2. Samuelgirji 13

₁ Davida bártnis Absalomis lei čáppa oabbá gean namma lei Tamar, ja Davida bárdni Amnon ráhkásmuvai sutnje. ₂Amnon beanta buohccái oappás Tamara dihte. Muhto go Tamar lei eadneviđá, de Amnona mielas orui veadjemeahttun dahkat sutnje maidege. ₃Amnonis lei Jonadab-nammasaš ustit, Davida vielja Šima bárdni, hui ráđđás olmmái. ₄Jonadab dajai Amnonii: “Manne don nie skurtnját iđedis iđedassii, gonagasa bárdni? Itgo muital munnje?” Amnon vástidii: “Mun lean ráhkásmuvvan Tamarii, vielljan Absaloma oabbái.” ₅Jonadab dajai: “Veallán seŋgii ja dahkalutta buohccin. Go du áhčči boahtá geahččat du, de daja sutnje: ‘Divtte mu oappá Tamara buktit munnje borramuša ja ráhkadit dan mu oaidnut, nu ahte mun beasan borrat dan su gieđas.’”

₆Amnon veallánii ja dahkaluttai buohccin. Go gonagas bođii geahččat su, de Amnon dajai: “Divtte mu oappá Tamara boahtit ja gáhkket munnje moadde gáhku dás mu oaidnut, vai mun beasan borrat daid su gieđas.”

₇Dalle David bijai sáni Tamarii šlohttii: “Mana vieljat Amnona vissui ja ráhkat sutnje borramuša.” ₈Tamar manai vieljas Amnona vissui gos son lei veallámin. Son válddii dáiggi, duhppii dan ja láibbui gáhkuid vieljas oaidnut ja goikadii daid. ₉Muhto go son válddii bánno ja fálai gáhkuid Amnonii, de son biehttaliige borramis ja gohčui: “Olggos dás, juohkehaš!” Go buohkat ledje mannan, ₁₀de Amnon dajai Tamarii: “Buvtte borramuša deike oađđingámmárii, vai mun beasan borrat du gieđas.” Tamar válddii gáhkuid maid lei gáhkken, ja buvttii daid vielljasis oađđingámmárii. ₁₁Muhto go Tamar geigii daid Amnonii vai son beassá borrat, de Amnon dohppiige su ja dajai: “Boađe ja veallá muinna, oabbán!” ₁₂Tamar dajai: “Vielljan, ale heahppášuhte mu! Dakkára ii oaččo dahkat Israelis. Ale daga dakkár fasttes dagu! ₁₃Gosa mun dalle manašin heahpadiinnán? Ja buohkat Israelis anášedje du skealbman. Jeara baicce gonagasas, son ii vissásii gieldde mu dus.” ₁₄Muhto Amnon ii dáhtton gullat su; son lei niidii ilá gievra, illastii su ja veallái suinna veagal.

₁₅De Amnonis cahkiidii stuorra vuostemiella Tamara guovdu, stuorit go ráhkisvuohta mainna son lei ráhkistan su. Son dajai Tamarii: “Lihka ja čáhpot dás!” ₁₆Dalle Tamar dajai sutnje: “Ii nu, vielljan! Jos don dál áját mu eret, de dagat vel stuorit vearredagu go maid juo leat dahkan.” Amnon ii goit dáhtton gullat su, ₁₇muhto rávkkai bálvaleaddjis ja dajai: “Áje olggos dán nissona ja lohkkat uvssa su maŋis!” ₁₈Tamar lei gárvodan guhkessoajat biktasa, dakkára maid gonagasa nieiddat atne olgguldasbivttasin nu guhká go elle ain nieidan. Go bálvaleaddji lei dolvon su olggos ja lohkkadan uvssa su maŋis, ₁₉de Tamar botkkuhii muoldda oaivvi ala, gaikkodii iežas guhkessoajat olgguldasbiktasa, bijai gieđaid oaivvi ala ja manai doppe huikki. ₂₀Su viellja Absalom dajai sutnje: “Leago du viellja Amnon leamaš duinna, oappážan? Sonhan lea du viellja, oro jávohaga dán áššis alege divtte dan čuohcit váibmosat.” Nu Tamar bázii vártnuheapmin ássat vieljas Absaloma vissui. ₂₁Go gonagas David gulai dáid fearániid, de su moarri cahkiidii. ₂₂Muhto Absalom ii dadjan Amnonii ii sánige; son vašuhii su, danin go Amnon lei heahppášuhttán su oappá Tamara.

₂₃Guovtte jagi geažes go Absalomis lei sávzabeaskideapmi Baal Hasoris Efraima lahka, de son bovdii dohko buot gonagasa bártniid. ₂₄Absalom manai gonagasa lusa ja dajai: “Du bálvaleaddjis lea dál sávzabeaskideapmi. Mun bivddán ahte gonagas bálvaleddjiidisguin vuolgá muinna dohko.” ₂₅Muhto gonagas vástidii Absalomii: “Ii nu, bártnážan, eat mii buohkat vuolgge, amamet váivvidit du.” Ja vaikko son ánuhii, de gonagas ii dáhtton vuolgit, muhto buressivdnidii su. ₂₆Dalle Absalom dajai: “Jos don it ieš vuolgge, de divtte goittotge mu vielja Amnona vuolgit.” Gonagas jearai sus: “Manne son galggašii vuolgit?” ₂₇Muhto Absalom ii heaitán ánuheames, ja nu gonagas divttii Amnona ja eará bártniidisge vuolgit. Absalom lágidii gonagaslaš jugalmasaid ₂₈ja gohčui bálvaleddjiidis: “Atnet čalmmis goas Amnon juhkaluvvá ja šaddá movttegis millii. Go mun dajan didjiide: ‘Goddet Amnona’, de časket su jámas. Allet bala, munhan lean gohččon din. Lehket gievrrat ja roahkkadat!” ₂₉Bálvaleaddjit dahke Amnonii nugo Absalom lei gohččon. Dalle buot gonagasa bártnit čuožžiledje ja báhtaredje, iešguhtege mulainis.

₃₀Go sii ledje ain mátkkis, de Davida juvssai sáhka ahte Absalom lei goddán buot gonagasa bártniid iige oktage lean báhcán heggii. ₃₁Dalle gonagas čuožžilii, gaikkodii biktasiiddis ja veallánii eatnamii, ja buot su bálvaleaddjit geat čužžo das, gaikkodedje maid biktasiid. ₃₂Dalle Jonadab, Davida vielja Šima bárdni, dajai: “Hearrán, ale gátte ahte buot gonagasa bártnit leat gottáhallan. Dušše Amnon lea jápmán. Absalom lea smiehttan dán dan beaivvi rájes go Amnon heahppášuhtii su oappá Tamara. ₃₃Allos gonagas jáhkko dan sáhkii ahte buot gonagasa bártnit livčče gottáhallan. Dušše Amnon lea jápmán.”

₃₄Muhto Absalom báhtarii. Fargga várdájeaddji oinnii eatnat olbmuid njiedjamin váris Horonajima geainnu. ₃₅Dalle Jonadab dajai gonagassii: “Geahča, do de bohtet gonagasa bártnit. Nugo du bálvaleaddji lea muitalan, nu lea geavvan.” ₃₆Aiddo go son lei dadjan dan, de gonagasa bártnit ollejedje; sii čirrojedje jitnosit, ja maiddái gonagas ja su bálvaleaddjit čirro bahččagit. ₃₇Absalom báhtarii Gešura gonagasa Talmaja, Ammihuda bártni, lusa. David moraštii guhká bártnis Amnona.

₃₈Absalom lei nappo báhtaran Gešurii, ja doppe son orui golbma jagi. ₃₉Áiggi guhkkodahkii gonagas Davida moraš Amnona jápmima dihte váiddui, ja son ohcalii Absaloma.