2. Mosesgirji 40

₁Hearrá celkkii Mosesii:

₂Vuosttaš mánu vuosttaš beaivvi galggat cegget goađi, almmustusgoađi. ₃Bija dohko lihtumearkka árkka ja heŋge ovdaloavdaga árkka ovdii. ₄Doalvvo dohko beavddi ja lágit dan. Doalvvo dohko lámpájuolggi ja bija dasa lámppáid mat gullet dasa. ₅Bija gollesuovasáltára lihtumearkka árkka ovdii ja heŋge gokčasa goađi uvssa ovdii. ₆Bija boaldinoaffaráltára goađi, almmustusgoađi, uvssa ovdii, ₇bija áldása almmustusgoađi ja áltára gaskii ja deavdde dan čáziin. ₈Cegge loavdagiid ovdašilju birra ja heŋge gokčasa ovdašilju poartta ovdii. ₉Váldde dasto vuoidanoljju ja vuoidda dainna goađi ja buot mii doppe lea, basut dan ja buot dan dárbašiid, nu ahte dat šaddá bassin. ₁₀Vuoidda boaldinoaffaráltára ja buot dan dárbašiid ja basut áltára, nu ahte dat šaddá allabassin. ₁₁Vuoidda áldása ja dan juolggi ja basut dan.

₁₂Doalvvo dasto Arona ja su bártniid almmustusgoađi uvssa ovdii ja basa sin čáziin. ₁₃Gárvvut Aronii bassi biktasiid ja vuoidda su ja basut su mu báhppan. ₁₄Doalvvo dasto su bártniid ovdan ja gárvvut sidjiide báiddiid. ₁₅Vuoidda sin mu báhppan, nugo don vuidet sin áhči. Dat ahte sii leat vuidojuvvon, addá sidjiide vuoigatvuođa báhppavuhtii agálaš áigái, buolvvas bulvii.

₁₆Moses dagai buot aiddo nugo Hearrá lei gohččon. ₁₇Goahti ceggejuvvui nuppi jagi vuosttaš mánus, mánu vuosttaš beaivvi. ₁₈Dalle Moses ceggii goađi. Son bijai dan julggiid sadjáseaset, bijai daidda fielluid, giddii doaresmuoraid ja ceggii stoalppuid. ₁₉Son lebbii loavdaga goađi badjel ja bijai gokčasa bajimužžan goađi ala dan gohččuma mielde maid Hearrá lei addán sutnje. ₂₀Son válddii lihtumearkka ja bijai dan árkii, giddii dasa guoddinstákkuid ja bijai soabahussaji árkka ala. ₂₁Son buvttii árkka goahtái, heŋgii ovdaloavdaga lihtumearkka árkka ovdii dan gohččuma mielde maid Hearrá lei addán sutnje. ₂₂Son bijai beavddi almmustusgoahtái, goađi davábeale seainni gurrii, ovdaloavdaga ovdii, ₂₃ja bijai láibbiid beavddi ala Hearrá ovdii dan gohččuma mielde maid Hearrá lei addán sutnje. ₂₄Son bijai lámpájuolggi almmustusgoahtái, goađi lulábeale seainni gurrii, beavddi buohta, ₂₅ja bajidii lámppáid sadjáseaset Hearrá muođuid ovdii dan gohččuma mielde maid Hearrá lei addán sutnje. ₂₆Golleáltára son bijai almmustusgoahtái, ovdaloavdaga ovddabeallái, ₂₇ja son bolddii áltára alde njálggahájat suovvasiid dan gohččuma mielde maid Hearrá lei addán sutnje. ₂₈Son heŋgii gokčasa goađi uvssa ovdii. ₂₉Son bijai boaldinoaffaráltára goađi, almmustusgoađi, uvssa gurrii, ja bolddii áltára alde boaldinoaffariid ja borramušoaffariid dan gohččuma mielde maid Hearrá lei addán sutnje. ₃₀Áldása son bijai almmustusgoađi ja áltára gaskii ja devddii dan čáziin basadeami várás. ₃₁Moses ja Aron ja su bártnit basse das gieđaid ja julggiid. ₃₂Go sii bohte almmustusgoahtái dahje go ledje mannamin áltára ovdii, de sii basadedje dan gohččuma mielde maid Hearrá lei addán Mosesii. ₃₃Moses ceggii ovdašilju loavdagiid goađi ja áltára birra ja heŋgii gokčasa ovdašilju poartta ovdii. Nu Moses oaččui barggu gárvvisin.

₃₄Balva govččai almmustusgoađi, ja Hearrá hearvásvuohta devddii goađi. ₃₅Moses ii sáhttán mannat almmustusgoahtái, danin go balva orui dan alde ja Hearrá hearvásvuohta devddii goađi. ₃₆Go balva badjánii goađi alde, de israellaččat vulge johtui. Nu sii dahke oppa vádjolusa áigge. ₃₇Jos balva ii badjánan, de sii eai vuolgán ovdal go dan beaivvi go dat fas badjánii. ₃₈Hearrá balva lei beaivet goađi alde, ja ihkku balvvas báittii dolla israellaččaid čalmmiid ovddas oppa sin vádjolusa áigge.