1. Samuelgirji 7

₁Dalle Kirjat-Jearima olbmát bohte viežžat Hearrá árkka. Sii dolvo dan Abinadaba vissui mii lei dievás, ja vihahedje su bártni Elasara atnit fuola Hearrá árkkas.

₂Lei gollan guhkes áigi, guoktelogi jagi, dan rájes go árka lei boahtán Kirjat-Jearimii. Dalle oppa Israel ozai Hearrá muođuid. ₃Samuel dajai sidjiide: “Jos dii duođaid dáhttubehtet jorgalit Hearrá beallái, de dii fertebehtet jávkadit vieris ipmiliid ja Astarte-ipmiliid. Sojahehket váimmu Hearrá beallái ja bálvalehket aivvestassii su. Dalle son beastá din filistalaččaid gieđas.” ₄Dalle israellaččat jávkadedje Baal-ipmiliid ja Astarte-ipmiliid ja bálvaledje aivvestassii Hearrá.

₅Samuel gohčui israellaččaid čoagganit Mispai, vai beassá rohkadallat Hearrá sin ovddas. ₆Go sii ledje čoagganan Mispai, de sii goivo čázi ja golggahedje dan Hearrá muođuid ovdii. Sii fástudedje dan beaivvi ja dovddastedje suttuset Hearrái. Mispas Samuel dubmii israellaččaid.

₇Go filistalaččat gulle ahte israellaččat ledje čoagganan Mispai, de sin oaivámuččat vulge soahtat israellaččaiguin. Go israellaččat gulle dan, de sii ballájedje filistalaččain ₈ja dadje Samuelii: “Ale heaitte čuorvumis Hearrái, min Ipmilii, vai son beastá min filistalaččaid gieđas.” ₉Dalle Samuel válddii njammilábbá ja oaffarušai dan boaldinoaffarin, ollesoaffarin Hearrái. Son čuorvvui Hearrá israellaččaid ovddas, ja Hearrá vástidii su rohkadussii. ₁₀Go Samuel lei oaffaruššamin boaldinoaffara, de filistalaččat fallehedje ja ledje lahkaneamen Israela. Muhto dalle Hearrá divttii bajána čeargut stuorra jamain filistalaččaid badjel ja moivii sin. Sii vuoittáhalle israellaččaide ₁₁geat vulge Mispas ja doarridedje filistalaččaid gitta Bet-Kara guovllu rádjái ja časke sin. ₁₂Samuel válddii geađggi ja ceggii dan Mispa ja Šena gaskii ja gohčui dan Eben Eserin. Son celkkii: “Dán rádjái Hearrá lea veahkehan min.”

₁₃Filistalaččat ledje dal vuoliduvvon, eaige sii šat bahkken Israela eatnamiidda. Hearrá giehta dettii filistalaččaid lossadit nu guhká go Samuel elii. ₁₄Israel oaččui fas daid gávpogiid maid filistalaččat ledje váldán, Ekronis gitta Gatii, ja eatnamat mat gulle dáidda gávpogiidda, besse friddjan. Israela ja amorlaččaid gaskkas lei maid ráfi.

₁₅Samuel dubmii Israela nu guhká go elii. ₁₆Juohke jagi son finai Betelis, Gilgalis ja Mispas, ja buot dain báikkiin son dubmii israellaččaid. ₁₇Dasto son máhcai Ramai. Doppe son ásai, ja doppe son dubmii Israela. Dohko son maid huksii áltára Hearrái.