1. Samuelgirji 3

₁Nuorra Samuel bálvalii Hearrá Eli luhtte. Dan áigge Hearrá sártnui olbmuide hárve, ja oainnáhusat ledje uhccán. ₂De oktii Eli lei veallámin sajistis. Son lei nu čalmmehuvvan ahte illá šat oinnii. ₃Ipmila lámpá ii lean velá čáskaduvvon, ja Samuel lei veallámin Hearrá tempelis, gos Ipmila árka lei. ₄Dalle Hearrá čuorvvui Samuela. Samuel vástidii: “Dás mun lean,” ₅viegai Eli lusa ja dajai: “Dás mun lean; almma don rávket mu?” Muhto Eli vástidii: “In mun rávkan du. Mana fas veallánit.” De Samuel máhcai sadjásis. ₆Hearrá čuorvvui ođđasis: “Samuel!” Samuel čuožžilii, manai Eli lusa ja dajai: “Dás mun lean; almma don rávket mu?” Muhto Eli vástidii: “Bártnážan, in mun rávkan du. Mana fas veallánit!” ₇Samuel ii velá dovdan Hearrá, iige Hearrá lean velá sárdnon sutnje. ₈De Hearrá čuorvvui Samuela goalmmát geardde. Samuel čuožžilii, manai Eli lusa ja dajai: “Dás mun lean; almma don rávket mu?” Dalle Eli ipmirdii ahte Hearrá lei čurvon bártnáža, ₉ja son dajai Samuelii: “Mana fas veallánit. Jos muhtun vel čuorvu du, de vástit ná: Sártno, Hearrá, du bálvaleaddji gullá.” De Samuel manai fas veallánit sadjásis.

₁₀Dalle Hearrá bođii, orustii su ovdii ja čuorvvui dego ovddit háviidge: “Samuel, Samuel!” Dalle Samuel vástidii: “Sártno, du bálvaleaddji gullá.” ₁₁Hearrá celkkii Samuelii: “Mun dagan Israelis dakkár dagu ahte juohkehaččas gii dan gullá, goappašagat bealjit čudjet. ₁₂Dan beaivvi mun dagan Elii ja su sohkii buot maid lean áitán dahkat. Buot ollašuvvá, álggu rájes gitta loahpa rádjái. ₁₃Mun lean dieđihan sutnje ahte mu duopmu su soga vuostá bissu fámus agálaš áigái, dan vearredagu dihte maid son dagai go son ii ráŋgon bártniidis, vaikko diđii ahte soai badjelgeahčaiga mu. ₁₄Dan dihte mun lean vurdnon ahte eai oaffarat eaige attáldagat goassege soabat Eli soga suddovealggi.”

₁₅Samuel veallái sajistis iđida rádjái ja rabai de Hearrá viesu uvssaid. Son ii duostan muitalit Elii iežas oainnáhusa, ₁₆muhto Eli rávkkai su: “Samuel, bártnážan!” “Dás mun lean,” Samuel vástidii. ₁₇Eli jearai: “Maid son sártnui dutnje? Ale fal čiega dan mus. Ipmil ráŋggáštehkos du dál ja álo, jos don čiegat mus sánige buot das maid son sártnui dutnje.” ₁₈Dalle Samuel muitalii sutnje buot iige čiehkan maidege, ja Eli dajai: “Son lea Hearrá. Son dahká maid atná buorrin.”

₁₉Go Samuel stuorui, de Hearrá lei suinna ja divttii buot su sániid ollašuvvat. ₂₀Nu oppa Israel, Dana rájes gitta Beer Šeba rádjái, oahpai diehtit ahte Samuelii lei oskkilduvvon doaibmat Hearrá profehtan. ₂₁Hearrá almmustuvai ain Šilos ja almmuhii doppe sánis Samuelii.