2. Mosesgirji 27

₁Duddjo áltára akasiamuoras. Áltár galgá leat njealječiegat, viđa állana guhku, viđa állana govddu ja golmma állana alu. ₂Duddjo dan njealji čihkii čorvviid, oktan bihttán áltáriin, ja skoađas áltára bronssain. ₃Duddjo gutnalihtiid, maiguin vuddjes gunat dolvojuvvojit eret, ja gutnagoaivvuid, oaffarbolluid, gáffaliid ja dollalihtiid. Buot daid biergasiid galggat duddjot bronssas. ₄Duddjo áltára várás fierpmilágáš bronsabildda ja duddjo bildda njealji čihkii bronsarieggá. ₅Bija dan áltára ravdalistta vuollái, nu ahte fierbmi ollá áltára gaskkamuttu rádjái. ₆Duddjo áltára várás guoddinstákkuid akasiamuoras ja skoađas daid bronssain. ₇Guoddinstákkut galget nahkehuvvot rieggáide mat leat áltára goappáge bealde, nu ahte dan sáhttá guoddit. ₈Duddjo áltára fielluin ja guođe dan rabas vuolil ja bajil. Duddjo dan dakkárin go besset oaidnit váris.

₉Ráhkat goađi birra ovdašilju. Šilju lulleravddas galget leat čuođi állana guhkkosaš loavdagat, fiinna gerdojuvvon beallemasas. ₁₀Galggat duddjot guoktelogi stoalppu ja guoktelogi bronsajuolggi guoddit loavdagiid. Stoalppuid roahkit ja doaresmuorat galget leat silbbas. ₁₁Seammá láhkái galget davveravdii duddjojuvvot čuođi állana guhkkosaš loavdagat, ja daidda guoktelogi stoalppu ja guoktelogi bronsajuolggi ja stoalppuide silbaroahkit ja silbadoaresholggat. ₁₂Ovdašilju govdodahkii oarjjabealde galget duddjojuvvot viđalogi állana guhkkosaš loavdagat ja daidda logi stoalppu ja logi juolggi. ₁₃Ovdašilju govdodat nuorttabealde, nuorttas guvlui, galgá leat vihttalogi állana. ₁₄Doppe loavdagat galget leat nuppe bealde viđanuppelogi állana guhku, ja daid guoddimin golbma stoalppu ja golbma juolggi, ₁₅ja nuppe bealde viđanuppelogi állana guhku, ja daid guoddimin golbma stoalppu ja golbma juolggi. ₁₆Ovdašilju poarttas galgá leat guovttelogi állana govdosaš govččas, mii lea čáppa hearvaduodji ruksesalit, purpurrukses ja karmosinrukses ullus ja fiinna gerdojuvvon beallemasas. Dan guoddimin galget leat njeallje stoalppu ja njeallje juolggi. ₁₇Buot ovdašilju stoalppuin galget leat silbadoaresholggat ja silbaroahkit ja bronsajuolggit. ₁₈Ovdašillju galgá leat čuođi állana guhku, vihttalogi állana govddu ja viđa állana alu. Loavdda galgá leat fiinna gerdojuvvon beallemasas ja juolggit bronssas. ₁₉Buot goađi biergasat mat doppe geavahuvvojit, ja dan giddennávllit ja ovdašilju giddennávllit, galget leat bronssas.

₂₀Gohčo israellaččaid buktit alccesat buhtis oljju mii lea dekčojuvvon oliivvain lámpájuolggi várás, vai lámppáid sáhttá bidjat sadjái juohke beaivvi. ₂₁Almmustusgoađis, ovdaloavdaga olggobealde mii lea lihtumearkka ovddas, Aron bártniidisguin galgá fuolahit ahte lámppát bullet Hearrá muođuid ovddas eahkedis iđidii. Dát lea agálaš mearrádus israellaččaide buolvvas bulvii.