1. Gonagasaid girji 22

₁Ráfi bisttii golbma jagi; ii lean soahti Israela ja Arama gaskkas. ₂Goalmmát jagi Juda gonagas Jošafat bođii galledit Israela gonagasa. ₃Israela gonagas lei dadjan olbmáidasas: “Almma dii diehtibehtet ahte Ramot Gileadis gullá midjiide? Ja mii dušše čohkkát jaska eatge váldde gávpoga Arama gonagasas!” ₄Son dajai Jošafatii: “Vuolggátgo don muinna soahtat Ramotii Gileadis?” Jošafat vástidii: “Nu mun dego donge, nu mu álbmot go du álbmotge, nu mu heasttat go du heasttatge.” ₅Jošafat dajai goit Israela gonagassii: “Jeara datte vuos neavvaga Hearrás.” ₆Dalle Israela gonagas čohkkii profehtaid, sullii njeallječuođi olbmá, ja jearai sis: “Fallehango mun Ramota Gileadis vai divttángo orrut?” Profehtat vástidedje: “Fallet fal! Hearrá addá gávpoga gonagasa gihtii.” ₇Muhto Jošafat jearai: “Eaigo dáppe leat eará Hearrá profehtat geain sáhtášeimmet jearrat?” ₈Israela gonagas vástidii: “De lea vel okta gii sáhttá jearrat Hearrá dáhtu. Muhto mun vašuhan su, danin go son ii goassege einnos munnje buori, muhto dušše bahá. Son lea Mika, Jimla bárdni.” Jošafat dajai: “Ale daja nie, gonagas.” ₉De Israela gonagas rávkkai lusas muhtun hoavvaolbmá ja gohčui: “Viečča hoahpus Mika, Jimla bártni!”

₁₀Israela gonagas ja Jošafat, Juda gonagas, čohkkáiga Samaria gávpotpoartta guoras gordneráidnenbáikkis goabbáge truvnnustis gonagaslaš biktasat gárvun, ja buot profehtat ledje lihkahusain sudno ovddas. ₁₁Sidkia, Kenaana bárdni, lei ráhkadan alccesis ruovdečorvviid, ja son dajai: “Ná cealká Hearrá: ‘Dáiguin don doarostat aramealaččaid ja duššadat sin.’” ₁₂Seammá láhkái einnostedje buot eará profehtatge: “Fallet Ramota Gileadis! Don gal biđát, Hearrá addá gávpoga du gihtii.”

₁₃Áirras gii lei mannan viežžat Mika, dajai sutnje: “Profehtat einnostit gonagassii ovtta jitnii dušše buriid. Einnos donge sin láhkái ja lohpit sutnje buriid.”

₁₄Muhto Mika vástidii: “Nu duohta go Hearrá eallá, mun sártnun dan maid Hearrá cealká munnje.” ₁₅Go Mika bođii gonagasa ovdii, de gonagas jearai: “Mika, fallehetnego moai Ramota Gileadis vai diktego orrut?” Mika vástidii: “Fallet fal, don gal biđát. Hearrá addá gávpoga du gihtii.” ₁₆Muhto gonagas dajai: “Man gallii mun šattan vuortnuhit du sárdnut munnje dušše duođa Hearrá nammii?” ₁₇Dalle Mika dajai: “Mun oidnen buot israellaččaid bieđganan miehtá váriid dego sávzaeallu mas ii leat geahčči. Ja Hearrá celkkii: Dain ii leat geahčči, máhccoset ráfis ruoktot, iešguhtege báikásis.”

₁₈Dalle Israela gonagas dajai Jošafatii: “Ingo mun muitalan dutnje ahte son ii goassege einnos munnje buori, muhto aivve bahá.” ₁₉Mika dajai vel: “Gula dan dihte Hearrá sáni! Mun oidnen Hearrá čohkkámin truvnnustis, ja oppa almmi veahka čuoččui su luhtte su olgeš ja gurut bealde. ₂₀Ja Hearrá celkkii: Gii fillešii Ahaba mannat Ramotii Gileadis, vai son gahččá dohko? Muhtun vástidii ná, nubbigis nuo. ₂₁Dalle bođii muhtun vuoigŋa, čuoččastii Hearrá ovdii ja dajai: ‘Mun fillen su.’ Hearrá jearai: ‘Man láhkái?’ ₂₂Vuoigŋa vástidii: ‘Mun manan gielisvuođa vuoigŋan buot su profehtaid njálbmái.’ Hearrá celkkii: ‘Fille su, dan don veaját. Mana ja daga nie!’ ₂₃Hearrá lea dál bidjan gielisvuođa vuoiŋŋa buot du profehtaid njálbmái. Son lea mearridan lihkuhisvuođa deaividit du.” ₂₄Dalle Sidkia, Kenaana bárdni, bođii dasa, doaškalii Mika nirrii ja dajai: “Livččiigo Hearrá vuoigŋa mahkáš vuolgán mus ja sárdnugoahtán duinna?” ₂₅Mika vástidii: “Dan don oainnát dan beaivvi go viegat lanjas latnjii ja ozat čiehkádansaji.”

₂₆Israela gonagas gohčui dalle: “Dohppejehket Mika ja dolvot su gávpoga oaivámučča Amona ja gonagasa bártni Joaša lusa. ₂₇Dadjet sudnuide: Ná dadjá gonagas: ‘Biddji dán olbmá giddagassii ja addi sutnje dušše vátna láibbi ja čázi, dassá go mun máhcan dearvan.’” ₂₈Mika dajai: “Jos don máhcat dearvan, de Hearrá ii leat sárdnon mu bokte.” Ja son dajai vel: “Gullet dán, buot álbmogat!”

₂₉Nu Israela gonagas ja Jošafat, Juda gonagas, vulggiiga Ramotii Gileadis. ₃₀Israela gonagas dajai Jošafatii: “Mun molssun gárvvuid ovdal go manan soahtat, muhto ane don iežat biktasiid.” Son molssui gárvvuid ja manai soahtat. ₃₁Arama gonagas lei gohččon iežas golbmalogiguokte soahtevovdnaoaivámučča: “Dii oažžubehtet soahtat dušše Israela gonagasain, ehpet geainnage earáin, lehkos dal stuoris dahje smávis.” ₃₂Go soahtevovdnaoaivámuččat áice Jošafata, de sii dadje: “Son lea vissásit Israela gonagas.” Sii birastahtte su ja ledje aiddo falleheamen su, go Jošafat čuorvvui veahki. ₃₃Go soahtevovdnaoaivámuččat fuobmájedje ahte son ii leange Israela gonagas, de sii heite áŧesteames su.

₃₄Muhtin olmmái gelddii dávggis sahtedohko ja deaivvai Israela gonagasa ruovdegárvvu lavttaid gaskii. Gonagas dajai dalle vovdnavuoddjásis: “Jorgal vovnnaid ja doalvvo mu eret soađis. Mun lean hávváduvvan.” ₃₅Muhto soahti lei garas, ja gonagas šattai leat geažos beaivvi vovnnainis. Eahkedis son jámii, danin go su varra lei golgan hávis vovnnaid sisa. ₃₆Go beaivváš lei luoitádeamen, gullui soahteveagas čuorvvas: “Máhccos juohke olmmái eatnamasas ja gávpogasas!” ₃₇Nu gonagas jámii. Su rumaš buktojuvvui Samariai ja hávdáduvvui dohko. ₃₈Vovnnat doidojuvvojedje Samaria olggobealde láddos gos fuorát lávejedje lávggodit, ja beatnagat njollo su vara, nugo Hearrá lei sárdnon.

₃₉Mii muđui lea muitalit Ahabis ja su daguin, elefánttabátnešloahtas ja buot su gávpogiin, lea čállojuvvon Israela gonagasaid muitalusaid girjái. ₄₀Ahab manai vuoiŋŋadit áhčiidis lusa, ja su maŋŋil šattai gonagassan su bárdni Ahasja.

₄₁Jošafat, Asa bárdni, šattai Juda gonagassan Israela gonagasa Ahaba njealját ráđđenjagi. ₄₂Son lei golbmalogiviđajahkásaš go šattai gonagassan, ja son ráđđii Jerusalemis guoktelogivihtta jagi. Su eadni lei Asuba, Šilhi nieida. ₄₃Jošafat vádjolii buot áhčis Asa geainnuid iige spiehkastan dain, muhto dagai dan mii lea riekta Hearrá čalmmiin. ₄₄Dattetge oaffarbáikkit eai jávkaduvvon, muhto álbmot oaffarušai ja bolddii ain oaffardola oaffarbáikkiin. ₄₅Jošafat dagai ráfi Israela gonagasain. ₄₆Mii muđui lea muitalit Jošafatis, su olahusain ja sođiin, lea čállojuvvon Juda gonagasaid muitalusaid girjái. ₄₇Jošafat jávkadii eatnamis tempelfuoráid geat vel ledje báhcán su áhči Asa áiggis.

₄₈Edomis ii lean dalle gonagas, muhto dan ráđđii eatnanhearrá. ₄₉Jošafat huksii Taršiša-skiippaid, vai beasašii viežžat daiguin golli Ofiris, muhto skiippat eai beassan oppa vuolgitge, go dat cuovkanedje Esjon-Geberii. ₅₀Dalle Ahasja, Ahaba bárdni, dajai Jošafatii: “Divtte mu olbmáid borjjastit ovttas du olbmáiguin.” Jošafat ii goit miehtan. ₅₁Jošafat manai vuoiŋŋadit áhčiidis lusa ja hávdáduvvui áhčiidis gurrii Davida gávpogii. Su maŋŋil gonagassan šattai su bárdni Joram.

₅₂Ahasja, Ahaba bárdni, šattai Israela gonagassan Samaria gávpogii Juda gonagasa Jošafata čiežanuppelogát ráđđenjagi. Son ráđđii Israela guokte jagi. ₅₃Ahasja dagai dan mii lei bahá Hearrá čalmmiin ja vádjolii áhčis ja eatnis ja Jeroboama, Nebata bártni, geainnuid, su gii lei fillen Israela suddudit. ₅₄Son bálvalii ja rohkadalai Baala ja moaráhuhtii Hearrá, Israela Ipmila, áibbas nugo su áhčči lei dahkan.