2. Samuelgirji 19

₁Joabii muitaluvvui: “Gonagas dušše čierru ja morašta Absaloma.” ₂Dan beaivvi soahteolbmáid vuoitoillu jorai morašin, go sii gulle ahte gonagas morašta bártnis. ₃Olbmát njáhke dan beaivvi gávpogii dego njáhká heahpanemiin veahka mii lea báhtaran soađis. ₄Gonagas lei gokčan muođuid ja čuorvvui alla jienain: “Bártnážan Absalom! Mu iežan bárdni, bártnážan Absalom!” ₅Dalle Joab manai vissui gonagasa lusa ja dajai: “Don leat dál heahppášuhttán buot olbmáidat, vaikko sii odne leat gádjon du heakka ja maiddái du bártniid ja nieiddaid, du áhkáid ja liigeáhkáid heakka. ₆Don ráhkistat vašálaččaidat ja vašuhat daid geat ráhkistit du! Otná beaivvi don dovddahat ahte it ane árvvus it oaivámuččaidat itge olbmáidat. Dál mun dieđán ahte jos mii buohkat livččiimet gahččan, muhto Absalom livččii báhcán heggii, de dat livččii leamaš du mielas vuoigat. ₇Čuožžil dál! Mana olggos ja sártno ustitlaččat olbmáidasat. Mun vuortnun Hearrá nammii ahte jos it mana, de dán ija buot du olbmát guđđet du. Dat livččii dutnje bahát go buot dat bahá maid leat vásihan nuorravuođat rájes gitta dássážii.” ₈Dalle gonagas čuožžilii ja čohkánii portii. Álbmogii almmuhuvvui: “Gonagas čohkká poarttas”, ja buohkat bohte gonagasa lusa.

Israellaččat ledje báhtaran, iešguhtege ruktosis. ₉Israela čearddaid olbmát nággegohte guhtet guimmiideasetguin ja dadje: “Gonagas lea beastán min min vašálaččaid gieđas, son lea gádjon min filistalaččaid gieđas, ja dál son lea báhtaran Absalomis ja šaddan vuolgit eatnamis. ₁₀Muhto Absalom gean mii vuoiddaimet iežamet gonagassan, lea jápmán soahtái. Manin dii ehpet jietnat maidege gonagasa ruovttoluotta viežžamis?”

₁₁Go gonagas David gulai dáid ságaid, de son bijai báhpaguoktái, Sadokii ja Abjatarii, dákkár sáni: “Sárdnu Juda vuorrasiidda ná: Áigubehtetgo dii leat maŋimuččat viežžat gonagasa ruoktot? ₁₂Dii lehpet mu vieljat, mu dákti ja mu oažži. Manne dii livččiidet maŋimuččat viežžat gonagasa ruoktot?” ₁₃Ja cealki Amasai: “Almma don leat mu dákti ja mu oažži? Ipmil ráŋggáštehkos mu dál ja álo, jos don it dán beaivvi rájes šatta mu soahteveagaoaivámužžan Joaba sadjái.” ₁₄Dán láhkái son oaččui buot Juda olbmáid jorgalit beallásis oktan olmmájin, ja sii bidje gonagassii sáni: “Máhca ruoktot oktan buot olbmáidatguin!”

₁₅Nu gonagas vulggii ruoktot ja bođii Jordangáddái. Juda olbmát ledje boahtán Gilgalii gonagasa ovddal, vai besset buktit su Jordana rastá.

₁₆Benjaminlaš Šimi, Gera bárdni, Bahurima olmmoš, gáhčai oktan Juda olbmáiguin gonagasa ovddal. ₁₇Sus ledje mielde duhát benjaminlačča ja vel Siba, Saula bearraša bálvaleaddji, ja su vihttanuppelohkái bártni ja guoktelogi bálvaleaddji. ₁₈Sii ledje mannan rastá gállagis, vai besset veahkehit gonagasa bearraša nuppi beallái ja dahkat maid gonagas anii buorrin. Go gonagas lei vuolgimin rasttildit Jordana, de Šimi, Gera bárdni, luoitádii gonagasa ovdii ₁₉ja ánui: “Hearrá, ale logahala munnje mu rihkkuma alege muitte man bahás du bálvaleaddji rihkui dan beaivvi go mu hearrá ja gonagas vulggii Jerusalemis. Gonagas, ale šat muittaš dan! ₂₀Mun dieđán ahte lean suddudan, ja danin mun lean vuosttamužžan oppa Josefa čearddas boahtán odne mu hearrá ja gonagasa ovddal.” ₂₁Dalle Abišai, Seruja bárdni, dajai: “Iigo Šimi ferte jápmit, go son lea garuhan dan olbmá gean Hearrá lea vuoidan?” ₂₂Muhto David vástidii: “Mii dahkamušaid dudnos lea muinna, Seruja bártnit? Manin doai dál vuosttaldeahppi mu? Ii oktage israellaš goddojuvvo dán beaivvi, go mun fas lean vissis ahte lean Israela gonagas.” ₂₃Ja gonagas dajai Šimii: “Don it jáme.” Ja son vuortnui dan sutnje.

₂₄Mefibošet, Saula áddjut, lei maid boahtán gonagasa ovddal. Son ii lean bassan julggiid, čorgen skávžžáid iige bassan biktasiid gonagasa vuolgima rájes gitta dan rádjái, go gonagas máhcai ráfis ruoktot. ₂₅Go son dal bođii Jerusalemis gonagasa ovddal, de gonagas jearai sus: “Manne don it vuolgán muinna, Mefibošet?” ₂₆Mefibošet vástidii: “Mu hearrá ja gonagas, mu bálvaleaddji behtii mu. Mun sihten su sádelastit alccesan ásena, vai beasan riidet dainna ja vuolgit gonagasa mielde – dasgo mun lean rámbi. ₂₇Muhto son lea sárdnon mu sealggebealde baháid mu birra hearrá gonagassii. Don, mu hearrá ja gonagas, leat goittotge nugo Ipmila eŋgel; daga nu mo don oainnát buorrin. ₂₈Dus livččii leamaš vuoigatvuohta goddit oppa mu áhči soga, muhto don almmatge bidjet bálvaleaddját daid searvái geat borret du beavddis. Mii vuoigatvuođaid mus vel livččii maid mun vel sáhtášin átnut gonagasas?” ₂₉Gonagas dajai sutnje: “Don it šat dárbbaš sárdnut eambbo. Mun gohčun du ja Siba juohkit gaskaneatte du soga eatnamiid.” ₃₀Dalle Mefibošet dajai gonagassii: “Váldos Siba vaikko buot, go juo mu hearrá ja gonagas lea boahtán dearvan ruoktot.”

₃₁Gileadlaš Barsillai lei boahtán Rogelimis ja mieđuštan gonagasa Jordana rastá, vai beassá dahkat doppe earrodearvvuođaid. ₃₂Barsillai lei boares olmmái, gávccilogijahkásaš. Son lei atnán fuola gonagasa birgejumis dan botta go gonagas orui Mahanajimis, dasgo son lei hui jábálaš. ₃₃Gonagas dajai Barsillajii: “Vuolgge donnai muinna, de mun anán dus fuola Jerusalemis.” ₃₄Barsillai vástidii: “Mun lean ilá boaris vuolgit gonagasain Jerusalemii. ₃₅Mun lean dál gávccilogijahkásaš, de earuheaččango šat buori bahás dahje njálggiideažžágo bálvaleaddjásat dat maid son borrá ja juhká dahje gulažango šat olbmáid ja nissoniid lávluma? Manne du bálvaleaddji galggašii leat hearrá gonagassii noađđin? ₃₆Du bálvaleaddji mieđušta gonagasa dušše oanehis gaskka don beallái Jordana. Manne gonagas dagašii munnje dakkár buori dagu? ₃₇Divtte mu máhccat ruoktot, vai oaččun jápmit iežan gávpogii gosa maiddái mu áhčči ja eadni leaba hávdáduvvon. Muhto dá lea du bálvaleaddji Kimham; suova su vuolgit duinna, mu hearrá ja gonagas, ja daga sutnje maid anát buoremussan.” ₃₈Gonagas dajai: “Bohtos Kimham muinna. Mun dagan sutnje maid don sávat. Mun dagan buot maid don mus ánuhat.” ₃₉Dasto oppa álbmot manai Jordana rastá, ja maiddái gonagas rasttildii eanu. Gonagas cummistii Barsillaja ja dagai earrodearvvuođaid, ja Barsillai máhcai ruktosis.

₄₀Gonagas vulggii Gilgala guvlui, ja Kimham vulggii suinna. Oppa Juda álbmot ja bealleoassi Israela álbmogis ledje leamaš mieđušteamen gonagasa Jordana rastá. ₄₁Dalle buot eará israellaččat bohte gonagasa lusa ja dadje sutnje: “Manne min vieljat, Juda olbmát, leat buktán du ja du bearraša ja buot du olbmáid Jordana rastá?” ₄₂De buot Juda olbmát vástidedje israellaččaide: “Danin go gonagas lea okta mis. Manin dii das lehpet suhttan? Leatgo mii borran gonagasa opmodaga dahje skáhppon alcceseamet ovdduid?” ₄₃Israellaččat dadje Juda olbmáide: “Mis lea logi geardái stuorit vuoigatvuohta gonagassii go dis, maiddái Davidii. Manne lehpet olgguštan min. Ja eatgo aiddo mii vuosttažin sárdnon ahte min gonagas galggašii vižžojuvvot ruoktot?” Muhto Juda olbmáid sánit ledje garraseappot go israellaččaid sánit.