2. Samuelgirji 9

₁David jearai: “Leažžágo Saula sogas báhcán oktage, geasa mun sáhtášin leat árbmugas Jonatana dihte?” ₂Saula viesus lei leamaš bálvaleaddji gean namma lei Siba. Son rávkojuvvui Davida lusa, ja gonagas jearai: “Leatgo don Siba?” Ja son vástidii: “Mun lean, hearrá.” ₃Gonagas jearai: “Iigo Saula sogas leat šat báhcán oktage, geasa mun sáhtášin leat árbmugas, dego Ipmil lea árbmugas?” Siba vástidii gonagassii: “De lea okta, Jonatana skierbmábárdni.” ₄Gonagas jearai: “Gos son lea?” Siba dajai: “Son lea Makira, Ammiela bártni, viesus Lo Debaris.” ₅Gonagas vieččahii su, ₆ja nu Mefibošet, Jonatana bárdni ja Saula áddjut, bođii Davida lusa ja gopmirdii eatnamii muođuid. ₇David dajai sutnje: “Ale bala. Mun áiggun leat dutnje árbmugas áhčát Jonatana dihte. Mun attán dutnje ruoktot buot eatnamiid mat gulle áddjásat Saulii, ja don oaččut borrat álo mu beavddis.” ₈Dalle Mefibošet gopmirdii fas ja dajai: “Mii lean mun, go don jorgalat dákkár jápma beatnaga beallái?”

₉Gonagas rávkkai Siba, Saula bálvaleaddji, ja dajai sutnje: “Buot mii lea gullan Saulii ja su sohkii, mun attán du hearrá bárdnái. ₁₀Bargga su ovddas eatnama bártniidatguin ja bálvaleddjiidatguin ja rája šattu, vai du hearrá bártnis lea birgemuš. Mefibošet, du hearrá bárdni, oažžu borrat álo mu beavddis.” Sibas ledje vihttanuppelohkái bártni ja guoktelogi bálvaleaddji. ₁₁Siba dajai gonagassii: “Mun dagan aiddo nugo mu hearrá ja gonagas gohčču.” Dan rájes Mefibošet borai gonagasa beavddis ovttas gonagasa bártniiguin.

₁₂Mefibošetis lei unna bártnáš gean namma lei Mika. Oppa Siba veahka bálvalii ain Mefibošeta, ₁₃muhto Mefibošet ieš ásai Jerusalemis, danin go son borai álo gonagasa beavddis. Son skierpmui goappáge juolggistis.