Apostaliid dagut 21

₁Go mii leimmet sis earránan ja leimmet vuolgán, de mii borjjasteimmet njuolga Kosii, maŋit beaivvi Rhodosii ja doppe Patarai. ₂Pataras mii gávnnaimet skiippa mii lei vuolgimin Foinikiai, ja mii lávkiimet skiipii ja borjáneimmet. ₃Go Kypros iđii oidnosii, de mii borjjasteimmet sullo lulábeale Syria guvlui ja olliimet Tyrosii gos skiipa galggai gurrejuvvot. ₄Mii deaivvaimet dan guovllu máhttájeddjiid ja oruimet čieža beaivvi sin luhtte. Vuoiŋŋa bagadusa mielde sii várrejedje Paulusa mannamis Jerusalemii. ₅Go vahkku lei gollan, de mii fas vulggiimet, ja vieljat oktan áhkáideasetguin ja mánáideasetguin mieđuštedje min gitta gávpoga olggobeallái. Mearragáttis mii luoitádeimmet čippiid ala ja rohkadalaimet. ₆Go mii leimmet váldán earrodearvvuođaid guhtet guimmiineamet, de mii lávkiimet skiipii, ja sii máhcce ruoktot.

₇Go leimmet vuolgán Tyrosis, de mii borjjasteimmet Ptolemaisii; dohko loahpaheimmet borjjasmátkámet. Mii manaimet dearvvahit vieljaid ja oruimet sin luhtte beaivvi. ₈Nuppi beaivvi mii vulggiimet ja bođiimet Kaisareai. Doppe mii manaimet evangelista Filipa lusa ja orruimet su vissui. Son lei okta dan čieža veahkeheaddjis. ₉Sus ledje njeallje náitalkeahtes nieidda geain lei profehtastallanattáldat.

₁₀Go mii leimmet orron gávpogis juo moanaid beivviid, de dohko bođii Judeas muhtun profehta gean namma lei Agabos. ₁₁Son bođii min lusa, válddii Paulusa boahkána, čanai dainna julggiidis ja gieđaidis ja celkkii: “Ná cealká Bassi Vuoigŋa: Dán láhkái juvddálaččat Jerusalemis čatnet dan olbmá geasa dát boagán gullá, ja addet su báhkiniid gihtii.” ₁₂Go mii dan gulaimet, de sihke mii ja báikki olbmot várriimet Paulusa mannamis Jerusalemii. ₁₃Muhto Paulus dajai: “Maid dii dahkabehtet, go čierrubehtet ja bávččagahttibehtet mu váimmu? Mun lean gearggus in dušše čadnojuvvot muhto maiddái jápmit Jerusalemis Hearrá Jesusa nama dihte.” ₁₄Go son ii lean sártnuheames, de mii mášuiduvaimet ja dajaimet: “Šaddos Hearrá dáhttu.”

₁₅Go mii leimmet orron Kaisareas muhtun beivviid, de mii ráhkkaneimmet gárvvisin ja vulggiimet Jerusalemii. ₁₆Fárrolaga minguin vulge maiddái muhtun máhttájeaddjit geat dolvo min orrunsadjáseamet, Mnason-nammasaš kyproslaš olbmá vissui. Mnason lei okta vuosttamuš máhttájeddjiin.

₁₇Go mii bođiimet Jerusalemii, de vieljat válde min vuostá iluin. ₁₈Nuppe beaivvi Paulus vulggii minguin deaivvadit Jakobiin, ja buot vuorrasat bohte dohko. ₁₉Go Paulus lei buorástahttán sin, de son muitalii dárkilit maid Ipmil lei dahkan báhkiniid gaskkas su bálvalusa bokte. ₂₀Go sii dan gulle, de sii máidno Ipmila ja dadje Paulusii: “Viellja, don dieđát man galle duhát juvddálačča leat oskon, ja sii buohkat čuvvot lága áŋgirit. ₂₁Sii leat gullan ahte don oahpahat daid juvddálaččaid geat leat báhkiniid gaskkas, hilgut Mosesa lága ja gielddát sin birračuohppamis bártniideaset ja vádjoleames min álbmoga vieruid mielde. ₂₂Maid mii dal dahkat? Vissásit sii gullet ahte don leat boahtán.

₂₃Daga maid mii neavvut du dahkat: Mis leat dáppe njeallje olbmá geat leat dahkan lohpádusa. ₂₄Váldde dan njealljása mielddát, buhtistahte iežat oktan singuin ja mávsse sin goluid, vai sii besset ráhkket oaivvi. Dalle buohkat áddejit ahte dat mii beaggá du birra ii leat duohta, muhto don doalat lága ja vádjolat dan mielde. ₂₅Dan mii guoská báhkiniidda geat leat oskon, mii leat juo čoavdán. Mii leat čállán sidjiide ja mearridan ahte sii galget váruhit borramis bierggu mii lea oaffaruššojuvvon eahpeipmiliidda, vara ja buvihuvvon elliid bierggu, ja garvit fuorrávuođa.”

₂₆Maŋit beaivvi Paulus válddii olbmáid mielddis ja buhtistii iežas oktan singuin. Dasto son manai tempelii dieđihit goas buhtástusáigi nohká ja goas iešguđege ovddas oaffar addojuvvo.

₂₇Aiddo go dat čieža beaivvi ledje nohkamin, de juvddálaččat geat ledje boahtán Asias, oidne su tempelis. Sii gikte olbmuid mielddiset, dohppejedje Paulusa ₂₈ja čurvo: “Israellaččat, veahkehehket! Dát lea dat olmmái gii buot guovlluin gilvá iežas oahpa ja sárdnu min álbmoga ja min lága ja dán báikki vuostá. Ja dál son lea vel buktán greikalaččaid tempelii ja eahpebasuhan dán bassi báikki.” ₂₉Sii ledje oaidnán efesoslaš Trofimosa gávpogis Paulusiin ja navde ahte Paulus lei buktán su tempelii. ₃₀Oppa gávpot lihkahuvvui, ja olbmot vihke čoahkkái. Sii dohppejedje Paulusa ja gesse su olggos tempelis, ja poarttat dahppojuvvojedje dallánaga.

₃₁Muhto go olbmot vigge goddit Paulusa, de romalaš soahteveagaoaivámuš oaččui sáni ahte oppa Jerusalem lei moivvis. ₃₂Son válddii dan seammás čuohtásaoaivámuččaid ja soalddáhiid fárrui ja doapmalii dohko. Go juvddálaččat oidne soahteveagaoaivámučča ja soalddáhiid, de sii heite cábmimis Paulusa. ₃₃Soahteveagaoaivámuš manai sin lusa ja gohčui čatnat su guvttiiguin láhkkiiguin. De son jearai olbmuin, gii dát olmmoš lei ja maid son lei dahkan. ₃₄De čuorvvui olbmuid gaskkas nubbi nu, nubbi ná, ja go oaivámuš ii ožžon das riekta čielgasa šláma dihte, de son gohčui doalvut Paulusa ladnái. ₃₅Muhto go su ledje dolvon ladneboardaga rádjái, de soalddáhat fertejedje guoddit su, danin go veahkaválddálaš olmmošeatnatvuohta ₃₆ bahkkii sin maŋŋái ja čuorvvui: “Goddet su!”

₃₇Go sii ledje doalvumin Paulusa ladnái, de son jearai oaivámuččas: “Oaččungo mun dadjat dutnje juoidá?” Oaivámuš vástidii: “Máhtátgo don greikkagiela? ₃₈Dalle don it leat dat egyptalaš gii muhtun áiggi dás ovdal dagai stuimmi ja doalvvui njealljeduhát olmmošgoddi meahccái.” ₃₉Paulus dajai: “Mun lean juvddálaš, Tarsosis Kilikias eret, gávpoga ássi maid buohkat várra dovdet. Mun bivddán du suovvat mu sárdnut álbmogii.” ₄₀Soahteveagaoaivámuš suovai dan. Dalle Paulus čuožžilii boardaga ala ja sevii olbmuide.

Go buohkat jávohuvve, de son sárdnugođii sidjiide hebreagillii: