Ahas Juda gonagassan
1Ahas lei guoktelogijahkásaš go šattai gonagassan, ja son ráđđii Jerusalemis guhttanuppelohkái jagi. Son ii dahkan dan mii lei riekta Hearrá čalmmiin, nugo su áhčči David lei dahkan. 2Son vádjolii Israela gonagasaid geainnuid ja dagai maid leikejuvvon govaid Baal-ipmiliidda. 3Son oaffarušai Ben-Hinnoma leagis ja bijai bártniidis mannat dola čađa daid álbmogiid fasttes vieruid mielde, maid Hearrá lei ádján eret israellaččaid ovddas. 4Son maid oaffarušai ja bolddii suovvasiid oaffarbáikkiin ja dieváin ja juohke rudnes muora vuolde.
5Hearrá, su Ipmil, attii su aramealaččaid gonagasa gihtii, ja aramealaččat časke su. Sii válde hui ollu su olbmáid fáŋgan ja dolvo sin Damaskusii. Hearrá attii su maiddái Israela gonagasa gihtii, ja son vuoittáhalai sutnje bahás. 6Pekah, Remalja bárdni, gottii ovtta beaivvis čuođiguoktelogiduhát jálus soahteolbmá Judas. Nu dáhpáhuvai danin go Juda álbmot lei hilgon Hearrá, áhčiidis Ipmila. 7Sikri, efraimlaš soahtesáŋgár, gottii gonagasa bártni Maaseja, bajimus eatnanhearrá Asrikama ja gonagasa lagamus olbmá Elkana. 8Israellaččat válde vieljaineaset fáŋgan guoktečuođiduhát olbmo, nissoniid, bártniid ja nieiddaid, ja sii rievidedje maiddái ollu sállaša ja dolvo dan Samariai.
9Samarias lei Hearrá profehta gean namma lei Oded. Son manai soahteveaga ovddal ja dajai soahteolbmáide: “Hearrá, din áhčiid Ipmil, lea moaráhuvvan Judai, ja danin son lea addán sin din gihtii. Muhto vašši mainna dii lehpet goddán sin, ollá gitta albmái. 10Ja dál dii vel áigubehtet bágget Juda ja Jerusalema olbmáid ja nissoniid iežadet šlávvan! Iigo leat nu ahte dii ieža lehpet rihkkon Hearrá, Ipmileattet, vuostá? 11Gullet dál mu ja vuolggahehket ruoktot fáŋggaid, vieljaideattet! Muđui Hearrá buolli moarri deaivida din.” 12Dalle loaiddastedje Efraima oaivámuččat Asarja, Johanana bárdni, Berekja, Mešillemota bárdni, Hiskia, Šalluma bárdni, ja Amasa, Hadlaja bárdni, daid ovdii geat ledje máhccamin soađis. 13Sii dadje: “Allet buvtte fáŋggaid deike! Min sivalašvuohta Hearrá ovddas lea stuoris ja Hearrá buolli moarri lea min badjelis. Áigubehtetgo dii vel lasihit min suttuid ja sivalašvuođa?” 14Dalle soahteolbmát luite fáŋggaid luovos ja guđđe sállaša oaivámuččaid ja oppa čoakkalmasa oaidnut. 15Olbmát geat namahuvvojedje dan doibmii, atne váras fáŋggaid. Sii bivttastedje sin geat ledje álás ja adde sidjiide sállašis biktasiid ja gápmagiid. Sii adde sidjiide borrat ja juhkat, vuide sin oljjuin ja loktejedje áseniid čielgái daid geat eai nagodan vázzit. De sii dolvo sin Jerikoi, Pálbmagávpogii, sin vieljaid lahka. Ieža sii máhcce Samariai.
16Daid áiggiid gonagas Ahas bijai sáni Assyria gonagassii ja bivddii sus veahki, 17danin go maiddái edomlaččat ledje fallehan Juda, časkán dan soahteveaga ja váldán fáŋggaid. 18Filistalaččatnai ledje fallehan Juda gávpogiid Šefelas ja Negevis. Sii ledje váldán Bet-Šemeša, Ajalona ja Gederota, ja maiddái Soko, Timna ja dan birasbáikkiid ja Gimno ja dan birasbáikkiid ja ledje ássan daidda. 19Hearrá vuolidii Juda dan gonagasa Ahasa dihte, danin go Ahas lei dahkan Juda veaidaláđasin ja lei iešge leamaš oskkáldasmeahttun Hearrái. 20Assyria gonagas Tiglat-Pileser vulggii deaivvadit suinna, muhto fallehiige su iige veahkehan. 21Vaikko Ahas válddii dávviriid Hearrá tempelis, gonagasa šloahtas ja eatnama oaivámuččain ja attii daid Assyria gonagassii, de son ii veahkehan su. 22Dan áiggige go Ahas áŧestuvvui sakka, de son ii jorgalan Hearrá beallái. 23Son oaffarušai Damaskusa ipmiliidda mat ledje vuoitán su, danin go son jurddašii: “Go aramealaččaid gonagasaid ipmilat leat veahkehan sin, de mun oaffarušan daidda, vai dat veahkehivčče munai.” Muhto dat šattai jorralussan sutnje ja oppa Israelii. 24Ahas čohkkii Ipmila tempela biergasiid ja cuvkii daid, dahpai tempela uvssaid ja dagai alccesis áltáriid Jerusalema juohke gáhtačihkii. 25Juohke Juda gávpogii son dagai oaffarbáikkiid vai beassá oaffaruššat eará ipmiliidda, ja nu son moaráhuhtii Hearrá, áhčiidis Ipmila.
26Mii muđui lea muitalit Ahasa áiggi dáhpáhusain ja buot su doaimmain, álggu rájes gitta loahpa rádjái, lea čállojuvvon Juda ja Israela gonagasaid girjái. 27Ahas manai vuoiŋŋadit áhčiidis lusa ja hávdáduvvui Jerusalemii, muhto ii gonagasaid hávdái. Su maŋŋil šattai gonagassan su bárdni Hiskia.
