2. Muitalusaid girji 12

₁Go Rehabeama gonagasvuohta lei nanusmuvvan ja su váldi givron, de son hilggui Hearrá lága, ja oppa Israel oktan suinna.

₂Rehabeama viđát ráđđenjagi Šišak, Egypta gonagas, fallehii Jerusalema. Nu dáhpáhuvai danin go israellaččat ledje hilgon Hearrá. ₃Šišakis ledje duhátguoktečuođi soahtevovnna ja guhttalogiduhát vovdnasoahteolbmá, ja son buvttii Egyptas maiddái mearihis ollu libyalaččaid, sukkilaččaid ja nubialaččaid. ₄Son válddii Juda ladnegávpogiid ja bođii gitta Jerusalema rádjái.

₅Go Šišak lei lahkoneamen Jerusalemii, de Juda oaivámuččat ledje čoagganan Jerusalemii Rehabeama lusa. Profehta Šemaja bođii dohko ja dajai sidjiide: “Ná cealká Hearrá: ‘Go dii lehpet hilgon mu, de mun hilggun din ja attán din Šišaka gihtii.’” ₆Dalle Israela oaivámuččat ja gonagas vuollánedje ja dadje: “Hearrá lea vuoigatlaš.” ₇Go Hearrá oinnii ahte sii vuolidedje iežaset, de Hearrá sátni bođii Šemajai: “Go sii vuolidit iežaset, de mun in duššat sin, muhto divttán sin fargga gáddjojuvvot. Mun in divtte iežan moari deaividit Jerusalema, Šišak ii duššat dan. ₈Sii šaddet goit su bálvaleaddjin vai ohppet diehtit mo lea bálvalit mu ja mo lea bálvalit vieris gonagasriikkaid.”

₉Egypta gonagas Šišak fallehii Jerusalema ja rievidii buot divrras dávviriid sihke Hearrá tempelis ja gonagasa šloahtas. Son válddii visot, maiddái gollegalbbaid maid Salomo lei duddjohan. ₁₀Daid sadjái gonagas Rehabeam duddjohii bronsagalbbaid maid son oskkildii heaggafávttaidis oaivámužžii, daid geat fáktejedje gonagasa šloahta uvssa. ₁₁Juohke háve go gonagas manai Hearrá tempelii, de heaggafávttat maid manne dohko ja gudde galbbaid, ja de máhcahedje daid fas fáktalatnjii. ₁₂Danin go Rehabeam vuollánii, de Hearrá moarri jorggihii sus eret, iige son časkojuvvon oalát. Ja leihan Judas maid juoga buorre.

₁₃Gonagas Rehabeama váldi Jerusalemis nanusmuvai, ja son ráđđii ain doppe. Son lei njealljelogiovttajahkásaš go šattai gonagassan, ja son ráđđii čiežanuppelohkái jagi Jerusalemis, dan gávpogis maid Hearrá lei válljen buot Israela čearddain iežas nama ássanbáikin. Su eadni lei ammonlaš Naama. ₁₄Rehabeam dagai dakkára mii lei bahá, danin go son ii ohcan Hearrá olles váimmus.

₁₅Mii muđui lea muitalit Rehabeamis, álggu rájes gitta loahpa rádjái, lea čállojuvvon profehta Šemaja ja oaidni Iddo muitalusaid girjjiide, ja dain lea maid su sohkalogahallan. Rehabeama ja Jeroboama gaskkas lei soahti geažos áigge. ₁₆Rehabeam manai vuoiŋŋadit áhčiidis lusa, ja son hávdáduvvui Davida gávpogii. Su maŋŋil šattai gonagassan su bárdni Abia.