abinadaba ja Malkišua, Saula bártniid. ₃Soahti Saula birra šattai garasin. Dávgebáhččit áice su, ja son hávváduvai. ₄Dalle Saul dajai vearjoguoddásis: “Rohtte miehki ja rehtte mu! Muđui duot birračuohpakeahtes olbmát bohtet ja meannudit muinna bahás.” Muhto go vearjoguoddi ii duostan dahkat dan, de Saul ieš rohttii miehki ja bálkestahtii dasa. ₅Go vearjoguoddi oinnii ahte Saul lei jápmán, de songe bálkestahtii miehkkásis ja jámii. ₆Nu sii buohkat jápme, Saul ja su golbma bártni, ja nu nogai Saula soga gonagasvuohta.

₇Go Jisreela jalgadasa israellaččat gulle ahte soahteveahka lei báhtaran ja ahte Saul ja su bártnit ledje gahččan, de sii guđđe gávpogiiddiset ja báhtaredje. Filistalaččat ásse gávpogiidda sin sadjái.

₈Go filistalaččat maŋit beaivvi bohte rievidit gottáhallan olbmuid, de sii gávdne Saula ja su bártniid njaŋgámin Gilboaváris. ₉Sii rievidedje Saula gárvvuid ja válde su oaivvi ja vearjjuid. De sii gulahedje vuoitosága eahpeipmiliiddáseaset ja álbmogasaset. ₁₀Filistalaččat bidje Saula vearjjuid muhtun ipmileaset vissui, ja su oaivvi sii heŋgejedje Dagona tempelii.

₁₁Go Jabeša olbmot Gileadis gulle maid filistalaččat ledje dahkan Saulii, ₁₂de buot gávpoga soahteolbmát johttájedje ja vižže Saula ja su bártniid rupmašiid Jabešii. Sii hávdádedje sin dávttiid Jabeša terebintta vuollái ja fástudedje čieža beaivvi.

₁₃Nu jámii Saul, danne go son lei leamaš oskkáldasmeahttun Hearrái iige lean jeagadan Hearrá gohččuma. Son lei maid jearran neavvaga jábmiid vuoiŋŋain ₁₄iige Hearrás. Dan dihte Hearrá divttii su jápmit ja sirddii gonagasvuođa Davidii, Isaja bárdnái.