2. Muitalusaid girji 5

₁Go Salomo lei ožžon fálmmasin buot dujiid maid son lei duddjohan Hearrá tempela várás, de son buvttii tempelii biergasiid maid su áhčči David lei basuhan Hearrái. Silbba, golli ja eará dávviriid son bijai tempela dávvirgámmáriidda.

₂De Salomo rávkkai lusas Jerusalemii Israela vuorrasiid ja buot Israela čearddaid ja sogaid oaivámuččaid. Sii galge viežžat Hearrá lihtuárkka Sionis, Davida gávpogis. ₃Buot israellaččaid oaivámuččat čoagganedje gonagasa lusa jagi čihččet mánu basiide. ₄Go buot Israela vuorrasat ledje boahtán, de levilaččat loktejedje árkka sajistis. ₅Sii gudde árkka ja almmustusgoađi ja buot goađi bassi biergasiid tempelii, ja guoddin ledje levilaččat ja báhpat. ₆Gonagas Salomo oaffarušai árkka ovddas, ja su birra čuoččui oppa Israela searvegoddi. Gonagas ja álbmot oaffarušše nu ollu sávzzaid ja vuovssáid ahte dat eai lean lohkamis. ₇Báhpat bukte Hearrá lihtuárkka sadjásis tempelgorrii, basimus boššui, kerubaid soajáid vuollái. ₈Kerubaid soaját ledje lebbejuvvon dan báikki badjel gokko árka lei, ja gokče árkka ja dan guoddinstákkuid. ₉Guoddinstákkut ledje nu guhkit ahte daid gežiid sáhtii oaidnit bassi boaššus goara ovddabeallái, muhto ii guhkkelii. Árka lea das vel otná beaivvige. ₁₀Árkka siste ii lean eará go dat guokte távvala maid Moses lei bidjan dasa Horebis, dalle go Hearrá dagai lihtu israellaččaiguin go sii ledje boahtimin Egyptas. ₁₁De báhpat manne olggos bassibáikkis. Buot báhpat geat ledje doppe, juhkosiin beroškeahttá, ledje basuhan iežaset. ₁₂Buot levilaš lávlut, Asaf, Heman, Jedutun ja sin bártnit ja vieljat, ledje gárvodan fiinna beallemasa ja čužžo áltára nuorttabealde symbálat, hárppat ja lyrat gieđas. Sin bálddas ledje čuođiguoktelogi báhpa geat bosso dorvve. ₁₃Dorvebossut ja lávlut álggahedje buohkat oktanaga máidnunlávlaga Hearrái. Dorvvet, symbálat ja eará čuojanasat čuodjagohte, ja lávlut máidnugohte Hearrá: “Son lea buorre, su árbmugasvuohta bistá agálaččat”. Dalle balva devddii Hearrá viesu. ₁₄Báhpat eai sáhttán balvva dihte doaimmahit bálvalusaset, danin go Hearrá hearvásvuohta devddii viesu.