Hearrá árpmiha ja buressivdnida iežas álbmoga
1Go dii lehpet vásihan buressivdnádusa ja garuhusa maid mun bidjen din válljet, de dii jurddašišgoahtibehtet buot dán daid álbmogiid gaskkas maid gaskii Hearrá, din Ipmil, lea ádján din. 2Dalle dii ja din mánát máhccabehtet Hearrá, Ipmileattet, lusa, ja doahttalehpet oppa váimmus ja oppa sielus buot su gohččumiid maid mun odne attán didjiide, 3ja Hearrá, din Ipmil, jorgala din oasi ja árpmiha din. Son čohkke din fastain buot dain álbmogiin maid gaskii son lea biđgen din. 4Vaikko dii livččiidet áddjojuvvon buot máilmmi ravddaide, de Hearrá, din Ipmil, čohkke ja viežžá din doppenai. 5Son buktá din dan eatnamii maid din áhčit atne oapmineaset, ja dii váldibehtet dan vuot oapmineattet. Hearrá dahká didjiide buori ja lasiha din eanebun go din áhčit ledje. 6Hearrá, din Ipmil, birračuohppá din váimmu ja din náli váimmu, nu ahte dii ráhkistehpet Hearrá, Ipmileattet, oppa váimmus ja oppa sielus. Dalle dii oažžubehtet eallit, 7ja Hearrá, din Ipmil, diktá dáid garuhusaid deaividit din vašálaččaid ja daid geat vašuhedje ja doarrádalle din. 8Dalle dii gullabehtet fastain Hearrá jiena ja doallabehtet buot su báhkkomiid maid mun attán didjiide odne, 9ja Hearrá, din Ipmil, addá didjiide valljugasvuođa buot das maid dahkabehtet. Didjiide riegádit ollu mánát, din oamit lassánit ja dii beassabehtet rádjat valljugas šattu. Nugo Hearrá lei ilus go din áhčiide geavai bures, nu son maid lea ilus go diktá didjiide geavvat bures, 10go dii fal doahttalehpet Hearrá, Ipmileattet, ja doallabehtet su báhkkomiid ja mearrádusaid mat leat čállojuvvon dán láhkagirjái. Dalle dii máhccabehtet Hearrá, Ipmileattet, lusa oppa váimmus ja oppa sielus.
11Dát láhka maid mun dál attán didjiide, ii leat didjiide beare váttis iige olatmeahttun. 12Dat ii leat almmis, nu ahte dii fertešeiddet dadjat: Gii manná albmái viežžat dan ja almmuha dan midjiide, vai mii beassat doallat dan? 13Iige dat leat meara duohken, nu ahte dii fertešeiddet dadjat: Gii viežžá dan meara duohken ja almmuha dan midjiide, vai mii beassat doallat dan? 14Ii, muhto dat lea din lahka, din njálmmis ja din váimmus, nu ahte dii sáhttibehtet doallat dan.
Eallin dahje jápmin
15Mun lean odne bidjan din válljet eallima dahje jápmima, buori dahje bahá. 16Jos dii dahkabehtet nu go mun dál gohčun din dahkat ja ráhkistehpet Hearrá, Ipmileattet, vádjolehpet su geainnuid ja doallabehtet su báhkkomiid, lágaid ja mearrádusaid, de dii oažžubehtet eallit. Dii eatnánehpet, ja Hearrá, din Ipmil, buressivdnida din dan eatnamis maid lehpet dál mannamin váldit oapmineattet. 17Muhto mun gulahan didjiide odne ahte jos din váibmu jorgala eret Hearrás ehpetge dii doahttal su muhto diktibehtet iežadet fillejuvvot rohkadallat eará ipmiliid ja bálvalit daid, 18de dii duššabehtet. Dii ehpet beasa eallit guhká dan eatnamis maid lehpet dál mannamin váldit oapmineattet Jordana don bealde. 19Mun válddán almmi ja eatnama duođašteaddjin, go dál dajan: Mun lean bidjan din válljet eallima dahje jápmima, buressivdnádusa dahje garuhusa. De válljejehket dalle eallima, vai dii ja din nálli oažžubehtet eallit. 20Ráhkistehket Hearrá, Ipmileattet, gullet su jiena ja lehket sutnje oskkáldasat. Dalle dii oažžubehtet eallit, ja Hearrá diktá din álo ássat dan eatnamis maid son vuordnumiin lohpidii addit din áhčiide Abrahamii, Isakii ja Jakobii.
