1. Muitalusaid girji 9

₁Ná buot israellaččat leat logahallojuvvon sogaid mielde, ja namat leat čállojuvvon Israela gonagasaid girjái. Juda ássit dolvojuvvojedje Babylonii oskkáldasmeahttunvuođaset dihte. ₂Vuosttamuččat geat máhcce gávpogiiddáseaset ja opmodagaidasaset, ledje báhpat, levilaččat, tempelbálvaleaddjit ja eará israellaččat. ₃Jerusalemii ásse Juda, Benjamina, Efraima ja Manasse čearddaid olbmot.

₄Juda čeardda olmmoš lei Utai, Ammihuda bárdni; su áddjá lei Omri, su áhčči Imri ja su áhčči Bani, gii lei Juda bártni Peresa nális. ₅Seamma čerdii gulai šelalaš Asaja, áhčis vuosttašriegádeaddji, su bártnit ₆ja serahlaš Jeuel. Juda čeardda olbmot ledje guhttačuođiovccilogi.

₇Benjamina čeardda olbmot ledje Sallu gean áhčči lei Mešullam, Hassenua bártni Hodavja bárdni, ₈Jibneja, Jerohama bárdni, Ela, Mikri bártni Ussi bárdni, ja Mešullam gean áhčči lei Šefatja, Jibnia bártni Reuela bárdni; ₉dán čeardda olbmot ledje sohkalogahallamiid mielde ovccičuođi vihttalogiguhtta. Sii buohkat ledje bearrašiiddiset oaivámuččat.

₁₀Báhpat: Jedaja, Jojarib, Jakin ₁₁ja Asarja, Hilkia bárdni, Ipmila tempela hoavda; su áddjá lei Mešullam, su áhčči lei Sadok, su Merajot ja su Ahitub. ₁₂Báhpaide gulle maid Adaja, Jerohama bárdni, gean áddjá lei Pašhur, Malkia bárdni, ja vel Masai, Adiela bárdni; su áddjá lei Jahsera, su áhčči Mešullam, su Mešillemot ja su Immer. ₁₃Sii ledje oktiibuot duhátčiežačuođiguhttalogi, bearrašiiddiset oaivámuččat, buohkat dohkálaččat bálvalit Ipmila tempelis.

₁₄Levilaččat: Šemaja, Haššuba bárdni. Su áddjá lei Asrikam, Hašabja bárdni Merari sogas; ₁₅Bakbakkar, Hereš, Galal ja Mattanja, Mika bárdni, Asafa bártni Sikri áddjut; ₁₆Obadja, Šemaja bárdni, Jedutuna bártni Galala áddjut, ja vel Berekja, Asa bárdni, Elkana áddjut, su gii ásai netofalaččaid giliin.

₁₇Uksafávttat ledje Šallum, Akkub, Talmon ja Ahiman. Šallum lei sin oaivámuš, ₁₈ja sin fáktensadji lei dego ovdalge nuortta bealde, Gonagasa poartta guoras. Sii ledje fákten levilaččaid siidda.

₁₉Šallum, Kore bárdni, Koraha bártni Ebjasafa áddjut, ja dat geat gulle su sohkii, korahlaččaide, bálvaledje goađi šielbmáfáktan. Sin áhčit ledje dolin fákten Hearrá siidda uvssa, ₂₀ja Pinehas, Elasara bárdni, lei dalle sin oaivámuš, ja Hearrá lei suinna.

₂₁Sakarja, Mešelemja bárdni, lei almmustusgoađi uksafákta. ₂₂Dát geat ledje válljejuvvon fáktet šielmmáid, ledje guoktečuođiguoktenuppelohkái, ja sii ledje čállojuvvon sohkalogahallamiidda iežaset giliin. David ja oaidni Samuel leigga bidjan sin bálvalit bistevaččat. ₂₃Sii ja sin bártnit fáktejedje vurrolagaid Hearrá viesu, goahteviesu, poarttaid. ₂₄Uksafávttat fáktejedje njealji almmiguovllu – nuortti, oarjji, davi ja luli – beale poarttaid, ₂₅ja sin soga olbmát galge boahtit giliineaset veahkehit sin vurrolagaid ain čieža beaivái. ₂₆Uksafávttaid njeallje oaivámučča geat ledje levilaččat, bálvaledje bistevaččat. Sii atne fuola Ipmila viesu gámmáriin ja vuorkkáin. ₂₇Sii idjadedje Ipmila tempela lahka, danin go sii galge fáktet dan ja rahpat poarttaid juohke iđida.

₂₈Muhtumat sis atne fuola lihtiin mat adnojuvvojedje ipmilbálvalusas, ja sii galge lohkat daid álo go sii bukte daid ja go dolvo daid eret. ₂₉Earátgis galge atnit fuola dábálaš lihtiin ja bassibáikki eará lihtiin ja geahččat bearrái nisojáffuid, viinni, oljju, suovvasiid ja hádjaávdnasiid. ₃₀Muhtun báhpaid bargun lei ráhkadit njálggahájat vuoidasiid. ₃₁Levilaš Mattitjai, korahlaš Šalluma vuosttašriegádeaddjái, lei oskkilduvvon láibbi ráhkadeapmi, ₃₂ja muhtun levilaš Kehata soga olbmát galge geahččat bearrái oaffarláibbiid ja buktit daid ovdan juohke sabbaha. ₃₃Tempellávlut ledje levilaš bearrašiid oaivámuččat, ja sii ásse tempela gámmáriin, danin go sii bálvaledje beivviid ja ijaid.

₃₄Dát ledje levilaš bearrašiid oaivámuččat, buot oaivámuččat logahallojuvvon sohkalogahallamiid mielde. Sii ásse Jerusalemis.

₃₅Gibeona vuođđudeaddji Jeiel ásai Gibeonis. Su áhká namma lei Maaka, ₃₆ja su bártnit ledje Abdon, vuosttašriegádeaddji, Sur, Kiš, Baal, Ner, Nadab, ₃₇Gedor, Ahjo, Sakarja ja Miklot. ₃₈Miklot sahkanahtii Šimama. Sii ásse Jerusalemis ovttas vieljaideasetguin.

₃₉Ner sahkanahtii Kiša, Kiš sahkanahtii Saula ja Saul sahkanahtii Jonatana, Malkišua, Abinadaba ja Ešbaala. ₄₀Jonatana bárdni lei Merib-Baal, ja Merib-Baal sahkanahtii Mika. ₄₁Mika bártnit ledje Piton, Melek, Tahrea ja Ahas.

₄₂Ahas sahkanahtii Jara, ja Jara sahkanahtii Alemeta, Asmaveta ja Simri. Simri sahkanahtii Mosa, ₄₃ja Mosa sahkanahtii Bina gean bárdni lei Refaja. Refaja bárdni lei Elasa ja Elasa bárdni lei Asel. ₄₄Aselis ledje guhtta bártni: Asrikam, vuosttašriegádeaddji, Ismael, Šearja, Asarja, Obadja ja Hanan. Dát ledje Asela bártnit.