2. Korinta 10

₁Mun, Paulus, ávžžun din Kristusa vuollegašvuođain ja buorrevuođain, mun gii lean gul din luhtte vuollegaš muhto roahkkat go sártnun didjiide mátkki duohken: ₂Allet bágge mu atnit dán roahkkatvuođa din luhtte – mun oainnat áiggun fallehit duostilit muhtumiid geat lohket min áigumušaid máilmmálažžan. ₃Mii gal eallit máilmmis, muhto mii eat soađa máilmmi láhkái. ₄Min vearjjut eai leat olbmuid vearjjut, muhto dain lea Ipmila fápmu duššadit ladniid. Mii duššadit jierpmi árvalusaid ₅ja buot čeavláivuođa mii čuožžila Ipmila dieđu vuostá. Mii dahkat juohke jurdaga Kristusa gulolaš fáŋgan ₆ja leat gárvásat ráŋggáštit buot eahpegulolašvuođa dallán go dii ieža lehpet šaddan ollásit gulolažžan.

₇Dii oaidnibehtet dušše áššiid olggobeali. Jos muhtun lea vissis dasa ahte gullá Kristusii, de son galgá jurddašit ahte seammá ládje maiddái mii gullat Kristusii. ₈Hearrá lea addán munnje válddi ráhkadit din iige arvvahuhttit, ja vaikko mun dáhtošin rámádallat iežan válddis velá eambbo, de mun in šattaše heahpadii. ₉Allet gátte ahte mun lean dušše baldimin din girjjiidanguin. ₁₀Muhtumathan dadjet: “Su girjjit gal leat garrasat ja fámolaččat, muhto go son boahtá deike, de son lea headju ja su sártniin ii oktage beroš.” ₁₁Dat geat ná oaivvildit, fertejit jurddašit ahte dalle go mun lean din luhtte, de mun barggan seammá ládje go maid lean buktán ovdan girjjiinan dalle go lean leamaš eret.

₁₂Mii eat duostta lohkat iežamet daid searvái geat máidnot iežaset, eatge veardidit iežamet sin láhkásažžan. Sii čájehit áddemeahttunvuođa go atnet mihttun iežaset olahusaid ja veardidit iežaset dušše iežaset láhkásažžan. ₁₃Mii baicca eat máinno iežamet mearihis láhkái, muhto dan mihtu mielde maid Ipmil lea midjiide addán go mearridii ahte min bargu galgá ollit maiddái din rádjái. ₁₄Mii eat fakŋal beare guhkás, dego eat livčče oppa boahtánge din rádjái; miihan leat buktán Kristusa evangeliuma ovddemus didjiide. ₁₅Mii eat rámádala mearihis láhkái eatge earáid rahčamiin. Mis baicca lea dat doaivu ahte go din osku stuorru, de dii addibehtet midjiide stuorit árvvu dan dihte go leat ollašuhttán dan barggu mii midjiide lea addojuvvon. ₁₆Mii doaivut ahte beassat vel sárdnidit evangeliuma daidda geat ásset dobbelis din, ja ahte sáhttit rámádallat das maid ieža leat dahkan eatge das maid earrásat leat dahkan. ₁₇Dat gii rámádallá, rámádallos Hearrás. ₁₈Luohtehahtti ii leat dat gii ieš máidnu iežas, muhto dat gean Hearrá máidnu.