5. Mosesgirji 28

₁Jos dii gullabehtet Hearrá, Ipmileattet, ja doallabehtet oskkáldasat buot su báhkkomiid maid mun attán didjiide odne, de Hearrá, din Ipmil, alida din buot eatnama álbmogiid badjel. ₂Buot dát buressivdnádusat šaddet din oassin, go fal jeagadehpet Hearrá, Ipmileattet:

₃Buressivdniduvvon dii lehpet gávpogis ja buressivdniduvvon bealddus.

₄Buressivdniduvvon leat din mánát, din bealddu šaddu ja din omiid šaddu, din gusaid gálbbit ja din sávzzaid lábbát.

₅Buressivdniduvvon leat din goret ja din láibungárit.

₆Buressivdniduvvon dii lehpet go boahtibehtet ja go vuolgibehtet.

₇Go din vašálaččat fallehit din, de Hearrá diktá din vuoitit daid. Jos dat fallehit din ovtta guovllus, de dat báhtarit dis čieža guvlui. ₈Hearrá addá buressivdnádusa din áittiide ja buot din bargguide. Hearrá, din Ipmil, buressivdnida din dan eatnamis maid son addá didjiide. ₉Hearrá alida din iežas bassi álbmogin, nugo son vuordnumiin lea lohpidan didjiide, go dii doallabehtet Hearrá, Ipmileattet, báhkkomiid ja vádjolehpet su geainnuid. ₁₀Buot eatnama álbmogat oidnet ahte Hearrá lea váldán din iežas álbmogin, ja dat ballet dis. ₁₁Hearrá addá didjiide valljugasat buot buori: Didjiide riegádit ollu mánát, din oamit lassánit ja din bealddut addet stuorra šattu dan eatnamis maid son vuordnumiin lohpidii din áhčiide addit didjiide. ₁₂Hearrá rabasta didjiide almmi, iežas valljugas vuorkágámmára, ja addá eatnamii arvvi rivttes áigái, ja son buressivdnida buot maid dii dahkabehtet. Dii lonebehtet eará álbmogiidda, muhto ieža dii ehpet dárbbaš váldit loanas. ₁₃Hearrá dahká din oaivin iige seaibin. Dii lehpet alimusat ehpetge vuolimusat, jos doallabehtet ja doahttalehpet oskkáldasat Hearrá, Ipmileattet, báhkkomiid maid mun attán didjiide odne. ₁₄Allet spiehkas olgeš alletge gurut beallái mange báhkkomis maid mun attán didjiide odne, alletge bálvališgoađe eará ipmiliid.

₁₅Muhto jos dii ehpet gula Hearrá, Ipmileattet, ehpetge doala oskkáldasat buot su báhkkomiid ja mearrádusaid maid mun attán didjiide odne, de buot dát garuhusat deaividit din:

₁₆Garuhuvvon dii lehpet gávpogis ja bealddus.

₁₇Garuhuvvon leat din goret ja din láibungárit.

₁₈Garuhuvvon leat din mánát ja din bealddu šattut, din gusaid gálbbit ja sávzzaid lábbát.

₁₉Garuhuvvon dii lehpet go boahtibehtet ja go vuolgibehtet.

₂₀Hearrá vuolggaha didjiide garuhusa, moivvi ja givssi buot das maid dahkabehtet, dassážii go dii heavahuvvobehtet ja duššabehtet bahás daguideattet dihte, danin go dii hilgguidet mu. ₂₁Hearrá diktá rohttudávdda njoammut didjiide, dassážii go lea duššadan din dan eatnamis maid dál lehpet mannamin váldit oapmineattet. ₂₂Hearrá časká din suohtain ja báhkkadávddain, vulššiin ja rávžavuođain, goikkádagain, guorbamiin ja ástamiin, ja dii šaddabehtet gillát dain dassážii go lehpet duššan. ₂₃Albmi din badjel šaddá veaikin ja eanan din vuolde ruovdin. ₂₄Hearrá rievdada gavjan ja sáttun arvvi mii gahččá din eatnamii; dat gahččá almmis din badjelii, ja dii duššabehtet. ₂₅Hearrá diktá din vašálaččaid časkit din. Jos dii fallehehpet sin ovtta guovllus, de gártabehtet báhtarit sis čieža guvlui, ja dii šaddabehtet balddonassan buot eatnama riikkaide. ₂₆Din jápma gorudat šaddet almmi lottiid ja meahcielliid biebmun, iige oktage áje daid eret. ₂₇Hearrá časká din Egypta buhkkuiguin ja bohtanemiiguin, ruppiiguin ja sakŋášiin, ehpetge dii sáhte goassege buoriduvvot. ₂₈Hearrá časká din mielahisvuođain, čalmmehisvuođain ja suorganemiin. ₂₉Beaiveguovdil dii rávjubehtet seavdnjadis dego čalmmeheamit. Ii mihkkege lihkostuva didjiide, muhto dii vealahuvvobehtet ja speddjojuvvobehtet ovtto, iige oktage veahket din.

₃₀Go muhtun dis lohpádaddá nissoniin, de eará olmmái veallá suinna. Go dii huksebehtet viesu, de dii ehpet oaččo ássat dasa. Go dii gilvibehtet viidnegárddi, de dii ehpet beasa rádjat dan šaddosiid. ₃₁Din vuovssát njuvvojuvvojit din oaidnut, muhto dii ehpet beasa borrat daid bierggu. Din ásenat rieviduvvojit dis, ehpetge dii oaččo daid šat ruoktot. Din vašálaččat váldet din sávzzaid, iige oktage veahket din. ₃₂Din bártnit ja nieiddat addojuvvojit din oaidnut vierroálbmogii, ja dii áibbašehpet sin čieročalbmái geažos beaivvi, muhto ehpet sáhte maidege dahkat áššiin. ₃₃Álbmot maid ehpet dovdda, borrá din šattuid ja din rahčamušaid šaddosiid, ja dii vealahuvvobehtet ja givssiduvvobehtet geažos áigge. ₃₄Dii mielahuvvabehtet buot dan dihte maid gártabehtet oaidnit.

₃₅Hearrá časká din bahás buorránmeahttun buhkkuiguin mat šaddet čippiide ja badjeváhkáide, juolgevuođu rájes gitta oaivečohka rádjái. ₃₆Hearrá doalvu din ja din gonagasa gean lehpet dahkan ráđđejeaddjineattet, dakkár álbmoga gaskii maid ehpet dii eaige din áhčit leat dovdan, ja doppe dii bálvalehpet muorra- ja geađgeipmiliid. ₃₇Dii šaddabehtet suorggahussan, sátnevájasin ja bilkolávllan buot daid álbmogiid gaskkas maid gaskii Hearrá doalvu din.

₃₈Vaikko dii gilvibehtet ollu, de dii rádjabehtet uhccán, danin go rásselohkut loktet din šattu. ₃₉Vaikko dii gilvibehtet ja bargabehtet viidnegárddiid, de dii ehpet beasa juhkat viinni ehpetge vurkkodit dan, danin go máđut borret buot. ₄₀Oliivamuorat dis leat miehtá eatnama, muhto dii ehpet beasa vuoidat iežadet oljjuin, danin go oliivvat gahččet eatnamii. ₄₁Didjiide riegádit bártnit ja nieiddat, muhto dii massibehtet sin, ja sii dolvojuvvojit fáŋgavuhtii. ₄₂Rásselohkut billistit din muoraid ja din bealdduid šattuid. ₄₃Vieris gii ássá din gaskkas allána din badjel, muhto dii ieža vuollubehtet ain vuolibui. ₄₄Vierrásat lonejit didjiide, muhto dii ehpet sáhte addit sidjiide maidege loanas. Sii šaddet oaivin ja dii šaddabehtet seaibin.

₄₅Buot dát garuhusat olahit din. Dat doarridit din ja čuhcet didjiide nu ahte dii duššabehtet, danin go dii ehpet doahttalan Hearrá, Ipmileattet, ehpetge doallan daid báhkkomiid ja mearrádusaid maid son attii didjiide. ₄₆Dát garuhusat leat agálaš mearkan ja duođaštussan ráŋggáštusas mii čuohcá didjiide ja din nállái. ₄₇Go dii ehpet bálvalan Hearrá, Ipmileattet, dalle go leiddet ilus ja gallás ja dis lei vallji, ₄₈de dii gártabehtet bálvalit nealggis ja goikkus, álásin ja geafivuođas vašálaččaid maid Hearrá vuolggaha soahtat dinguin. Son bidjá din niskái ruovdegeassá dassážii go lea duššadan din.

₄₉Hearrá vuolggaha din vuostá gáidagasas, eatnama ravddain, dakkár álbmoga mii čuolasta din dego goaskin ja man giela dii ehpet ipmir, ₅₀álbmoga mas lea goaves ámadadju ja mii ii ane árvvus vuorrasiid iige seastte nuoraid. ₅₁Dat álbmot loaktá din omiid šattu ja din eatnama šattu dassážii go dii duššabehtet. Sii eai guođe didjiide gortni, viinni eaige oljju, eai gálbbiid eaige lábbáid, ja nu sii duššadit din. ₅₂Sii birastahttet din buot din gávpogiin dassážii go din alla ladnemuvrrat maidda dorvvastehpet, leat gahččan juohke sajis din eatnamis. Sii birastahttet din buot din gávpogiin juohke sajis dan eatnamis maid Hearrá, din Ipmil, lea addán didjiide.

₅₃Dan issoras heađis maid vašálaš dagaha didjiide, dii gártabehtet borrat iežadet mánáid, daid bártniid ja nieiddaid oačči geaid Hearrá, din Ipmil, lea addán didjiide. ₅₄Smáittes ja ránttos olmmái din gaskkas ii dáhto addit vielljasis iige áhkkásis iige daidda mánáide geat sus vel leat báhcán, ₅₅oppa bihtáge mánáidis oaččis, mii lea su áidna borramuš dan issoras heađis maid vašálaš dagaha didjiide buot din gávpogiin. ₅₆Smáittes ja ránttos nisson din gaskkas, gii lea nu smáiti ja ránto ahte ii leat dárbbašan vázzit ii lávkkige, ii dáhto addit boadnjásis iige bárdnásis iige nieidasis ₅₇maŋibuid mat bohtet su goaŧus, iige mánáid maid riegádahttá. Son ieš borrá daid suoli, danin go sus ii leat eará borrat dan issoras heađis maid vašálaš dagaha didjiide din gávpogiin.

₅₈Jos dii ehpet doala oskkáldasat buot dán lága sániid, buot mii lea čállojuvvon dán girjái, ehpetge bala Hearrá, Ipmileattet, máinnolmas ja hirbmatlaš namas, ₅₉de Hearrá vuolggaha didjiide ja din nállái stuorra ja guhkilmas givssiid ja bahás ja bistevaš buozalvasaid. ₆₀Hearrá vuolggaha didjiide buot Egypta rohttudávddaid main dii ballabehtet, ja diktá daid njoammut didjiide. ₆₁Maiddái buot buozalvasaid ja givssiid mat eai leat čállojuvvon dán láhkagirjái, Hearrá vuolggaha didjiide váivin, ja dii duššabehtet. ₆₂Dis geat ovdal leiddet eatnagat dego almmi násttit, báhcá dušše unna jovkkoš, danin go dii ehpet gullan Hearrá, Ipmileattet. ₆₃Nugo Hearrá illudii dahkat didjiide buori ja lasihit din, nu son dalle illuda heavahit ja duššadit din. Dii rohttejuvvobehtet dan eatnamis maid dál mannabehtet váldit oapmineattet.

₆₄Hearrá biđge din buot álbmogiid gaskii eatnama ovtta ravddas nubbái. Doppe dii bálvalehpet eará ipmiliid maid ehpet dii eaige din áhčit dovdan, muorraipmiliid ja geađgeipmiliid. ₆₅Daid álbmogiid gaskkas dis ii leat muossi iige vuoiŋŋadansadji. Doppe Hearrá dahká din váimmu balešin, son diktá din čalmmiid čáskat ja din eallinmovtta sotnat. ₆₆Dii gártabehtet dovdat ahte din heagga lea gazzagasas; ijatbeaivvi dii lehpet balus heakkadet dihte ehpetge sáhte leat oadjebassan. ₆₇Iđedis dii dadjabehtet: “Vare livččii juo eahket!” ja eahkedis: “Vare livččii juo iđit!” Dakkár balus dii lehpet, dakkáriid din čalmmit gártet oaidnit. ₆₈Hearrá doalvu din skiippain ruovttoluotta Egyptii, vaikko mun dadjen didjiide ahte dohko dii ehpet goassege dárbbaš máhccat. Doppe dii vuovdalehpet iežadet šlávvan ja šlávvanissonin vašálaččaidasadet, muhto ii oktage fuola dis.