2. Mosesgirji 25

₁Hearrá celkkii Mosesii:

₂Gohčo israellaččaid čoaggit munnje attáldagaid. Váldet daid juohke olbmos gean váibmu vikkaha su addit. ₃Dákkár attáldagaid dii galgabehtet váldit sis: Golli, silbba ja bronssa, ₄ruksesalit, purpurrukses ja karmosinrukses ulluid, fiinna beallemasaid ja gáiccaguolggaid, ₅ruoksadin báidnojuvvon vierccanáhkiid, delfiinnanáhkiid ja akasiamuora, ₆oljju lámpái, hádjaávdnasiid vuoidanoljui ja njálggahájat suovvasiidda, ₇ja onyksgeđggiid ja eará divrras geđggiid efodii ja raddeleahppái.

₈Sii galget dahkat munnje bassibáikki, de mun ásan sin gaskkas. ₉Dahket bassibáikki ja buot dan biergasiid dárkilit dan málle mielde maid mun čájehan dutnje.

₁₀Duddjo akasiamuoras árkka mii lea bealgoalmmát állana guhku, beannot állana govddu ja beannot állana alu. ₁₁Skoađas dan siskkobeali ja olggobeali čielga golliin ja duddjo dan birra golleravdda. ₁₂Leike njeallje gollerieggá ja gidde daid árkka njealji juolgái, guokte rieggá dan goappáge beallái. ₁₃Duddjo guoddinstákkuid akasiamuoras, skoađas daid golliin ₁₄ja nahket daid daidda rieggáide mat leat árkka guovtte bealde, nu ahte árkka sáhttá guoddit stákkuiguin. ₁₅Guoddinstákkut galget orrut árkka rieggáin, daid ii galgga eisege váldit eret. ₁₆Bija árkii dan lihtumearkka maid mun dutnje attán.

₁₇Duddjo soabahussaji čielga gollis, bealgoalmmát állana guhku ja beannot állana govddu. ₁₈Duddjo guokte keruba derpojuvvon gollis ja bija daid soabahussaji gežiide, ₁₉nuppi keruba soabahussaji nuppi geahčái ja nuppi kerubagis dan nuppi geahčái. Daga kerubaid oktan bihttán soabahussaji gežiiguin. ₂₀Kerubaid soaját galget leat leabbut, nu ahte dat gokčet soabahussaji. Kerubat galget leat oktii čalmmiid ja daid muođut soabahussaji guvlui. ₂₁Bija soabahussaji árkka badjelii, ja bija árkii lihtumearkka maid mun dutnje attán. ₂₂Das mun almmustuvan dutnje. Mun sártnun duinna soabahussaji badjelis, dan guovtti keruba gaskkas mat leat lihtumearkka árkka badjelis, ja mun almmuhan dutnje buot gohččumiiddán maid attán israellaččaide.

₂₃Duddjo akasiamuoras beavddi mii lea guokte állana guhku, ovtta állana govddu ja beannot állana alu. ₂₄Skoađas dan čielga golliin ja duddjo dan birra golleravdda. ₂₅Duddjo dan birra gieđa govdosaš listta ja listii gollegierddu. ₂₆Duddjo njeallje gollerieggá ja gidde rieggáid beavddi njealji čihkii, guđege juolgái. ₂₇Aiddo listta lahka galget leat rieggát guoddinstákkuid várás, vai beavddi sáhttá guoddit. ₂₈Duddjo guoddinstákkuid akasiamuoras ja skoađas daid golliin. Beavddi galgá guoddit daiguin. ₂₉Duddjo dasa maiddái fáhtaid ja gohpuid, mukkaid ja bolluid juhkamušoaffara várás. Duddjo daid čielga gollis. ₃₀Ane oaffarláibbiid álelassii beavddi alde mu muođuid ovddas.

₃₁Duddjo lámpájuolggi čielga gollis. Dan juolgi ja nađđa galget leat derpojuvvon gollis. Gohčo dearpat dasa lihtiid ja daidda urbeoivviid ja lieđđelasttaid, buot oktan bihttán. ₃₂Lámpájuolggis galget surggiidit guhtta suorggi, golbma suorggi goappáge beallái. ₃₃Vuosttaš suorggis galget leat golbma mandellieđi láhkásaš lihti oktan urbeoivviiguin ja lieđđelasttaiguin, ja seammá ládje maid nuppi suorggis. Dat galget leat nie guđege guđa suorggis mat surggiidit lámpájuolggis. ₃₄Muhto ieš lámpájuolggi nađas galget leat njeallje mandellieđi láhkásaš lihti oktan urbeoivviiguin ja lieđđelasttaiguin, ₃₅ja lámppá vuosttaš, nuppi ja goalmmát suorgebára vuolde, buot dan guđa suorggi vuolde mat surggiidit lámpájuolggis, galgá leat okta urbeoaivi oktan bihttán lámpájulggiin. ₃₆Urbeoaivvit ja suorggit galget leat nađain oktan bihttán. Oppa lámpá galgá leat derpojuvvon oktan bihttán čielga gollis. ₃₇Ráhkat lámpájuolgái čieža lámppá ja bija daid nu ahte čuovga báitá njuolggá lámpájuolggi ovdii. ₃₈Dan basttat ja vuolušlihtit galget leat čielga gollis. ₃₉Geavat ovtta taleantta čielga golli lámpájuolgái ja buot dan biergasiid duddjomii. ₄₀Ane fuola das ahte duddjot visot daid dan málle mielde mii dutnje čájehuvvui váris.