2. Muitalusaid girji 6

₃Gonagas jorggihii álbmogii muođuid ja buressivdnidii oppa Israela searvegotti. Buohkat čužžo, ₄ja Salomo celkkii: “Máidnojuvvon lehkos Hearrá, Israela Ipmil, gii gieđainis lea ollašuhttán dan maid lohpidii áhččásan Davidii, go son celkkii: ₅‘Juo dolin mun bukten iežan álbmoga Egyptas, muhto dán beaivvi rádjái mun in leat válljen Israela čearddaid guovlluin gávpoga gosa huksejuvvošii tempel mu nama ássansadjin, inge leat válljen ráđđejeaddji álbmogasan Israelii. ₆Dál mun lean válljen Jerusalema iežan nama ássansadjin ja Davida iežan álbmoga Israela ráđđejeaddjin.’ ₇Mu áhčči David dáhtui hukset tempela Hearrái, Israela Ipmilii. ₈Muhto Hearrá celkkii áhččásan Davidii: ‘Du áigumuš hukset munnje tempela lea buorre. ₉Muhto don it dattetge hukse tempela. Dan hukse du bárdni gii riegáda dutnje.’ ₁₀Dál Hearrá lea ollašuhttán iežas lohpádusa. Mun lean boahtán áhččán Davida sadjái ja čohkkán Israela truvnnus, nugo Hearrá lea cealkán. Ja mun lean huksen Hearrái, Israela Ipmilii, tempela. ₁₁Dohko mun lean bidjan árkka man siste leat lihtu lágat, dan lihtu maid Hearrá dagai israellaččaiguin.”

₁₂Salomo čuoččui Hearrá áltára luhtte oppa Israela searvegotti ovddas ja lebbii gieđaid. ₁₃Son lei ráhkadan bronsalávddi, viđa állana guhkkosačča, viđa állana govdosačča ja golmma állana allosačča, ja bidjan dan gasku ovdašilju. Oppa Israela searvegotti ovddas son dal lávkii dan ala. Son čippostii, lebbii gieđaid almmi guvlui ₁₄ja celkkii:

Hearrá, Israela Ipmil! Ii leat du lágán ipmil, ii almmis iige eatnama alde. Don bisuhat lihtu ja dagat buori bálvaleddjiidasat, go sii olles váimmus vádjolit du muođuid ovddas. ₁₅Don leat ollašuhttán dan maid lohpidit bálvaleaddjásat Davidii, mu áhččái. Maid du njálbmi sártnui, dan du giehta dagai. Nu lea odne dáhpáhuvvan. ₁₆Hearrá, Israela Ipmil, doala maiddái dan maid don lohpidit bálvaleaddjásat Davidii, mu áhččái, go dadjet: “Álo čohkká Israela truvnnus du soga olmmái, go fal du bártnit dárkojit geainnuset ja ellet mu lága mielde, nugo don leat dahkan.” ₁₇Hearrá, Israela Ipmil! Divtte dál ollašuvvat dán lohpádusa maid sárdnot bálvaleaddjásat Davidii.

₁₈Muhto ásságo Ipmil duođaid eatnama alde olbmuid luhtte? Albmi, velá almmiid almmitge, ii leat doarvái stuoris, mo dasto dát tempel maid mun lean huksen! ₁₉Hearrá, mu Ipmil, jorgal almmatge bálvaleaddját beallái ja gula mu njuoras rohkadusa maid mun rohkadalan du muođuid ovddas. ₂₀Divtte čalmmiidat leat rabastuvvon dán viesu guvlui ijatbeaivái, dan báikki man birra leat cealkán: Dát lea mu nama ássanbáiki. Gula maid du bálvaleaddji rohkadallá dán báikái čalmmiid. ₂₁Gula bálvaleaddját ja álbmogat Israela átnumiid, go mii rohkadallat dán báikái čalmmiid. Vare don gulašit daid ássansadjásat albmái, gulašit ja attášit ándagassii!

₂₂Jos muhtin rihkku nuppi olbmo vuostá ja geatnegahttojuvvo dahkat váli, ja son de dahká váli du áltára ovddas dán tempelis, ₂₃de gula dalle albmái ja atte vuoigatvuođa bálvaleddjiidasat. Dubme sivalačča sivalažžan ja ráŋggáš su su daguid mielde, duođaš sivaheami sivaheapmin ja atte sutnje buhtadusa su sivahisvuođa mielde.

₂₄Jos du álbmot Israel vuoittáhallá vašálažžii danin go lea suddudan du vuostá, muhto de fas jorgala du beallái ja máidnu du nama, rohkadallá ja ánuha dus árpmu dán tempelis, ₂₅de gula dan albmái. Atte ándagassii álbmogasat Israelii dan suttuid ja divtte dan máhccat dán eatnamii maid addet juo min áhčiide.

₂₆Jos albmi lea dahppojuvvon iige boađe arvi, danin go israellaččat leat suddudan du vuostá, ja jos sii dalle goit rohkadallet dán báikái čalmmiid, rámidit du nama ja jorgalit suttusteaset go don vuolidat sin, ₂₇de gula dan albmái ja atte ándagassii bálvaleaddját ja álbmogat Israela suttu. Oahpat sidjiide buori geainnu man sii galget vádjolit, ja divtte arvit eatnamasat maid leat addán iežat álbmogii opmodahkan.

₂₈Jos eatnamii šaddá nealgi dahje boahtá rohttudávda, jos gortnit gurbet ja ástet, jos bohtet rásselohkut ja máđut, jos vašálaččat birastahttet gávpogiid dahje jos boahtá mii ihkinassii buohcuvuođaid dahje givssiid, ₂₉de gula dalle ássansadjásat albmái juohke rohkadusa ja átnuma maid ovttaskas olbmot dahje oppa Israel rohkadallá, danin go juohkehaš dovdá iežas váivvi ja bákčasa, ja lebbe gieđaid dán viesu guvlui, ₃₀de gula dan átnumuša albmái gos čohkkát truvnnustat. Atte dalle sidjiide ándagassii ja atte juohkehažžii su vádjoleami mielde, danin go don dovddat sin váimmu, dušše don dovddat buot olbmuid váimmu. ₃₁De sii ballet dus ja vádjolit du geainnuid nu guhká go ellet dán eatnamis maid don leat addán min áhčiide.

₃₂Maiddái vierroolbmot vedjet boahtit gáiddus eatnamis. Sii eai gula du álbmogii Israelii, muhto du stuorra namma ja du gievrras ja bajiduvvon giehta leat beaggán sidjiide. Go vierroolmmoš boahtá ja rohkadallá dán tempelii čalmmiid, ₃₃de gula dan albmái gos čohkkát truvnnustat, ja daga dan maid son átnu dus. Dalle buot eatnama álbmogat ohppet dovdat du nama ja ballet dus du álbmoga Israela láhkái, ja sii ipmirdit ahte dát tempel maid mun lean huksen, lea basuhuvvon du nammii.

₃₄Jos don vuolggahat iežat álbmoga soahtat vašálaččaideasetguin, ja sii rohkadallet du dán gávpogii čalmmiid maid don leat válljen ja dan vissui čalmmiid maid mun lean huksen du nammii, ₃₅de gula albmái sin rohkadusa ja átnuma ja veahket sin oažžut vuoigatvuođa.

₃₆Jos sii suddudit du vuostá – danin go ii leat dakkár olmmoš gii ii suddut – ja don moaráhuvat sidjiide ja attát sin vašálaččaid gihtii, ja sii dolvojuvvojit fáŋgan eará eatnamii, guhkás dahje lahka, ₃₇muhto sii de fáŋgavuođas gáhtet, atnot dus árpmu ja dadjet: “Mii leat suddudan, mii leat dahkan vearrut ja leamaš ipmilmeahttumat”, ₃₈ja jos sii dalle, dan eatnamis gos leat fáŋgan, jorgalit du beallái oppa váimmus ja oppa sielus ja rohkadallet iežaset eatnamii čalmmiid, dán eatnamii maid don leat addán sin áhčiide, ja dán gávpogii čalmmiid maid don leat válljen ja dán vissui čalmmiid maid mun lean huksen du nammii, ₃₉de gula dalle albmái gos čohkkát truvnnustat, sin rohkosa ja átnuma ja veahket sin oažžut vuoigatvuođa. Atte álbmogasat ándagassii dan ahte sii leat suddudan du vuostá. ₄₀Mu Ipmil, rabas čalmmiid ja beljiid ja gula daid rohkosiid maid olbmot rohkadallet dán báikkis. ₄₁De čuožžil, Hearrá Ipmil,