Ester 6

₁Dan ija gonagasas báhtaredje nahkárat. Son vieččahii muitalusaid girjjiid, ja logahii daid alccesis. ₂Ovtta girjjis muitaluvvui ahte Mordekai lei dieđihan mo šielbmafávttat Bigtan ja Tereš, hoavvaolbmáguovttos, leigga ohcan liibba goddit gonagas Xerxesa. ₃Gonagas jearai: “Maid gudniid ja goargguid Mordekai lea ožžon dás?” Bálvaleaddjit geat ledje su luhtte, vástidedje: “Ii son leat ožžon maidege.” ₄De gonagas jearai: “Gii lea šiljus?” Aiddo dalle Haman lei boahtán olggut šloahttašilljui bivdit gonagasas ahte Mordekai harccastuvvo dan harcamurrii maid son lei diktán cegget su várás. ₅Gonagasa bálvaleaddjit vástidedje: “Šiljus lea Haman.” Gonagas dajai: “Bohtos deike!” ₆Go Haman lei boahtán, de gonagas jearai sus: “Maid galgá dahkat olbmái geasa gonagas dáhttu čájehit gudni?” Haman jurddašii: “Geasa gonagas dáhtošii čájehit gudni earret go munnje?” ₇Son dajai gonagassii: “Dan olbmái geasa gonagas dáhttu čájehit gudni, ₈galgá buktit gonagaslaš biktasa maid gonagas ieš lea atnán, ja heastta mainna gonagas ieš lea riiden ja mii guoddá gonagaslaš kruvnnu. ₉Muhtin gonagasa alla oaivámuš galgá buktit sutnje biktasa ja heastta. Biktasa galgá gárvvuhit dan olbmái geasa gonagas dáhttu čájehit gudni, su galgá diktit riidet gávpoga gáhtaid miehtá ja su ovddas galgá čuorvut: ‘Ná dahkkojuvvo dan olbmái geasa gonagas dáhttu čájehit gudni!’” ₁₀Gonagas dajai Hamanii: “Doama viežžat biktasa ja heastta nugo dadjet, ja daga ná juvddálaš Mordekajii gii bálvala gonagasa poarttas. Ale divtte maidege vajáldahttojuvvot das maid don leat dadjan!”

₁₁Haman vieččai biktasa ja heastta, gárvvuhii biktasa Mordekajii, divttii su riidet gávpoga gáhtaid miehtá ja čuorvvui su ovddas: “Ná dahkkojuvvo dan olbmái geasa gonagas dáhttu čájehit gudni!”

₁₂Dasto Mordekai máhcai gonagasa portii, muhto Haman doamai ruktosis morašlažžan ja govččas muođuid ovddas. ₁₃Son muitalii áhkkásis Serešii ja buot ustibiiddásis mo sutnje lei geavvan. Dalle su ráđđeaddit ja su áhkká Sereš dadje sutnje: “Jos Mordekai gean ovddas don leat gahččagoahtán, lea juvddálaš, de don it veaje sutnje maidege, muhto vuoittáhalat sutnje ollásit.” ₁₄Go sii ledje ain sárdnumin suinna, de bohte gonagasa hoavvaolbmát doalvut su hoahpus dronnet Estera guossemállásiidda.