Esekiel 15

₁Munnje bođii dát Hearrá sátni: ₂Olmmoš, mii buoretvuođaid viidnemuoras lea eará muoraid ektui, leago viidnemuorrasuorgi buoret go eará muorat? ₃Sáhttágo dan muoras ávnnastit juoidá, sáhttágo das duddjot návllige masa beassá heaŋggastit biergasiid? ₄Ja jos dat lea biddjojuvvon dollii ja dolla lea boaldán das goappáge geaži ja guosmudan gaskabáikki, de dohkkego dat mange duoji ávnnasin? ₅Iihan dat dohkken duodjeávnnasin dallege go dat lei ollis, vel uhcit dál, go dolla lea boaldán ja guosmudan dan. ₆Dan dihte cealká Hearrá Ipmil: Nugo viidnemuorra biddjojuvvo dollii oktan meahci muoraiguin, nu maiddái Jerusalema ássit. ₇Mun jorgalan muođuid sin vuostá, ja vaikko sii besset báhtarit dolas, de maŋimuš dolla loaktá sin. Go mun jorgalan muođuid sin vuostá, de dalle dii ipmirdehpet ahte mun lean Hearrá. ₈Mun dagan eatnama ávdimin, danin go sii leat leamaš oskkáldasmeahttumat, cealká Hearrá Ipmil.