Samuel riegáda
1 Sufa eatnama Ramatajimis, Efraima várreeatnamis, ásai olmmái gean namma lei Elkana. Son gulai Efraima čerdii, ja su áhčči lei Jeroham, Elihu bárdni. Elihu áhčči lei Tohu ja su áhčči lei Suf. 2Elkanas ledje guokte áhká. Nuppi namma lei Hanna ja nuppigis Peninna. Peninnas ledje mánát, muhto Hanna lei mánáheapme.
3 Elkana manai juohke jagi iežas ruovttugávpogis Šiloi rohkadallat ja oaffaruššat Hearrái, Almmiveagaid Ipmilii. Doppe Eli guokte bártni, Hofni ja Pinehas, bálvaleigga báhppan. 4Go Elkana lei oaffaruššamin, de son attii áhkkásis Peninnai ja buot su bártniide ja nieiddaide oasi oaffarbierggus, 5ja Hannaige son attii oasi. Son anii dattetge Hanna ráhkkáseabbon, vaikko Hearrá lei buđđon su goaŧu. 6Muhto nubbi áhkká, Peninna, hárddii ja givssidii ovtto Hanna das ahte Hearrá lei buđđon su goaŧu. 7Nu dáhpáhuvai jagis jahkái: Juohke háve go Hanna manai Hearrá vissui, de Peninna givssidii su, nu ahte son čierui iige dáhtton borrat. 8Dalle su boadnji Elkana dajai sutnje: “Manin don čierut, Hanna, itge bora? Manin don leat morrašis? Almma mun leat dutnje buoret go logi bártni?”
9Oktii go sii ledje geargan borramis oaffarmállásiid Šilos, de Hanna loaiddastii Hearrá muođuid ovdii. Báhppa Eli lei čohkkámin stuolus Hearrá tempela uksastoalppu guoras. 10Morrašis Hanna rohkadalai Hearrá ja čierui bahččagit. 11Son dagai dán lohpádusa: “Hearrá, Almmiveagaid Ipmil! Jos don geahčat iežat bálvaleaddjinissona vártnuhisvuođa beallái, muittát mu itge vajáldahte mu muhto attát munnje bártni, de mun attán su dutnje oppa su eallinahkái, iige ráhkenniibi goassege boađe su oaivái.” 12Son rohkadalai Hearrá guhká, ja Eli dárkui su baksamiid lihkastagaid. 13Hanna oainnat rohkadalai jávohaga; dušše su baksamat lihkadedje, muhto jietna ii gullon. Danin Eli gáttii su leat gárremiin 14ja dajai sutnje: “Man guhká don áiggut leat gárrenoaivvis? Doama čielgat!” 15Muhto Hanna vástidii: “Ii nu, hearrážan, in mun leat juhkan viinni inge garra juhkamuša. Mun lean nisson geas lea bahča moraš, ja mun golggahin váibmon Hearrá muođuid ovdii. 16Ale ane iežat bálvaleaddjinissona fuones nissonin, dušše iežan stuorra morraša ja váimmu bákčasa dihte mun rohkadallen ná guhká.” 17Dalle Eli dajai: “Mana ráfái! Israela Ipmil addá dutnje dan maid leat sus ánuhan.” 18Hanna vástidii: “Vare du bálvaleaddjinisson gávnnašii árpmu du čalmmiin!” De son vulggii, borai iige lean šat morrašis.
19Árrat iđedis sii lihkke ja rohkadalle Hearrá muođuid ovddas. De sii máhcce Ramai. Go Elkana de veallái áhkáinis Hannain, de Hearrá muittii Hanna. 20Ovdal go jahki lei dievvan, de son lei šaddan áhpeheapmin ja riegádahttán bártni. Son bijai bárdnásis nama Samuel ja dajai: “Hearrás mun su ánuhin.”
Samuel dolvojuvvo Šilo bassibáikái
21Go Elkana fas lei vuolgimin oppa bearrašiinnis Šiloi oaffaruššat Hearrái jahkásaš oaffara ja iežas lohpádusoaffara, 22de Hanna ii dáhttonge vuolgit fárrui, muhto dajai boadnjásis: “Go mun lean botkehan bártnáža, de mun doalvvun su Hearrá muođuid ovdii, ja doppe son oažžu orrut oppa eallinagis.” 23Elkana vástidii sutnje: “Daga maid anát buoremussan. Oro ruovttus dassážii go leat botkehan bártnáža. Vare Hearrá divttášii šaddat nu go don dajat.”
Hanna orui ruovttus ja njamahii bártnis dassážii go botkehii su. 24Go son lei botkehan bártnis, de son vulggii Elkanain doalvut su Hearrá vissui Šiloi, ja sudnos lei fárus golmmajahkásaš vuoksá, efa veardde jáffut ja viidneseahkka. Áhčči oaffarušai njuovvanoaffara Hearrái, nugo son lávii dahkat juohke jagi, 25ja njuovai vuovssá. Hanna, bártni eadni, doalvvui bártni Eli lusa 26ja dajai: “Gula mu, hearrá! Nu duohta go don ealát, hearrá, de mun lean dat nisson gii čužžon dás du luhtte rohkadallamin Hearrá. 27Dán bártni mun ánuhin, ja Hearrá lea addán munnje maid mun bivden sus. 28Dál mun attán su ruoktot Hearrái. Son gullá Hearrái nu guhká go eallá.”
De sii rohkadalle doppe Hearrá.
