1. Muitalusaid girji 27

₁Dás leat logahallojuvvon israellaččaid sohkaoaivámuččat, duháha- ja čuohtásaoaivámuččat ja hoavddat geat bálvaledje gonagasa ja atne fuola soahteveagajuhkosiin. Dát juhkosat bálvaledje vurrolagaid mánu ain hávil, ja guđege juhkosis ledje guokteloginjealljeduhát olbmá.

₂Vuosttaš juhkosa mii bálvalii vuosttaš mánus, jođihii Jišbaal, Sabdiela bárdni; su juhkosis ledje guokteloginjealljeduhát olbmá. ₃Son lei Peresa soga olmmoš, ja vuosttaš mánus son lei iežas juhkosis buot oaivámuččaid hoavda.

₄Ahoahlaš Dodai jođihii dan juhkosa mii bálvalii nuppi mánus; su juhkosis ledje guokteloginjealljeduhát olbmá, ja Miklot lei okta jođiheddjiin.

₅Benaja, bajimusbáhppa Jojada bárdni, jođihii dan juhkosa mii bálvalii goalmmát mánus; su juhkosis ledje guokteloginjealljeduhát olbmá. ₆Benaja lei okta dan golmmalogi soahtesáŋgáris. Go son šattai dan golbmalohkása oaivámužžan, de su juhkosa jođiheaddjin šattai su bárdni Ammisabad.

₇Njealjádin, njealját mánus, lei Asael, Joaba viellja, ja su maŋŋil su bárdni Sebadja; su juhkosis ledje guokteloginjealljeduhát olbmá.

₈Viđádin, viđát mánus, lei oaivámužžan Šamhut, Seraha soga olmmoš; su juhkosis ledje guokteloginjealljeduhát olbmá.

₉Guđádin, guđát mánus, lei tekoahlaš Ira, Ikkeša bárdni; su juhkosis ledje guokteloginjealljeduhát olbmá.

₁₀Čihččedin, čihččet mánus, lei peletlaš Heles, Efraima čeardda olmmoš; su juhkosis ledje guokteloginjealljeduhát olbmá.

₁₁Gávccádin, gávccát mánus, lei husalaš Sibbekai, Seraha soga olmmoš; su juhkosis ledje guokteloginjealljeduhát olbmá.

₁₂Ovccádin, ovccát mánus, lei anatotlaš Abieser, Benjamina čeardda olmmoš; su juhkosis ledje guokteloginjealljeduhát olbmá.

₁₃Logádin, logát mánus, lei netofalaš Mahrai, Seraha soga olmmoš; su juhkosis ledje guokteloginjealljeduhát olbmá.

₁₄Oktanuppelogádin, oktanuppelogát mánus, lei piratonlaš Benaja, Efraima čeardda olmmoš; su juhkosis ledje guokteloginjealljeduhát olbmá.

₁₅Guoktenuppelogádin, guoktenuppelogát mánus, lei netofalaš Heldai, Otniela soga olmmoš; su juhkosis ledje guokteloginjealljeduhát olbmá.

₁₆Israela čearddaid oaivámuččat: Rubena čeardda oaivámuš lei Elieser, Sikri bárdni, Simeona čeardda oaivámuš lei Šefatja, Maaka bárdni, ₁₇Levi čeardda oaivámuš lei Hašabja, Kemuela bárdni, Arona soga oaivámuš lei Sadok, ₁₈Juda čeardda oaivámuš lei Elihu, Davida viellja, Isaskara čeardda oaivámuš lei Omri, Mikaela bárdni, ₁₉Sebulona čeardda oaivámuš lei Jišmaja, Obadja bárdni, Naftali čeardda oaivámuš lei Jerimot, Asriela bárdni, ₂₀Efraima čeardda oaivámuš lei Hosea, Asasja bárdni, Manasse nuppi čeardabeale oaivámuš lei Joel, Pedaja bárdni, ₂₁Manasse nuppi čeardabeale oaivámuš, dan mii lei Gileadis, lei Jiddo, Sakarja bárdni, Benjamina čeardda oaivámuš lei Jaasiel, Abnera bárdni, ₂₂ja Dana čeardda oaivámuš lei Asarel, Jerohama bárdni. Dát ledje Israela čearddaid oaivámuččat.

₂₃David ii lohkan daid geat ledje vuollil guoktelogijahkásaččat; sii ledje eatnat, danin go Hearrá lei lohpidan dahkat israellaččaid eatnagin dego almmi násttit. ₂₄Joab, Seruja bárdni, lei gal álggahan lohkama, muhto ii ollašuhttán dan, danin go Ipmila moarri deaividii Israela. Dan dihte álbmoga olmmošlohku ii leat čállojuvvon gonagas Davida muitalusaid girjái.

₂₅Asmavet, Adiela bárdni, gozihii gonagasa vuorkkáid, ja Jonatan, Ussia bárdni, gozihii daid vuorkkáid mat ledje meahcis, gávpogiin, giliin ja ladnetoartnain. ₂₆Esri, Keluba bárdni, gozihii bealdobargiid, ₂₇ramalaš Šimi viidnegárddiid, šefamlaš Sabdi viidnevuorkkáid, ₂₈gederlaš Baal Hanan Šefela oliivamuoraid ja meahccefiikonmuoraid ja Joaš oljorádjosiid. ₂₉Saronlaš Šitrai gozihii stuorraomiid mat guhto Saronis, ja Šafat, Adlaja bárdni, stuorraomiid mat guhto legiin, ₃₀ismaellaš Obil kamelaid, meronotlaš Jehdeja áseniid ₃₁ja hagarlaš Jasis smávvaomiid. Sii buohkat ledje gonagas Davida opmodaga goziheaddjin.

₃₂Davida ráđđeaddin lei su áhči viellja Jonatan, jierpmálaš olmmái ja gonagasa čálli, ja gonagasa bártniid bagadeaddjin lei Jehiel, Hakmona bárdni. ₃₃Maiddái Ahitofel lei gonagasa ráđđeaddin, ja ereklaš Hušai lei gonagasa lagamus olmmái. ₃₄Ahitofela maŋŋil ráđđeaddin leigga Jojada, Benaja bárdni, ja Ebjatar. Gonagasa soahteveagaoaivámužžan lei Joab.