1. Samuelgirji 24

₁David vulggii doppe ja orrui En-Gedi várrealážiidda. ₂Go Saul máhcai soahtamis filistalaččaiguin, de sutnje muitaluvvui ahte David lei En-Gedi meahcis. ₃Saul válddii mielddis golbmaduhát olbmá geaid son lei válljen oppa Israelis, ja vulggii nuortalii Várregáicabávttiid ohcat Davida ja su olbmáid. ₄Go son bođii sávzagárddiid lusa mat ledje geaidnoguoras, de son manai das muhtin bákteráigái gálgat earániiddis. Muhto siskkimuččas bákteráiggis čohkkájedje David ja su olbmát. ₅Olbmát dadje Davidii: “Dál lea boahtán beaivi man birra Hearrá lea cealkán: Mun attán du vašálačča du gihtii, daga sutnje maid dáhtut.” Dalle David manai ja čuohpastii bihtá Saula oalgebiktasa healmmis. ₆Muhto Davida váibmui čuzii dat ahte son lei čuohppan bihtá Saula oalgebiktasa healmmis, ₇ja son dajai olbmáidasas: “Hearrá várjalehkos mu dahkamis dákkáriid gonagassasan, Hearrá vuoidan olbmái, ja bajideames gieđa su vuostá; sonhan lea olmmái gean Hearrá lea vuoidan.” ₈David ráŋggui olbmáidis iige suovvan sin fallehit Saula.

Go Saul lei vuolgán bákteráiggis ja manai ain ovddos, ₉de Davidge bođii olggos bákteráiggis ja čurvii sutnje: “Mu hearrá ja gonagas!” Go Saul jorggihii geahččat, de David čippostii ja gopmirdii eatnamii muođuid. ₁₀Son dajai Saulii: “Manne don guldalat olbmuid geat dadjet ahte mun geahččalan vahágahttit du? ₁₁Odne don leat oaidnán iežat čalmmiiguin ahte Hearrá attii du mu gihtii bákteráiggis. Mu olbmát ávžžuhedje mu goddit du, muhto mun sesten du heakka, danin go mun jurddašin: Mun in lokte gieđa iežan hearrá vuostá, sonhan lea olmmái gean Hearrá lea vuoidan. ₁₂Geahča dal, áhččán, dás mu gieđas lea bihttá du oalgebiktasa healmmis. Go mun čuohpastin dan du oalgebiktasis inge goddán du, de das don fertet ipmirdit ahte mun in leat sivalaš mange bahái. Mun in leat rihkkon du vuostá, muhto don bivdalat mu heakka ja dáhtut goddit mu. ₁₃Hearrá galgá dubmet mu ja du gaskkas. Hearrá mávssaha dutnje dan maid don leat rihkkon mu vuostá, muhto mun in dutnje guoskka. ₁₄Dološ sátnevájashan dadjá: ‘Bahá boahtá bahás olbmuin’. Mun in guoskka dutnje! ₁₅Gean maŋŋái Israela gonagas lea vuolgán, gean don doarridat? Jápma beatnaga, lahpesduona! ₁₆Muhto Hearrá lea duopmár, dubmejehkos son munno vuoigatlaččat! Son oaidná ja ovddida mu ášši ja veahkeha mu oažžut vuoigatvuođa du vuostá.”

₁₇Go David lei geargan sárdnumis, de Saul dajai: “Bárdnán David, almma dat lea du jietna?” Ja Saul čirrui ₁₈ja dajai Davidii: “Don leat buoret go mun. Don leat dahkan munnje bures, vaikko mun lean dahkan dutnje bahás. ₁₉Odne don leat čájehan ahte dáhtut munnje buori, go it goddán mu, vaikko Hearrá lei addán mu du gihtii. ₂₀Go muhtin deaivá vašálaččas, de son ii divtte su mannat ráfis. Vare Hearrá mávssášii dutnje buriin dan maid don leat dahkan munnje odne! ₂₁Dál mun dieđán ahte don šattat gonagassan ja ahte don doalat Israela gonagasvuođa nannosit gieđas. ₂₂De vuortno dál munnje Hearrá nammii ahte it duššat mu náli itge sihko mu nama áhččán sogas.” ₂₃Go David lei vurdnon sutnje, de Saul máhcai ruktosis, ja David ja su olbmát manne várrealážiidda.