Sárdnideaddji 5

₁Ale leage geargat sárdnut alege daja maidege jurdilkeahttá Ipmila muođuid ovddas, dasgo Ipmil lea almmis ja don leat eatnama alde. Lehkoset du sánit dan dihte hárvát.

₃Go don dagat Ipmilii lohpádusa, de ale ájahala ollašuhttimis dan, dasgo son ii liiko dovkkiide. Ollašuhte dan maid lohpidat! ₄Buoret lea orrut lohpitkeahttá go lohpidit ja guođđit lohpádusa deavddekeahttá. ₅Ale divtte njálmmi doalvut iežat suddui, ale daja Ipmila áirasii: “Mun dahken dan vahágis.” Ale divtte sániidat moaráhuhttit Ipmila, nu ahte son billista dan maid don leat dahkan. ₆Buot nieguin, buot duššálašvuođas, buot sániin: Bala Ipmilis!

₇Jos oainnát ahte iežat eananguovllus váivváš sordojuvvo ja riekti ja vuoigatvuohta rihkkojuvvo, de ale ovddoš dan: Nubbi gievra goziha nuppi, ja eará gievrrat goappašagaid. ₈Eatnamii lea ávkin ahte das lea gonagas, dalle eanan gilvojuvvo.

₉Dat gii ráhkista ruđa, ii goassege gallán ruđain, iige dat gii ráhkista riggodaga, goassege oaččo dan doarvái. Datnai lea duššálašvuohta. ₁₀Mađi stuorit opmodat, dađi eambbo borrit. Mii ávkkiid das lea eaiggádii earret dan ahte su čalmmit dan oidnet? ₁₁Bargi nagir lea njálggat, juogo son boraš uhccán dahje eatnat, muhto riggá vallji ii bállet su oađđit.

₁₂Mun lean oaidnán bahás ja váivves ášši beaivváža vuolde: Duhččojuvvon riggodat šaddá lihkuhisvuohtan eaiggádasas. ₁₃Su lossa rahčamis fuolakeahttá su riggodat nogai, ja vaikko sus lei bárdni, de bártni gihtii ii báhcán mihkkege. ₁₄Nu go son bođii eatnis goaŧus, nu son manai fastain eret, seammá álásin go bođii, iige son sáhttán váldit mielddis maidege das maid lei háhkan rahčamušainis. ₁₅Dat lea bahás ja váivves gillámuš: Aiddo nu mo son lei boahtán, nu son fertii mannat eret. Mii ávkkiid sutnje lei das ahte son lei rahčan ja váinnuhan biekka? ₁₆Buot su beaivvit leat seavdnjadas ja moraš, dorvvuhisvuohta, buohcuvuohta ja bahčavuohta.

₁₇Dán mun lean gávnnahan: Olbmui lea buorre ja heivvolaš borrat ja juhkat ja leat ilus buot rahčamušaid siste maiguin son váivvida iežas beaivváža vuolde buot vátna eallinbeivviidis maid Ipmil lea addán sutnje; dat lea olbmo oassi. ₁₈Go Ipmil addá olbmui riggodaga ja opmodaga ja diktá su návddašit dan, váldit das iežas oasi ja leat ilus rahčamušaidis gaskkas, de dat lea Ipmila attáldat. ₁₉Dalle olmmoš ii jurddaš nu ollu dan mo su eallinbeaivvit vásset, dasgo sutnje lea galle dat illu maid Ipmil addá.