5. Mosesgirji 25

₁Jos guokte olbmá riiddáskit ja soai de doalvuba ášši rievtti ovdii, de duopmárat galget dubmet riekta: Sivaheami sivaheapmin ja sivalačča sivalažžan. ₂Jos sivalaš ráŋggáštuvvo cábmimiin, de duopmár galgá gohččut su gopmulit eatnamii, ja son galgá gozihit ahte sivalaš oažžu nu galle časkkástaga go su rihkus ánssáša. ₃Sutnje oažžu addit njealljelogi časkkástaga, ii eambbo; muđui din viellja heahppášuhttojuvvo.

₄Allet čana vuovssá njálmmi go dat lea ráidnemin gortniid.

₅Go vieljažagat ássaba ovttas ja nubbi jápmá iige sus leat bárdni, de su leaska ii oaččo mannat áhkkán dakkárii gii ii gula sohkii. Su boatnjá viellja galgá veallát suinna, váldit su áhkkán ja nu deavdit iežas sivjjotgeatnegasvuođa. ₆Nissona vuosttašriegádeaddji galgá adnojuvvot jápmán vielja bárdnin, vai su namma ii sihkkašuva Israelis. ₇Muhto jos olmmái ii dáhto váldit vieljas leaskka áhkkán, de nisson galgá mannat gávpotportii vuorrasiid ságaide ja dadjat: “Mu sivjjot biehttala seailluheames vieljas nama Israelis. Son ii dáhto deavdit iežas sivjjotgeatnegasvuođa.” ₈Dalle gávpoga vuorrasat galget rávkat olbmá lusaset ja sárdnut suinna. Jos son bissu nanusin iige dáhto váldit vieljas leaskka áhkkán, ₉de leaska galgá vuorrasiid oaidnut mannat su ovdii, geassit gápmaga su juolggis, čolgadit su muođuid njeaiga ja dadjat: “Ná dahkkojuvvo dasa gii ii dáhto bisuhit vieljas soga.” ₁₀Das maŋŋil dan olbmá soga galgá gohččut “rabasjuolggaga sohkan”.

₁₁Jos guokte olbmá doaráskit ja nuppi olbmá áhkká boahtá veahkehit boatnjás ja dohppe dan olbmá vuolledábiide gii lea cábmimin su boatnjá, ₁₂de nissona ii oaččo árkkálmastit, muhto su gieđa galgá čuolastit gaskat.

₁₃Allet ane burssas guovttelágán veaktageđggiid, stuoribuid ja unnibuid. ₁₄Allet ane viesuineattet guovttelágán efamihtuid, stuoribuid ja unnibuid. ₁₅Atnet rivttes ja vuoigadis veaktageđggiid ja rivttes ja vuoigadis efamihtuid, vai beassabehtet eallit guhká dan eatnamis maid Hearrá, din Ipmil, addá didjiide. ₁₆Hearrá, din Ipmil, fasttáša juohkehačča gii verroša dakkár áššiin.

₁₇Muitet maid amaleklaččat dahke didjiide go leiddet boahtimin Egyptas. ₁₈Go sii bohte din ovddal, ja dii leiddet mátkkis váiban ja viessan, de sii eai ballan Ipmilis muhto godde buot vuoimmehuvvan olbmuid geat ledje bázahaddan. ₁₉Go Hearrá, din Ipmil, lea addán didjiide muosi buot vašálaččain mat leat din birra, dan eatnamis maid son addá didjiide opmodahkan ja diktá din váldit dan oapmineattet, de galgabehtet dalle duššadit eatnama alde amaleklaččaid ja sin muittuge. Allet vajáldahte dán!