2. Mosesgirji 29

₁Ná don galggat basuhit Arona ja su bártniid mu báhppan: Váldde nuorra vuovssá ja guokte viercca mat leat almmá vigi haga, ₂suvrutkeahtes láibbi ja oljjuin ráhkaduvvon asehis suvrutkeahtes gáhkuid ja oljjuin vuidojuvvon asehis suvrutkeahtes láibbážiid. Láibbo daid sevlejuvvon nisojáffuin, ₃bija daid veaddelihttái ja buvtte daid munnje veaddelihtis, seammá háve go buvttát vuovssá ja guokte viercca. ₄Buvtte dasto Arona ja su bártniid almmustusgoađi uksanjálbmái ja basa sin čáziin. ₅Váldde dasto biktasiid, gárvvut Aronii gávtti, efoda olgguldasbiktasa, efoda ja raddeleahpi ja gidde efoda boahkániin. ₆Bija turbána su oaivái ja gidde bassi oaivečiŋa su turbánii. ₇Váldde vuoidanoljju, golggat dan su oaivái ja vuoidda su. ₈Buvtte dasto ovdan maiddái su bártniid ja gárvvut sidjiide báiddiid, ₉boahkánastte sin ja bija turbániid sin oaivái. De báhppavuohta lea sidjiide agálaš vuoigatvuohta.

Go don vihahat Arona ja su bártniid, ₁₀de buvtte vuovssá almmustusgoađi ovdii, ja Aron ja su bártnit galget bidjat gieđaid vuovssá oaivvi ala. ₁₁Njuova vuovssá Hearrá muođuid ovddas almmustusgoađi uvssa guoras, ₁₂váldde vuovssá vara, sihko dan suorpmain áltárčorvviide ja leike áltára gurrii vara mii lea báhcán. ₁₃Váldde buot leavssusbuiddiid, stuorit vuoivvasgeaži ja goappašiid maninčalmmiid oktan buiddiin, ja boaldde daid áltára alde. ₁₄Muhto vuovssá bierggu, náhki ja gubmuid galggat boaldit siidda olggobealde; dat lea suddooaffar.

₁₅Váldde dasto nuppi viercca, ja Aron ja su bártnit galget bidjat gieđaid viercca oaivvi ala. ₁₆Njuova dasto viercca ja riškkut dan vara miehtá áltára. ₁₇Ruvje viercca, basa dan siskilušaid ja julggiid ja bija daid ruvjjiid ja oaivvi ala. ₁₈Boaldde oppa viercca áltára alde. Dat lea boaldinoaffar Hearrái man hádja lea su miela mielde, dollaoaffar Hearrái.

₁₉Váldde dasto nuppi viercca, ja Aron ja su bártnit galget bidjat gieđaid dan oaivvi ala. ₂₀Njuova viercca, váldde dan vara, sihko dainna Arona ja su bártniid olgeš buoiddáža, olgeš bealggi ja olgeš juolgebealggi. Dan vara mii lea báhcán, galggat riškkuhit miehtá áltára. ₂₁Váldde vara ja vuoidanoljju áltára alde ja riškkut daid Arona ja su biktasiid ala, ja seammá láhkái su bártniid ja sin biktasiid ala. Dan láhkái son basuhuvvo, son ieš ja su biktasat ja su bártnit ja su bártniid biktasat.

₂₂Váldde viercca buoiddi ja biehčama ja leavssusbuiddiid, stuorit vuoivvasgeaži ja goappašiid maninčalmmiid ja daid buoiddi ja olgeš čoarbbeali, danin go dat lea báhppavihahusvierca, ₂₃ja maiddái jorba láibbi, oljjuin ráhkaduvvon gáhku ja asehis láibbáža veaddelihtis mii lea Hearrá muođuid ovddas ja mas leat suvrutkeahtes láibbit. ₂₄Atte daid visot Aronii ja su bártniide, ja sii galget bajidit daid oaffarin Hearrá muođuid ovddas. ₂₅Váldde daid dasto sis ja boaldde daid áltára alde oktanaga boaldinoaffariin, hádjan mii lea Hearrá miela mielde; dat lea dollaoaffar Hearrái. ₂₆Váldde mielgga Arona báhppavihahusvierccas ja bajit dan oaffarin Hearrá muođuid ovdii. Dat lea du oassi. ₂₇Don galggat basuhit bajiduvvon mielgga ja čoarbbeali mii lea addojuvvon oaffarin, ja báhppavihahusviercca ruvjjiid mat gullet Aronii ja su bártniide. ₂₈Aronis ja su bártniin lea agálaš vuoigatvuohta oažžut daid israellaččain. Dat lea attáldat maid israellaččat galget addit iežaset searvevuođaoaffariin, sin attáldat Hearrái.

₂₉Arona bártnit galget oažžut Arona bassi biktasiid su maŋŋil, ja álo go muhtun sis vuidojuvvo ja vihahuvvo báhppan, de son galgá atnit daid. ₃₀Čieža beaivvi daid galgá gárvodit dat bárdni gii šaddá báhppan áhčis maŋŋil ja gii oažžu mannat almmustusgoahtái doaimmahit bálvalusa.

₃₁Váldde báhppavihahusviercca ja vuošša dan bierggu bassi sajis. ₃₂Borroset Aron ja su bártnit viercca bierggu ja láibbi mii lea veaddelihtis almmustusgoađi uvssa guoras. ₃₃Sii galget borrat visot mii adnojuvvui soabahusoaffarin dalle go sii vihahuvvojedje ja basuhuvvojedje báhppan. Olmmoš gii ii leat vihahuvvon ii oaččo dan borrat, danne go dat lea bassi. ₃₄Jos báhppavihahusbierggus ja láibbis báhcá mihkkege iđidii, de dan galgá boaldit. Ii oktage oaččo borrat dan, dasgo dat lea bassi.

₃₅Daga Aronii ja su bártniide aiddo nugo mun lean du gohččon. Sin báhppavihahus galgá bistit čieža beaivvi. ₃₆Oaffaruša juohke beaivvi soabahussan vuovssá suddooaffarin. Oaffaruša suddooaffara áltára alde go don soabahat dan, ja vuoidda dan vai dat šaddá bassin. ₃₇Čieža beaivvi don galggat doaimmahit áltárii soabahusa ja basuhit dan. De áltár šaddá allabassin, ja buot mii guoská áltárii, šaddá bassin.

₃₈Don galggat oaffaruššat áltára alde guokte jahkásaš lábbá juohke beaivvi, álelassii. ₃₉Oaffaruša nuppi lábbá iđedis ja nuppi lábbágis eahkedisveaigin. ₄₀Oaffaruša vuosttaš lábbá lassin efa-mihtu logádasa sevlejuvvon jáffuid maidda lea seaguhuvvon njealjádas hin-mihttu oliivvain dekčojuvvon olju, ja juhkamušoaffarin njealjádas hin-mihtu viinni. ₄₁Oaffaruša nuppi lábbá eahkedisveaigin. Oaffaruša dan oktan seammalágán borramušoaffariin ja juhkamušoaffariin go iđedisge, hádjan mii lea Hearrá miela mielde, dollaoaffarin sutnje. ₄₂Dát galgá leat beaivválaš boaldinoaffar buolvvas bulvii Hearrá muođuid ovddas almmustusgoađi uvssa guoras. Doppe mun almmustuvan didjiide ja sártnun dutnje. ₄₃Doppe mun almmustuvan israellaččaide, ja mu hearvásvuohta basuha goađi. ₄₄Mun basuhan almmustusgoađi ja áltára, ja mun basuhan Arona ja su bártniid bálvalit mu báhppan. ₄₅Mun ásan israellaččaid gaskkas ja lean sin Ipmil, ₄₆ja sii ipmirdit ahte mun lean Hearrá, sin Ipmil, guhte bukten sin Egyptas vai beasan ássat sin gaskkas. Mun lean Hearrá, sin Ipmil.