1. Samuelgirji 22

₁David vulggii Gatis ja báhtarii Adullama bákteráigái. Go su vieljat ja oppa su bearaš gulle dan, de sii manne dohko su lusa. ₂Su lusa čoagganedje buotlágán heađálaš, vealggáiduvvan ja bahčagan olbmot, ja son riemai sin oaivámužžan. Sutnje serve sullii njeallječuođi olbmá. ₃Doppe David manai Mispei Moabis ja ánui Moaba gonagasas: “Suova mu áhči ja eatni orrut du luhtte dassážii go mun oainnán maid Ipmil áigu dahkat munnje.” ₄Son guđii vánhemiiddis Moaba gonagasa lusa, ja soai ásaiga gonagasa luhtte nu guhká go David lei várreladnis. ₅Muhto profehta Gad dajai Davidii: “Ale šat oro várreladnis, muhto vuolgge Juda eatnamii.” Dalle David vulggii ja orrui Heretvuovdái.

₆Saul lei čohkkámin Gibeas dievás tamariskamuora vuolde sáiti gieđas, ja buot su olbmát ledje čuožžumin su birra. De Saulii muitaluvvui ahte muhtumat ledje oaidnán Davida ja su olbmáid. ₇Saul dajai daidda olbmáide geat ledje das: “Gullet, benjaminlaččat! Gáddibehtetgo dii ahte Isaja bárdni addá didjiidenai bealdduid ja viidnegárddiid ja bidjá din duháhaoaivámužžan ja čuohtásaoaivámužžan? ₈Diihan lehpet buohkat dahkan lihtu mu vuostá! Ii oktage dis leat dieđihan munnje ahte mu bárdni lea dahkan lihtu Isaja bártniin. Ii oktage dis leat viššan muitalit munnje ahte mu bárdni lea bođđen mu iežan bálvaleaddji juonastit mu vuostá.” ₉Dalle dajai Edomlaš Doeg gii lei okta Saula njunušolbmáin: “Mun oidnen Isaja bártni boahtimin Nobii Ahimeleka, Ahituba bártni, lusa. ₁₀Ahimelek jearai sutnje neavvaga Hearrás, nistii su ja attii sutnje velá filistalaš Goljata miehki.”

₁₁Dalle Saul vieččahii báhppa Ahimeleka, Ahituba bártni, ja oppa su soga, Noba báhpaid. Go sii bohte gonagasa ovdii, ₁₂de Saul dajai: “Gula, Ahituba bárdni!” Ahimelek vástidii: “Maid don dáhtut, hearrá?” ₁₃Saul dajai sutnje: “Manne doai leahppi dahkan lihtu mu vuostá, doai Isaja bártniin? Don leat addán sutnje láibbi ja miehki ja jearran sutnje neavvaga Ipmilis, vai son beassá čuožžilit mu vuostá ja vuođgŋit mu, nugo dilli dál lea!” ₁₄Ahimelek vástidii gonagassii: “Leago buot du bálvaleddjiin oktage nu oskkáldas go David, gonagasa vivva, du heaggafávttaid oaivámuš ja árvvus adnojuvvon olmmái du viesus? ₁₅Inhan mun dál vuosttaš geardde jearran Ipmilis sutnje neavvaga. Allos gonagas sivahallo mu dahje mu soga, danin go mun in diehtán dán áššis maidege.” ₁₆Muhto gonagas dajai: “Don ráŋggáštuvvot jápmimiin, Ahimelek, don oktan oppa sogainat.” ₁₇De gonagas dajai heaggafávttaidasas geat ledje čuožžumin das su birra: “Lávkejehket ovdan ja goddet Hearrá báhpaid! Siinai leat Davida beali. Vaikko sii dihte ahte son lei báhtareamen, de sii eai almmuhan dan munnje.” Muhto gonagasa olbmát eai dáhtton loktet gieđa Hearrá báhpaid vuostá. ₁₈Dalle gonagas gohčui Doega: “Lávke don ovdan ja gotte báhpaid!” Ja edomlaš Doeg dagai nu; dan beaivvi son gottii gávccilogivihtta olbmá geat buohkat atne efoda. ₁₉Maiddái Noba, báhpaid gávpoga, Saul duššadii mihkiinis, ja miehkki gottii doppe dievdduid ja nissoniid, mánáid ja njammimánáid, vuovssáid, áseniid ja sávzzaid.

₂₀Dušše okta Ahituba bártni Ahimeleka bártniin beasai báhtarussii. Su namma lei Abjatar. Son báhtarii Davida lusa ₂₁ja muitalii ahte Saul lei goddán Hearrá báhpaid. ₂₂David dajai Abjatarii: “Dalle juo go edomlaš Doeg lei doppe dan beaivvi, de mun árvidin ahte son muitala Saulii. Mun lean sivalaš buot du fulkkiid jápmimii. ₂₃Oro mu luhtte, ale bala! Dat gii bivdá du heakka, bivdá munai heakka. Mu luhtte don leat buori dorvvus.”