1Buorre namma lea buoret go fiinna vuoiddas,
ja jápmima beaivi buoret
go riegádeami beaivi.
2Buoret go mannat guossemállásiidda
lea fitnat morašviesus.
Mii lea juohke olbmo loahppa,
dan ferte smiehttat juohkehaš gii eallá.
3Buoret lea moraštit go boagustit;
morašlaš ámadadju lea buorre váibmui.
4Viisáid váibmu lea morašviesus,
dovkkiid váibmu feastaviesus.
5Buoret lea gullat
viissis olbmo cuiggodeami
go jallaid rámi.
6Nugo bastilislánjáid ruohčan
ruittu vuolde,
nu lea doavkki boagusteapmi.
Datge lea duššálašvuohta.
7Uhkádus dahká viisá doavkin,
duolggut sevnnjodahttet ipmárdusa.
8Ášši loahppa lea buoret go álgu,
gierdavašvuohta buoret go čeavli.
9Ale leage hohppui moaráhuvvat,
moarri ássá dovkkiid rattis.
10Ale daja: “Manin ovdal visot lei buoret go dál?” Viissis olmmoš ii jeara nu.
11Viissisvuohta lea seammá buorre
go opmodat,
velá buoretge daidda geat ellet
beaivváža vuolde.
12Viissisvuohta suddje
nugo ruhta suddje,
muhto viissisvuohta addá eambbo:
Dat gádju viisá heakka.
13Geahčat Ipmila daguid:
Gii máhttá njulget dan
maid son lea dahkan moalkkasin?
14Buori beaivvi leage arvvot
ja bahás beaivvi muitte:
Ipmil lea dahkan guktuid.
Ii olmmoš sáhte moaitit Ipmila.
15Dánnai mun lean oaidnán
iežan duššálaš eallinbeivviid:
Vanhurskkis duššá vaikko lea eallán riekta,
ipmilmeahttun eallá guhká vaikko lea bahá.
16Ale leage beare vanhurskkis alege čájet iežat badjelmeare viissisin; manne heavahivččet iežat? 17Ale spiehkas lágas ilá ollu alege leage doavki. Manne jámášit ovdal áiggi? 18Buorre lea doallat gitta ovttas hilggokeahttá nuppige: Dat gii ballá Ipmilis, birgehallá guktuin.
19Viissis olbmui
viissisvuohta addá buoret dorvvu
go maid addet gávpoga logi oaivámučča.
20Eatnama alde ii leat oktage vanhurskkis gii dahká álo buori iige goassege suddut.
21Ale guldal visot olbmuid ságaid, amat gullat iežat bálvaleaddji garuheamen du. 22Donhan dieđát ieš ahte donge leat eatnat gerddiid garuhan earáid.
23Buot dán mun lean geahččalan viisodagain. Mun dadjen: “Mun dáhtun joksat viisodaga”, muhto dat bisui guhkkin mus.
24Guhkkin lea dat mii lea leamaš,
čiekŋalasas, čiekŋalasas
– gii máhttá gávdnat dan?
25Mun mearridin guorahallat ja dutkat viisodaga ja áššiid oktavuođa, ja mun dovddiidin ahte ipmilmeahttunvuohta boahtá jallavuođas ja jallas dagut mielahisvuođas.
26Dán mun gávnnahin:
Bahččageabbo go jápmin lea nisson.
Son lea fierbmi,
su váibmu lea giella,
su gieđat leat láhkkit.
Gean Ipmil dohkkeha, dat vealtá sus,
muhto suttolaš šaddá su fáŋgan.
27Geahča, dán mun lean gávdnan,
dadjá Sárdnideaddji,
go geahčadin áššiid oktavuođa.
28Mun in gávdnan dan
maid lean ohcan geažos áiggi, olbmo:
Duháha gaskkas mun gávdnen ovtta,
muhto ii goassege dat lean nisson.
29Dušše dán mun lean gávdnan:
Ipmil sivdnidii olbmuid ávdájin,
muhto sii ieža hutket buotlágán juonaid.
