1. Samuelgirji 5

₁Filistalaččat válde Ipmila árkka ja dolvo dan Eben Eseris Ašdodii. ₂Doppe sii bidje dan Dagona tempelii Dagona báldii. ₃Árrat iđedis Ašdoda olbmot fuobmájedje ahte Dagon lei gopmut eatnamis Hearrá árkka ovddas. Sii bidje Dagona fas sadjásis. ₄Maŋit iđida Dagon lei fas gopmut eatnamis Hearrá árkka ovddas. Dagona oaivi ja gieđat ledje doddjon šielmmá vuostá. Dagonis lei báhcán dušše gorut. ₅Dan dihte vel odnege eai Dagona báhpat eaige dat geat fitnet Dagona tempelis Ašdodis, duolmmas šielbmái.

₆Hearrá giehta dettii lossadit ašdodlaččaid gávpogis ja dan birrasis; son suorggahii sin ja časkkii sidjiide buhkkuid. ₇Go Ašdoda olbmát oidne mii dáhpáhuvai, de sii dadje: “Israela Ipmila árka ii oaččo leat min luhtte, danin go su giehta áŧesta garrasit min ja min ipmila Dagona.” ₈Sii rávke filistalaččaid oaivámuččaid ja jerre sis: “Maid mii dahkat Israela Ipmila árkkain?” Sii vástidedje: “Ipmila árka galgá sirdojuvvot Gatii.” Nu sii sirde árkka Gatii, ₉muhto go dat bođii dohko, de Hearrá giehta deaivvai gávpogii. Šattai suorganeapmi ja moivi, danin go Hearrá časkkii buohkaid, sihke stuorráid ja smávváid, nu ahte sidjiide ihte buhkkot. ₁₀De sii dolvo Ipmila árkka Ekronii. Muhto go dat bođii dohko, de Ekrona olbmát čurvo heađis: “Dál sii leat sirdán Israela Ipmila árkka deike goddit min ja buot min olbmuid!” ₁₁Sii rávke filistalaččaid oaivámuččaid ja dadje: “Vuolggahehket Israela Ipmila árkka dan báikái gosa dat gullá! Muđui dat goddá min buohkaid.” Oppa gávpot lei dohppehallan jápminballui, nu lossadit Hearrá giehta dettii dan. ₁₂Daidda geat eai jápmán, ihte dievva buhkkot, ja sin bárgun badjánii albmái.