2. Muitalusaid girji 21

₁Jošafat manai vuoiŋŋadit áhčiidis lusa, ja son hávdáduvvui áhčiidis báldii Davida gávpogii. Su maŋŋil gonagassan šattai su bárdni Joram.

₂Jorama vieljat ledje Asarja, Jehiel, Sakarja, Mikael ja Šefatja. Sii buohkat ledje Israela gonagasa Jošafata bártnit. ₃Sin áhčči lea addán sidjiide ollu attáldagaid, silbba, golli ja divrras dávviriid ja velá ladnegávpogiid Judas. Muhto gonagasvuođa son attii Joramii, danin go Joram lei vuosttašriegádeaddji.

₄Go Joram lei čohkánan áhčis truvdnui ja nannen gonagasvuođas, de son gottii buot vieljaidis ja soames Israela oaivámuččaid. ₅Joram lei golbmalogiguovttejahkásaš go šattai gonagassan, ja son ráđđii Jerusalemis gávcci jagi. ₆Son vádjolii Israela gonagasaid geainnuid. Sus lei áhkkán Ahaba nieida, ja Ahaba soga láhkái son dagai dan mii lea bahá Hearrá čalmmiin. ₇Hearrá ii dattetge dáhtton duššadit Davida soga, danin go son lei dahkan lihtu Davidiin ja lohpidan guođđit Davidii ja su nállái lámppá agálaš áigái. ₈Jorama áigge Edom stuimmáskii Juda vuostá ja válljii alccesis gonagasa. ₉Dalle Joram lihkkasii oaivámuččaidisguin ja soahtevovnnaidisguin ihkku ja časkkii edomlaččaid, geat ledje birastahttán su ja soahtevovdnaoaivámuččaid. ₁₀Edom goit beasai Juda gieđas iige stuimmi maŋŋil šat lean Juda válddis. Seammá áigge maiddái Libna stuimmáskii Juda vuostá, danin go Joram lei hilgon Hearrá, áhčiidis Ipmila. ₁₁Joram ráhkadii oaffarbáikkiid Juda gávpogiidda, fillii Jerusalema ássiid bálvalit eahpeipmiliid ja hohkahii Juda jorraleapmái.

₁₂De Joram oaččui profehta Elias dákkár reivve: “Ná cealká Hearrá, áhčát Davida Ipmil: ‘Don it leat vádjolan áhčát Jošafata itge Juda gonagasa Asa geainnuid, ₁₃muhto leat vádjolan Israela gonagasaid geainnuid ja fillen Juda ja Jerusalema ássiid bálvalit eahpeipmiliid Ahaba soga láhkái. Don leat goddán vieljaidat, áhčát bártniid, geat ledje buorebut go don. ₁₄Dan dihte Hearrá časká garrasit du álbmoga, du bártniid, du áhkáid ja buot du opmodaga. ₁₅Du iežat giksin šaddá garra dávda, siskelušbuozalvas mii maŋimuš oažžu du čoliid boahtit olggos.’”

₁₆Hearrá bođđii Jorama vuostá filistalaččaid ja daid arabialaččaid geat ásse nubialaččaid lahka. ₁₇Sii fallehedje Juda, bahkkejedje eatnamii ja válde buot mii lei gonagasa šloahtas. Sii dolvo maiddái gonagasa bártniid ja áhkáid, nu ahte sutnje bázii dušše Joahas, nuoramus bárdni. ₁₈Buot dan maŋŋil Hearrá časkkii Jorama buorránmeahttun siskelušbuozalvasain. ₁₉Loahpas, moatti jagi geažes, su siskilušat bohte olggos buozalvasa geažil, ja son jámii gáfat bákčasiidda. Álbmot ii cahkkehan dola su gudnin, nugo lei dahkan su áhčiid gudnin.

₂₀Joram lei golbmalogiguovttejahkásaš go šattai gonagassan, ja son ráđđii Jerusalemis gávcci jagi. Go son jámii, de ii oktage váillahan su. Son hávdáduvvui Davida gávpogii, muhto ii gonagasaid hávdái.