1. Samuelgirji 6

₁Go Hearrá árka lei leamaš filistalaččaid eatnamis čieža mánu, ₂de filistalaččat rávke iežaset báhpaid ja einnosteddjiid ja jerre: “Maid mii dahkat Hearrá árkkain? Muitalehket midjiide, mainna lágiin mii galgat vuolggahit dan dohko gosa dat gullá.” ₃Sii vástidedje: “Jos dii vuolggahehpet Israela Ipmila árkka eret, de allet vuolggat dan almmá attáldagaid haga; dii fertebehtet addit sutnje buhtadusa. Dalle dii buorránehpet, ja dii oažžubehtet diehtit manin son ii heaitte áŧesteames din.” ₄Filistalaččat jerre: “Maid mii attášeimmet sutnje buhtadussan?” Báhpat ja einnosteaddjit vástidedje: “Vihtta gollebuhkko ja vihtta gollesáhpána, filistalaččaid oaivámuččaid logu mielde. Seammá giksi lea deaividan din buohkaid, maiddái din oaivámuččaid. ₅Ráhkadehket govvosiid buhkkuineattet ja sáhpániin mat billistit din eatnama, ja nu addet gudni Israela Ipmilii. Dalle son sáhttá heaitit áŧesteames din ja din ipmiliid ja din eatnama. ₆Manne dii buoššudehpet váimmu, nugo egyptalaččat ja farao dahke? Go sii ledje muosáhan Hearrá fámu, de sii šadde luoitit israellaččaid ja diktit sin mannat. ₇Ráhkadehket ođđa vovnnaid ja váldet guokte easkkaguoddán gusa maid niskái geasis ii leat boahtán. Geassastehket gusaid vovnnaid ovdii, muhto váldet gálbbiid gusain eret ja dolvot ruoktot. ₈Bidjet dasto Hearrá árkka vovnnaide. Gollegovvosiid maid dii addibehtet sutnje buhtadussan, galgabehtet bidjat skáhppui árkka báldii, ja bidjet dasto árkka mannat. ₉De galgabehtet dárkot árkka: Jos dat manná Bet-Šemeša guvlui, de Hearrá lea dagahan dán stuorra lihkuhisvuođa midjiide. Jos ii, de mii diehtit ahte su giehta ii leat časkán min, muhto visot dát lea dáhpáhuvvan midjiide soaittáhagas.”

₁₀Filistalaččat dahke nu. Sii válde guokte easkkaguoddán gusa ja geassastedje daid vovnnaid ovdii, muhto daid gálbbiid sii dolvo ruoktot. ₁₁De sii bidje vovnnaide Hearrá árkka ja maiddái skáhpu man siste ledje gollesáhpánat ja buhkkuid govvosat. ₁₂Gusat vulge njuolgga Bet-Šemeša guvlui ja muhko go manne, eaige dat spiehkastan eai olgeš eaige gurut beallái. Filistalaččaid oaivámuččat manne daid maŋis gitta Bet-Šemeša eatnamiid rádjái. ₁₃Bet-Šemeša olbmot ledje leagis čuohppamin nisuid. Go sii geahčastedje, de sii áice árkka, ja sii illosedje go oidne dan. ₁₄Vovnnat bohte bet-šemešlaš Josua beldui ja bisánedje stuorra geađggi lusa. Sii smáhkkejedje vovdnamuoraid ja oaffarušše gusaid boaldinoaffarin Hearrái. ₁₅Levilaččat válde vuolás Hearrá árkka ja skáhpu man siste ledje gollebiergasat, ja sii bidje daid stuorra geađggi ala. Bet-Šemeša ássit oaffarušše dan beaivvi boaldinoaffariid ja njuovvanoaffariid Hearrái. ₁₆Filistalaččaid vihtta oaivámučča oidne buot dan, ja sii máhcce dakka dan beaivvi Ekronii.

₁₇Gollebuhkkuin maid filistalaččat adde Hearrái buhtadussan, lei okta Ašdoda nammii, okta Gaza nammii, okta Aškelona nammii, okta Gata nammii ja okta Ekrona nammii. ₁₈Gollesáhpánat ledje seammá ollu go dat filistalaččaid gávpogat maid dat vihtta oaivámučča ráđđejedje; dat ledje ladnegávpogat maid birra ledje smávva báikkit. Stuorra geađgi man ala Hearrá árka biddjojuvvui, lea ain odnege Josua bealddus Bet-Šemešis.

₁₉Muhto Bet-Šemeša ássiin dušše Jekonja sohka ii illudan ovttas earáiguin go oidne Hearrá árkka. Dan dihte Hearrá gottii sis čiežalohkása. Álbmot doalai váidalusaid dan jámu dihte maid Hearrá lei dagahan. ₂₀Bet-Šemeša olbmot jerre: “Gii sáhttá ceavzit Hearrá, dan bassi Ipmila, muođuid ovddas? Gii váldá vuostá árkka, nu ahte dat manná dáppe eret?” ₂₁Sii vuolggahedje áirasiid Kirjat-Jearimii dadjat: “Filistalaččat leat máhcahan Hearrá árkka. Bohtet viežžat dan dáppe!”