2. Mosesgirji 10

₁Hearrá celkkii Mosesii: “Mana farao lusa, danin go mun lean buoššudan farao ja su hoavvaolbmáid váimmu, vai beasan dahkat dáid oavdduid sin oaidnut, ₂ja vai don sáhtát muitalit iežat mánáide ja mánáid mánáide man garrasit mun meannudin egyptalaččaiguin ja makkár oavdduid mun dahken sin gaskkas. Dalle dii ipmirdehpet ahte mun lean Hearrá.”

₃Moses ja Aron manaiga farao lusa ja dajaiga sutnje: “Ná cealká Hearrá, hebrealaččaid Ipmil: Man guhká don biehttalat vuolláneames munnje? Luoitte mu álbmoga vuolgit, vai sii besset bálvalit mu. ₄Jos don biehttalat luoitimis mu álbmoga, de ihttin mun divttán rásselohkuid boahtit du eatnamii. ₅Dat gokčet eatnama nu ahte eanan ii sáhte oidnojuvvot. Dat borret bázahusaid mat seilo čuorpmasdálkkis, ja dat borret velá buot muoraidge mat šaddet din eatnamis. ₆Dat devdet du šloahta ja du hoavvaolbmáid viesuid ja buot eará egyptalaččaid viesuid. Dakkára eai du áhčit eaige máttaráhčit leat oaidnán dan beaivvi rájes go sii ásse dán eatnamii, gitta otná rádjái.” De Moses jorggihii ja vulggii farao luhtte.

₇Farao hoavvaolbmát dadje faraoi: “Man guhká dát olmmái galgá leat midjiide giellan? Luoitte Israela olbmáid bálvalit Hearrá, iežaset ipmila. Itgo don veláge ipmir ahte muđui Egypta duššá?” ₈Dalle Moses ja Aron vižžojuvvuiga farao lusa, ja farao dajai sudnuide: “Mannet ja bálvalehket Hearrá, ipmileattet. Muhto geat mannet?” ₉Moses vástidii: “Mii mannat buohkat, sihke nuorat ja boarrásat. Mii mannat oktan bártniideametguin ja nieiddaideametguin, smávvaomiideametguin ja stuorraomiideametguin, danin go mii doallat basiid Hearrá gudnin.” ₁₀Muhto farao dajai sidjiide: “Vissásit Hearrá livččii dinguin jos mun luoittášin din ja din áhkáid ja mánáid vuolgit! Dies oaidná ahte dis leat bahás áigumušat. ₁₁Dies ii šatta mihkkege, muhto mannet dii olbmát bálvalit Hearrá, danhan dii lehpet gáibidange.” Ja soai áddjojuvvuiga eret farao luhtte.

₁₂Hearrá celkkii Mosesii: “Geige gieđa Egypta badjel ja gohčo rásselohkuid boahtit eatnamii. Dat borret buot eatnama šattuid, buot maid čuorbmasat leat bázahan.” ₁₃Moses geigii soappis Egypta badjel, ja Hearrá divttii nuortabiekka bossut badjel eatnama geažos dan beaivvi ja ija. Go iđit šattai, de nuortabiegga lei buktán rásselohkuid. ₁₄Dat lávde oppa Egyptii ja seivo suhkkes moahtin miehtá oppa eatnama. Dakkár rásselohkkoeatnatvuohta ii leat goassege leamaš ovdal iige goassege šatta maŋŋil. ₁₅Dat gokče eatnama nu ahte dat šattai čáhppadin. Dat borre buot mii šattai eatnamis, ja buot šaddosiid mat ledje báhcán muoraide čuorpmasteami maŋŋá. Ii gostege oppa Egyptas lean šat ruonas, ii muorain iige eatnamis. ₁₆Farao gohčui hoahpus rávkat lusas Mosesa ja Arona ja dajai: “Mun lean suddudan Hearrá, dudno Ipmila, vuostá ja dudno vuostá. ₁₇Addi goit munnje mu suttu ándagassii vel dán háve ja rohkadalli Hearrá, Ipmileatte, vai son jorgalivččii mus eret dán issoras ráŋggáštusa.” ₁₈Moses vulggii farao luhtte ja rohkadalai Hearrá, ₁₉ja Hearrá jorgalii biekka garra orjješbieggan, mii doalvvui rásselohkuid eret ja suhppii daid Ruksesmerrii. Ii báhcán oktage rásselohkku buot Egypta rájiid sisa. ₂₀Muhto Hearrá buoššudii farao váimmu, iige farao luoitán israellaččaid vuolgit.

₂₁Hearrá celkkii Mosesii: “Geige gieđa almmi guvlui, de Egyptii šaddá dakkár seavdnjadas ahte dan sáhttá gieđain duohtadit.” ₂₂Moses geigii gieđa almmi guvlui, ja Egyptii šattai suhkkes seavdnjadas golmma beaivái. ₂₃Olbmot eai oaidnán guhtet guimmiideaset eaige sáhttán mannat gosage golmma beaivái, muhto israellaččaid ássanguovlluin lei čuovgat. ₂₄Farao rávkkai Mosesa lusas ja dajai: “Mannet bálvalit Hearrá. Dušše smávvaoamit ja stuorraoamit galget báhcit. Maiddái din áhkát ja mánát ožžot vuolgit dinguin.” ₂₅Moses vástidii: “Vaikko don ieš attášit midjiide elliid njuovvanoaffarin ja boaldinoaffarin Hearrái, min Ipmilii, ₂₆de min oamit galget maid boahtit min mielde, deike ii oaččo báhcit ii gazzage. Mii váldit omiin dan maid oaffaruššat Hearrái, Ipmilasamet. Mii eat iežage dieđe makkár oaffariiguin mii bálvalit Hearrá, ovdal go leat ollen dohko.” ₂₇Muhto Hearrá buoššudii farao váimmu, iige farao dáhtton luoitit israellaččaid. ₂₈Farao dajai Mosesii: “Mana eret, alege šat boađe mu čalmmiid ovdii. Jos mun vel oktii oainnán du, de don jámát!” ₂₉Moses vástidii: “Don leat vuoigadis. Mun in šat goassege boađe du čalmmiid ovdii.”