5. Mosesgirji 10

₁Dalle Hearrá celkkii munnje: “Duddjo guokte geađgetávvala, ovddibuid láhkásaččaid, ja goarkŋo mu lusa várrái. Daga maiddái árkka muoras. ₂Távvaliidda mun čálán seammá sániid mat ledje dain távvaliin maid don cuvkejit. Bija távvaliid dasto árkii.” ₃Mun dahken árkka akasiamuoras ja duddjojin guokte geađgetávvala, ovddibuid láhkásaččaid, ja gorgŋon várrái távvalat gieđas. ₄Hearrá čálii távvaliidda seammá sániid go ovddit hávege, dan logi báhkkoma maid son gulahii didjiide dola siste, go dii leiddet čoahkis vári vuolde. Hearrá attii távvaliid munnje, ₅ja mun njidjen váris. De mun bidjen távvaliid árkii maid ledjen dahkan, nugo Hearrá lei mu gohččon, ja das dat dasto adnojuvvojit.

₆Israellaččat vulge johtui Beerot Bene-Jaakanis ja bohte Moserai. Dohko Aron jámii, ja dohko son hávdáduvvui. Báhppan Arona maŋŋil šattai su bárdni Elasar. ₇Moseras álbmot manai Gudgodai ja Gudgodas Jotbatai, eatnamii gos leat ollu jogažat.

₈Daid áiggiid Hearrá čulddii Levi čeardda guoddit lihtuárkka, čuožžut Hearrá muođuid ovddas, bálvalit su ja buressivdnidit álbmoga su nammii, nugo sii ain dahket. ₉Sii eai ožžon oasi eaige opmodaga ovttas vieljaideasetguin. Hearrá ieš lea sin opmodat, nugo son lea lohpidan.

₁₀Mun orron váris seammá guhká go ovddit gearddege, njealljelogi beaivvi ja njealljelogi ija. Hearrá gulai mu maiddái dán háve ja lohpidii ahte ii duššat din. ₁₁Hearrá celkkii munnje: “Vuolgge johtui ja jođit israellaččaid, vai sii besset váldit oapmineaset dan eatnama maid mun vuordnumiin lohpidin sin áhčiide addit sidjiide.”

₁₂Ja dál, Israel, maid Hearrá, du Ipmil, gáibida dus? Dušše dan ahte don balat Hearrás, Ipmilisttát, nu ahte álo vádjolat su geainnuid, ráhkistat su ja bálvalat Hearrá, Ipmilat, oppa váimmus ja oppa sielus ₁₃ja doalat Hearrá báhkkomiid ja lágaid, maid mun odne attán dutnje, vai dutnje geavvá bures. ₁₄Hearrái, din Ipmilii, gullet albmi ja almmiid albmi, eanan ja buot mii das lea. ₁₅Muhto dattetge Hearrá gessui aivvefal din áhčiide. Son ráhkistii sin, ja din, sin náli, son lea válljen iežas álbmogin buot álbmogiid gaskkas. ₁₆Birračuhppet dan dihte váimmodet ovdaliikki ja heitet nággáruššamis. ₁₇ Hearrá, din Ipmil, lea ipmiliid Ipmil ja hearráid Hearrá, stuorra Ipmil ja hirpmus sáŋgár gii ii geahča olbmo hápmái iige váldde duolgguid. ₁₈Son veahkeha oarbásiid ja leaskkaid oažžut vuoigatvuođa, son ráhkista vierrása ja biebmá ja bivttasta su. ₁₉Maiddái dii galgabehtet ráhkistit vierrása, danne go dii ieža leiddet vierrásat Egyptas. ₂₀Ballet Hearrás, Ipmilisttádet, bálvalehket su, lehket su lahka ja vurdnot su nammii. ₂₁Son lea din rápmi, son lea din Ipmil. Dii lehpet iežadet čalmmiiguin oaidnán daid stuorra ja hirpmus daguid maid son lea dahkan din ovddas. ₂₂Dušše čiežalogis ledje din áhčit go sii manne Egyptii, muhto dál Hearrá, din Ipmil, lea dahkan din eatnagin nugo almmi násttit.