2. Korinta 2

₁Mun ledjen oainnat mearridan ahte mu galledeapmi din luhtte ii dán háve oaččo dagahit morraša. ₂Jos mun moraštahtán din, de gii dalle mu illudahtášii earret su gean lean moraštahttán? ₃Ja aiddo dan dihte mun čállen nugo čállen, aman šaddat morrašii daid dihte geat galggašedje illudahttit mu. Mun luhtten dasa ahte mu illu lea maiddái din buohkaid illu. ₄Mun čállen didjiide stuorra áŧestusas, váimmobákčasis ja ganjalčalmmiid, in dan dihte vai beasan moraštahttit din, muhto vai áddebehtet man sakka mun ráhkistan din.

₅Jos muhtun lea moraštahttán, de son ii leat moraštahttán dušše mu, muhto din buohkaid – goit muhtun muddui, aman dadjat menddo ollu. ₆Dan olbmui lea doarvái dat ráŋggáštus maid eatnasat leat sutnje juo addán. ₇Dál galgabehtet baicca addit sutnje ándagassii ja jeđđet su, vai son ii áibbas nuondda morrašii. ₈Danne mun ávžžun din fas čájehit sutnje ráhkisvuođa. ₉Dan dihte mun didjiide čállenge vai beasan geahččalit din ja oaidnit, lehpetgo gulolaččat buot áššiin. ₁₀Geasa dii addibehtet ándagassii, dasa munge attán ándagassii. Ja go lean addán ándagassii, jos leš mihkkege maid addit ándagassii, de lean addán ándagassii din dihte Kristusa muođuid ovddas, ₁₁amamet beahtahallat Sáhtánii. Dasgo mii diehtit makkár juonat das leat.

₁₂De mun vulgen Troasii sárdnidit Kristusa evangeliuma, ja doppe munnje rahpasii uksa Hearrá bargui. ₁₃Muhto mu vuoigŋa ii ožžon mášu go in deaivan doppe vielljan Titusa, ja nu mun celken searvegoddái earrodearvvuođaid ja vulgen Makedoniai.

₁₄Giittus lehkos Ipmilii guhte álelassii láide min Kristusa vuoitofárus ja juohke báikkis diktá min lávdadit Kristusa dovdamuša njálgga hája! ₁₅Mii leat Kristusa njálgga hádja mii badjána Ipmila ovdii; dán hája dovdet sihke dat geat bestojuvvojit, ja dat geat šaddet gáđohussii. ₁₆Muhtumiidda dat lea jápminhádja mii doalvu jápmimii, earrásiiddagis eallinhádja mii doalvu eallimii. Muhto gii dasa lea dohkálaš? ₁₇Mii goit eat leat nugo máŋgasat geat vuovdalit Ipmila sáni. Mii sárdnidit sáni Ipmila muođuid ovddas ja Kristusa bálvalusas, vuoigadin ja dakkárin go dat boahtá Ipmilis.