2. Mosesgirji 8

₁Dalle Hearrá sártnui Mosesii: “Mana farao lusa ja cealkke sutnje: Ná cealká Hearrá: Luoitte mu álbmoga vuolgit, vai sii besset bálvalit mu. ₂Jos don biehttalat luoitimis álbmoga, de mun divttán cubbuid váivvidit oppa du eatnama. ₃Eanus guđaidit cubbot, ja dat gorgŋot goikásii ja čákŋet du šlohttii, du oađđingámmárii ja du seŋgii, du hoavvaolbmáid ja du álbmoga viesuide, du eatnama buot láibunuvnnaide ja dáigegáriide. ₄Cubbot šaddet du ja du álbmoga ja buot du hoavvaolbmáid giksin.” ₅Hearrá sártnui Mosesii: “Gohčo Arona geiget soappis jogaid, kanálaid ja ládduid badjel ja čuoččáldahttit cubbuid Egypta giksin.” ₆De Aron geigii soappis Egypta čáziid badjel, ja cubbot bohte goikásii ja gokče oppa Egypta. ₇Muhto diehttit dahke seammá láhkái čiegus goansttaideasetguin ja čuoččáldahtte cubbuid Egyptii.

₈Dalle farao rávkkai Mosesa ja Arona lusas ja dajai: “Rohkadalli Hearrá váldit eret cubbuid givssideames mu ja mu álbmoga, de mun luoittán dudno álbmoga oaffaruššat Hearrái.” ₉Moses dajai faraoi: “Don oaččut almmuhit mearreáiggi. Mun rohkadalan du, du hoavvaolbmáid ja du álbmoga ovddas, ja mearreáiggis cubbot jávket givssideames du ja dán eatnama viesuid, ja dat báhcet dušše Niletnui.” ₁₀Farao vástidii: “Ihttin.” Moses dajai: “Šaddos nugo leat dadjan, vai dieđášit ahte ii leat oktage Hearrá, min Ipmila, veardásaš. ₁₁Cubbot gáidet eret du viesuin, du hoavvaolbmáid ja du álbmoga luhtte, ja dušše Niletnui báhcet vel cubbot.”

₁₂Moses ja Aron manaiga eret farao luhtte, ja Moses rohkadalai ja ánui Hearrá váldit eret cubbuid maid son lei bidjan farao giksin. ₁₃Hearrá dagai nugo Moses ánui, ja cubbot jápme viesuide, šiljuide ja bealdduide. ₁₄Dat čoggojuvvojedje guhpán, ja oppa eanan háisugođii. ₁₅Muhto go farao oinnii ahte giksi lei vássán, de son buoššudii váimmus iige guldalan sudno, nugo Hearrá lei cealkán.

₁₆Hearrá sártnui Mosesii: “Gohčo Arona geiget soappi ja časkit eatnama, de dan gavjjas šaddet čuoikkat oppa Egyptii.” ₁₇Soai dagaiga nu. Aron geigii gieđa ja časkkii soppiinis eatnama, ja čuoikkat givssidišgohte olbmuid ja omiid. Eatnama gavja šattai čuoikan oppa Egyptas. ₁₈Diehttit geahččaledje maiddái dahkat čuoikkaid čiegus goansttaideasetguin, muhto eai máhttán. Ja go čuoikkat givssidedje olbmuid ja omiid, ₁₉de diehttit dadje faraoi: “Dát lea Ipmila suorbma.” Muhto farao buoššudii váimmus iige guldalan Mosesa ja Arona, nugo Hearrá lei cealkán.

₂₀Hearrá sártnui Mosesii: “Mana árrat iđedis farao ovddal go son lea mannamin Nileanu gáddái, ja cealkke sutnje: Ná cealká Hearrá: Luoitte mu álbmoga vuolgit, vai sii besset bálvalit mu. ₂₁Jos don it luoitte mu álbmoga, de mun vuolggahan čurotmođiid váivvidit du, du hoavvaolbmáid ja du álbmoga, nu ahte Egypta viesuid ja eatnama dievva leat čurohat. ₂₂Muhto mun várjalan Gosena gos mu álbmot ássá, nu ahte dohko dat eai boađe. Dalle don ipmirdat ahte mun, Hearrá, lean dán eatnamis. ₂₃Mun dagan erohusa iežan álbmoga ja du álbmoga gaskii. Ihttin dát mearka šaddá.”

₂₄Ja Hearrá dagai nu. Suhkkes čurotmoađit bohte farao šlohttii, su hoavvaolbmáid viesuide ja oppa Egyptii, ja čurohat váivvidedje issorasat oppa eatnama. ₂₅Dalle farao rávkkai lusas Mosesa ja Arona ja dajai: “Mannet ja oaffaruššet Ipmilasadet dáppe Egyptas.” ₂₆Muhto Moses vástidii: “Nie ii heive dahkat, danne go dalle go mii oaffaruššat Hearrái, Ipmilasamet, de egyptalaččat anášedje min oaffara fastin. Jos mii sin oaidnut oaffaruššat oaffara maid sii fasttášit, de sii geađgádit min. ₂₇Mii mannat meahccái golmma beaivása duohkái oaffaruššat Hearrái, Ipmilasamet, nugo son gohčču min.” ₂₈De farao dajai: “Mun divttán din mannat meahccái, vai beassabehtet oaffaruššat Hearrái, Ipmilasadet. Allet fal mana menddo guhkás. Rohkadallet maiddái mu ovddas!” ₂₉Moses dajai: “Dalán go mun lean vuolgán du luhtte, de mun rohkadalan Hearrá, ja ihttin čurohat jávket áŧesteames du, farao, du hoavvaolbmáid ja álbmoga. Ale fal šat beahte min, muhto luoitte min álbmoga mannat oaffaruššat Hearrái.” ₃₀Moses vulggii farao luhtte ja rohkadalai Hearrá. ₃₁Hearrá dagai nugo Moses lei átnon, ja jávkadii čurohiid áŧesteames farao, su hoavvaolbmáid ja su álbmoga, nu ahte ii báhcán ii oktage čurot. ₃₂Muhto farao buoššudii váimmus dán hávege, iige luoitán álbmoga vuolgit.