Esekiel 4

₁Olmmoš, váldde tiilageađggi, bija dan iežat ovdii ja sárggo dasa gávpoga, Jerusalema. ₂Birastahte dasto dan, ráhkat dan birra birastahttinčoma ja hukse fallehangorgŋehaga, daga soahtesiidda ja cegge muvrracuvkejeddjiid juohke beallái. ₃Váldde dasto ruovdepláhta ja bija dan ruovdeseaidnin iežat ja gávpoga gaskii. Jorgal muođuid gávpoga guvlui, ja nu dat lea birastahttojuvvon. Don galggat birastahttit dan, ja dat lea mearkan Israela álbmogii.

₄Veallán gurut beale gilgga ala ja váldde badjelasat Israela suddovealggi. Nu guhká go don veallát dan gilgga alde, de don guottát Israela suddovealggi. ₅Mun dagan daid jagiid maid sii leat suddudan, seammá galle beaivin dutnje, golbmačuođi ovccilogi beaivin. Nu guhká don galggat guoddit Israela suddovealggi. ₆Go don leat loaktán daid beivviid, de don galggat veallánit nuppádassii, dál olgeš beale gilgga ala. Don galggat guoddit maiddái Juda suddovealggi, ja mun bijan du guoddit dan ovtta beaivvi guđege jagi nammii, njealljelogi beaivvi. ₇Jorgal dasto muođuidat birastahttojuvvon Jerusalema guvlui ja profehtastala gávpoga vuostá giehta rabasin. ₈Mun čanan du báttiiguin, nu ahte don it sáhte jorgalit nuppe beale gilggas nubbái, ovdal go leat birastahttán gávpoga olles áiggi.

₉Váldde nisuid ja bivggiid, bábuid ja linssaid, hirsagortniid ja spealttaid. Bija daid ovtta lihttái ja láibbo dain alccesat láibbi. Dat lea du biebmu dan botta go don veallát gilgga alde, golbmačuođi ovccilogi beaivvi. ₁₀Dat biebmu maid don borat, galgá vihkkejuvvot: Don oaččut borrat guđege jándoris guoktelogi šekela. ₁₁Dat čáhci maid don jugat galgá mihtiduvvot: Don oaččut juhkat guđege jándoris hinmihtu guđádasa. ₁₂Bora biepmu nugo borašit bivgegáhku. Láibbo daid buohkaid oaidnut ja ane boaldámuššan olbmobaikka. ₁₃Ja Hearrá celkkii: “Dáinna lágiin israellaččat šaddet borrat láibbiset, buhtismeahttumin, daid álbmogiid gaskkas gosa mun áján sin.” ₁₄Muhto mun celken: “Vuoi, Hearrá Ipmil! Mun in leat goassege dahkan iežan buhtismeahttumin. Mánnávuođa rájes gitta dán beaivvi rádjái mun in leat borran ráppiid inge jámas gaikkoduvvon ráđuid, iige buhtismeahttun oaffarbiergu leat boahtán mu njálbmái.” ₁₅Hearrá vástidii: “Mun suovan du atnit gusamuhkki olbmobaikka sajis, goikat láibbát dainna.” ₁₆Son celkkii vel: “Olmmoš, mun divttán láibbi nohkat Jerusalemis. Sii šaddet borrat vihkkejuvvon láibbi áŧestusas ja juhkat mihtiduvvon čázi balus. ₁₇Go sii nohkkojit láibbis ja čázis, de sii buohkat hirpmahuvvet, ja sii roahppánit suttuideaset geažil.”