2. Muitalusaid girji 16
1Asa golbmalogiguđát ráđđenjagis Israela gonagas Baša fallehii Juda ja nannegođii Rama, vai beassá botket Juda gonagasa Asa johtingeainnuid. 2Dalle Asa válddii Hearrá tempela ja gonagasa šloahta dávvirgámmáriin silbba ja golli ja vuolggahii daid Arama gonagassii Ben-Hadadii Damaskusii. Son cealkkihii gonagassii: 3“Munno gaskkas lea lihttu, nugo lei munno áhčiid gaskkasge. Mun vuolggahan dutnje dán silbba ja golli; rihko dál lihtot mii dus lea Israela gonagasain Bašain, vai son heaitá áŧesteames mu.” 4Ben-Hadad dagai nu mo gonagas Asa siđai. Son vuolggahii soahteoaivámuččaidis Israela gávpogiid vuostá, ja sii válde Ijona, Dana ja Abel-Majima ja buot Naftali vuorkágávpogiid. 5Go Baša gulai dan, de son heittii nannemis Rama. 6Dalle gonagas Asa doalvvui dohko buot Juda olbmáid, ja sii fievrridedje doppe geđggiid ja hirssaid maid Baša lei atnán nannenbargguin. Daiguin Asa nannii Geba ja Mispa.7Daid áiggiid bođii oaidni Hanani Juda gonagasa Asa lusa ja dajai sutnje: “Danin go leat dorvvastan Arama gonagassii itge Hearrái, Ipmilasat, de Arama gonagasa soahteveahka vealtá šaddamis du gihtii. 8Nubialaččain ja libyalaččain lei stuorra soahteveahka ja hui ollu soahtevovnnat ja vovdnasoahteolbmát, muhto go don dorvvastit Hearrái, de son attii sin du gihtii. 9Hearrá čalmmit mannet miehtá eatnama, vai son sáhttá gievrudit daid geat bálvalit su olles váimmus. Dál don leat meannudan jierpmeheamit, ja dán rájes don šattat álo soahtat.” 10Asa moaráhuvai oaidnái ja bijai su giddagassii, son lei nu suhttan. Daid áiggiid son meannudii garrasit maiddái soames eará olbmuiguin.
11Mii muđui lea muitalit Asa áiggi dáhpáhusain, álggu rájes gitta loahpa rádjái, lea čállojuvvon Juda ja Israela gonagasaid girjái. 12Golbmalogiovccát ráđđenjagistis Asa buohccái bahás juolgebuohcuvuhtii. Buohcuvuohtasisge son ii goit ohcan veahki Hearrás, muhto dálkkasteddjiin. 13Asa manai vuoiŋŋadit áhčiidis lusa; son jámii njealljelogivuosttaš ráđđenjagistis. 14Son hávdáduvvui hávdái maid son lei čuolahan iežas várás Davida gávpogii, ja biddjojuvvui sadjái mas ledje máistagat ja juohkelágán urttasseaguhusat. Su gudnin cahkkehuvvui hui stuorra dolla.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
